బ్లడ్ షుగర్ చెక్ చేయకుండానే.. ఇన్సులిన్ మార్పులను పసిగట్టే గూగుల్ టెక్నాలజీ!

Google Wearables: ఆరోగ్యాన్ని కాపాడుకోవడంలో స్మార్ట్‌వాచ్‌లు ఇప్పుడు కీలక పాత్ర పోషిస్తున్నాయి. ఈ క్రమంలో గూగుల్ తమ కొత్త ‘హెల్త్ గార్డియన్’ ఫీచర్ ద్వారా ఒక కీలకమైన అప్‌డేట్‌ను మన ముందుకు తెచ్చింది. Pixel Watch 5, Fitbit Air మోడళ్లలో అందుబాటులోకి వచ్చిన ఈ టెక్నాలజీ.. శరీరంలో ఇన్సులిన్ నిరోధకత (Insulin Resistance) పెరుగుతుందో లేదో ముందే గుర్తించి మనల్ని అప్రమత్తం చేస్తుంది.

ఇదెలా పనిచేస్తుందంటే..

చాలామంది ఇది రక్తంలో చక్కెర స్థాయిలను నేరుగా కొలుస్తుందని భావించవచ్చు. కానీ ఇది నేరుగా బ్లడ్ షుగర్ లెవెల్స్‌ను చూపించదు. వాచ్‌లో ఉండే హృదయ స్పందనల ట్రాకర్, చర్మ ఉష్ణోగ్రత, బాడీ మూవ్‌మెంట్ ఆధారంగా పనిచేసే వివిధ సెన్సార్ల డేటాను గూగుల్ ఏఐ విశ్లేషిస్తుంది. దాదాపు లక్ష మందికి పైగా వ్యక్తుల డేటాతో శిక్షణ పొందిన ఈ ఏఐ, మన శరీరంలో వచ్చే చిన్న చిన్న మార్పులను గమనించి, ఇన్సులిన్ నిరోధకతలో తేడాలు ఉన్నట్లు గుర్తిస్తే వెంటనే నోటిఫికేషన్ ఇస్తుంది.

Also Read: శాంసంగ్ నుంచి 3 కొత్త గ్యాడ్జెట్లు.. Google ప్లే కన్సోల్‌లో దర్శనమిచ్చిన గ్యాలాక్సీ ఫోన్లు!

హెచ్చరిక వ్యవస్థ మాత్రమే..

ఈ ఫీచర్ మీకు షుగర్ వ్యాధి ఉందో లేదో నిర్ధారించదు. అలాగే డాక్టర్ల సలహాలకు, డయాబెటిస్ పరీక్షలకు ఇది ప్రత్యామ్నాయం కూడా కాదు. రోజువారీ జీవితంలో మన జీవనశైలి వల్ల శరీరంలో ఎలాంటి మార్పులు వస్తున్నాయో తెలియజెప్పే ఒక ముందస్తు హెచ్చరిక వ్యవస్థ మాత్రమే. డేటా ఆధారంగా ఆహార అలవాట్లు లేదా వ్యాయామంలో మార్పులు చేసుకోవడానికి, అవసరమైతే వైద్యుడిని సంప్రదించడానికి ఇది ఉపయోగపడుతుంది.

మున్ముందు మరిన్ని మార్పులు..

ప్రస్తుతానికి ఈ సేవలు ఎంపిక చేసిన పరికరాల్లోనే ఉన్నప్పటికీ.. త్వరలోనే మరిన్ని వాచ్‌లకు విస్తరించేందుకు గూగుల్ సిద్ధమవుతోంది. యాపిల్, ఊరా, ఊప్ వంటి ఇతర దిగ్గజ సంస్థలు కూడా ఈ రేసులో ఉన్నప్పటికీ.. ఆర్టిఫిషియల్ ఇంటెలిజెన్స్ సాయంతో ఆరోగ్యాన్ని అంచనా వేయడంలో గూగుల్ ఒక అడుగు ముందుకేసింది. భవిష్యత్తులో ఈ సెన్సార్లు మరింత ఖచ్చితత్వంతో పనిచేసే అవకాశాలు ఉన్నాయి.

Also Read: ఫోన్‌తో పనిలేకుండా మీటింగ్ రికార్డింగ్, లైవ్ ట్రాన్స్‌లేషన్.. రూ.12,499కే ఏఐ ఇయర్ బడ్స్!