Shubhman Gill Test Captain: శుభ్‌మన్ గిల్‌కు టెస్ట్ కెప్టెన్సీ గురించి ఏమీ తెలీదు.. మాజీ స్టార్ క్రికెటర్ తీవ్ర విమర్శలు

Shubhman Gill Test Captain | భారత క్రికెట్ జట్టుకు కొత్త టెస్ట్ కెప్టెన్‌గా శుభ్‌మన్ గిల్ ని ఇటీవల బిసిసిఐ నియమించింది. రోహిత్ శర్మ టెస్ట్ క్రికెట్ నుంచి రిటైర్ అయిన తర్వాత, కోచ్ గౌతమ గంభీర్, సెలెక్టర్ అజిత్ అగార్కర్.. ఈ 25 ఏళ్ల ఈ యువ క్రికెటర్‌కు టెస్ట్ టీమ్ సారథ్య బాధ్యత అప్పగించారు. జూన్ 20 నుంచి ఇంగ్లాండ్‌లో జరిగే ఐదు టెస్ట్ మ్యాచ్‌ల సిరీస్‌లో కెప్టెన్‌గా గిల్ తన మొదటి ఛాలెంజ్‌ను ఎదుర్కోబోతున్నాడు. అయితే, గిల్ కెప్టెన్సీపై మాజీ స్టార్ క్రికెటర్ తీవ్ర విమర్శలు చేశాడు. మాజీ భారత క్రికెటర్ దినేష్ కార్తీక్ మాట్లాడుతూ.. టెస్ట్ కెప్టెన్సీ బరువు, బాధ్యతులు గిల్‌కు ఇంకా పూర్తిగా అర్థం కాలేదని అభిప్రాయపడ్డాడు. ఇంగ్లాండ్ లో కఠినమైన పరిస్థితుల్లో టెస్ట్ క్రికెట్ ఆడటం అంత సులభం కాదని, అనేక బలమైన జట్లు ఇక్కడ ఇబ్బందులు ఎదుర్కొన్నాయని అతను చెప్పాడు.

ఇంగ్లాండ్ బౌలింగ్ బలహీనంగా ఉండడం గిల్‌కు అవకాశం
కార్తీక్ మాట్లాడుతూ.. ఇంగ్లాండ్ బౌలింగ్ లైనప్‌లో బలహీనతలు ఉన్నాయని, ఇది భారత జట్టుకు అనుకూలంగా ఉండవచ్చని అన్నాడు. ఇంగ్లాండ్ బ్యాటింగ్ బలంగా ఉన్నప్పటికీ.. వారి బౌలింగ్ ఇంకా పూర్తిగా స్థిరంగా లేదని, ఇది భారత బ్యాటర్లకు అవకాశంగా మారవచ్చని అతను సూచించాడు. ఇంగ్లాండ్ జట్టుకు గాయాల సమస్యలు కూడా ఉన్నాయి. వేగవంతమైన బౌలర్ మార్క్ వుడ్ మొదటి మూడు టెస్టులకు దూరమయ్యాడు. జోఫ్రా ఆర్చర్ మొదటి మ్యాచ్‌కు అందుబాటులో ఉండడు. గస్ అట్కిన్సన్ గాయం నుంచి కోలుకుంటున్నాడు. ఈ పరిస్థితులు భారత జట్టుకు కొంత ప్రయోజనం చేకూర్చవచ్చు.

ఇంగ్లాండ్ టెస్టుకు భారత బ్యాటింగ్ ఆర్డర్
ఇంగ్లాండ్‌తో జరిగే ఈ సిరీస్ 2025-27 వరల్డ్ టెస్ట్ ఛాంపియన్‌షిప్ (WTC) సైకిల్‌లో భారత్‌కు మొదటి ఛాలెంజ్. ఈ సిరీస్ కోసం భారత బ్యాటింగ్ ఆర్డర్ గురించి చర్చలు జోరుగా సాగుతున్నాయి. విరాట్ కోహ్లీ, రోహిత్ శర్మ రిటైర్మెంట్ తర్వాత బ్యాటింగ్ లైనప్‌లో మార్పులు జరగనున్నాయి. మాజీ ఇంగ్లాండ్ కెప్టెన్ కెవిన్ పీటర్సన్ అభిప్రాయం ప్రకారం.. కేఎల్ రాహుల్, యశస్వి జైస్వాల్ ఓపెనింగ్ చేయవచ్చు. షుభ్‌మన్ గిల్.. 3 లేదా 4వ స్థానంలో బ్యాటింగ్‌కు రావొచ్చు. సాయి సుదర్శన్, కరుణ్ నాయర్ టాప్ 5లో ఉంటారని, ఆ తర్వాత ఇంకో బ్యాటర్, రిషభ్ పంత్ 7వ స్థానంలో ఆడవచ్చని అతను చెప్పాడు. ఇంగ్లాండ్ ఈ పరిస్థితుల్లో బ్యాటింగ్ బలోపేతం కోసం మరో బ్యాటర్‌ను ఎంచుకోవచ్చని పీటర్సన్ సూచించాడు.

కుల్దీప్ యాదవ్ మాత్రం షుభ్‌మన్ గిల్ కెప్టెన్సీకి పూర్తిగా సిద్ధంగా ఉన్నాడని నమ్ముతున్నాడు. రోహిత్ శర్మతో కలిసి గిల్ చాలా సీజన్లలో పనిచేశాడని, అతని నాయకత్వ లక్షణాలు బెకెన్‌హామ్‌లో జరిగిన ఇంట్రా-స్క్వాడ్ ప్రాక్టీస్ మ్యాచ్‌లో కనిపించాయని కుల్దీప్ అన్నాడు. గిల్ జట్టును సమర్థవంతంగా నడిపించగలడని, అతని ఆలోచనా విధానం జట్టుకు బలం చేకూర్చుతుందని ఆయన అభిప్రాయపడ్డాడు. ఇంట్రా-స్క్వాడ్ మ్యాచ్‌లో టాప్ ఆర్డర్ బ్యాటర్లు బాగా ఆడారని, ఫాస్ట్ బౌలర్లలో శార్దూల్ ఠాకూర్, సీనియర్ బౌలర్లు రాణించారని కుల్దీప్ తెలిపాడు.

Also Read: పాకిస్తాన్ తరపున క్రికెట్ ఆడిన సచిన్.. ఎందుకు చేశాడంటే?..

ఈ సిరీస్‌లో గిల్ నాయకత్వంలో భారత జట్టు ఎలా రాణిస్తుందనేది ఆసక్తికరంగా మారింది. ఇంగ్లాండ్ బౌలింగ్ బలహీనతలను సద్వినియోగం చేసుకుంటూ, భారత బ్యాటర్లు బలమైన ప్రదర్శన చేయగలిగితే.. ఈ సిరీస్ గిల్ కెరీర్‌లో కీలక మలుపుగా నిలవవచ్చు. అదే సమయంలో, ఇంగ్లాండ్ బ్యాటింగ్ బలం భారత బౌలర్లకు సవాలుగా ఉంటుంది. ఈ యువ జట్టు ఈ సవాళ్లను ఎలా ఎదుర్కొంటుంది, గిల్ నాయకత్వం ఎలా సాగుతుంది అనేది చూడాల్సి ఉంది.