హైదరాబాద్‌ మెట్రో ఫేజ్‌-2పై కేంద్రం బిగ్ అప్‌డేట్.. రూ. 275 కోట్ల నిధులు మంజూరు!

Hyderabad Metro: హైదరాబాద్ నగరవాసులకు ప్రజా రవాణాను మరింత చెంతకు చేర్చేందుకు తెలంగాణ ప్రభుత్వం చేపడుతున్న మెట్రో రెండో దశ ప్రాజెక్టుకు కేంద్ర ప్రభుత్వం నుంచి కీలకమైన ఊరట లభించింది. ఫేజ్-2 పనుల వేగాన్ని పెంచే దిశగా కేంద్రం ఏకంగా రూ. 275 కోట్ల నిధులను మంజూరు చేస్తూ పరిపాలనాపరమైన ఉత్తర్వులు జారీ చేసింది.

నిధుల కేటాయింపు

కేంద్ర ప్రభుత్వం విడుదల చేసిన రూ. 275 కోట్ల నిధులలో రూ. 125 కోట్లను రుణ రూపంలో సమకూర్చనుంది. ఈ మంజూరుతో ప్రాజెక్టు ప్రాథమిక పనులకు సంబంధించిన ఆర్థికపరమైన అడ్డంకులు తొలగిపోనున్నాయి. నగర రవాణా వ్యవస్థను ఆధునీకరించేందుకు కేంద్ర, రాష్ట్ర ప్రభుత్వాల భాగస్వామ్యం ఎంతో అవసరమని ఈ నిర్ణయం మరోసారి స్పష్టం చేస్తోంది.

76.4 కిలోమీటర్ల మేర మెట్రో విస్తరణ

హైదరాబాద్ విస్తరిస్తున్న తీరుకు తగ్గట్టుగా, విమానాశ్రయం , నగరంలోని ఇతర ప్రధాన ప్రాంతాలను కలుపుతూ రెండో దశను డిజైన్ చేశారు. మొత్తం 76.4 కిలోమీటర్ల నిడివితో సాగే ఈ విస్తరణ ప్రాజెక్టును రూ. 24,269 కోట్ల భారీ అంచనా వ్యయంతో చేపట్టేందుకు గతంలోనే ప్రభుత్వం ఆమోదం తెలిపింది. ప్రస్తుతం కేంద్రం నుంచి అందిన ఈ నిధుల మంజూరుతో రెండో దశ భూసేకరణ, సర్వే , ప్రాథమిక నిర్మాణ పనులు మరింత వేగం పుంజుకోనున్నాయి. ఇది రాబోయే రోజుల్లో భాగ్యనగర ట్రాఫిక్ ఇబ్బందులను తగ్గించడంలో కీలక పాత్ర పోషించనుంది.

Also Read: రాప్తాడు బాధితురాలిని పరామర్శించిన జగన్.. కూటమి ప్రభుత్వంపై హాట్ కామెంట్స్!