Hydra demolition: హైదరాబాద్ నగరంలో వర్షం పడుతుందంటే చాలామందికి మొదట గుర్తుకు వచ్చేది.. రోడ్లపై నీటి నిల్వలు, ముంపు సమస్యలు, నాలాల నుంచి ఉప్పొంగే వరదజలాలే. ప్రత్యేకంగా కూకట్‌పల్లి పరిసర ప్రాంతాల్లో ఈ సమస్య ప్రతి ఏడాది భయాందోళన కలిగిస్తూనే ఉంది. చిన్న వర్షం పడినా వీధులు జలాశయాల్లా మారిపోవడం, ఇళ్లలోకి నీరు చేరడం సాధారణమైపోయింది. అయితే ఈ సమస్యకు కారణం వర్షం కాదని, నాలాలపై ఆక్రమణలేనని అధికారులు స్పష్టం చేస్తున్నారు. తాజాగా మేడ్చల్ – మల్కాజిగిరి జిల్లాలోని ఏవీబీపురం వద్ద నాలాపై జరిగిన కూల్చివేత ఈ విషయాన్ని మరొక్కసారి రుజువు చేసింది.
నాలా వెడల్పు 10 మీటర్లు.. ఆక్రమణ 3 మీటర్లు పైగా!
ఏవీబీపురంలోని నాలా పరకి చెరువు నుంచి వచ్చి కూకట్‌పల్లి నాలాలో కలుస్తుంది. దీని వెడల్పు సుమారు 10 మీటర్లుగా ఉండాలి. కానీ వాస్తవ పరిస్థితి ఏమిటంటే.. 3 మీటర్లకు పైగా ఆక్రమణలకు గురైంది. నాలా పైనే కాకుండా మ్యాన్‌హోల్‌పై కూడా నిర్మాణాలు వచ్చాయి. అంతేకాదు, నాలాపైన రెండు పెద్ద షాపులు కట్టబడి షట్టర్లు వేశారు. ఈ దుకాణాల్లో సెల్‌ఫోన్లు, ల్యాప్‌టాప్‌ల విక్రయాలు, మరమ్మతులు జరుగుతున్నాయి. అంటే ప్రజా ప్రయోజనానికి ఉన్న నడిరోడ్డును సొంత ఆస్తిలా మార్చేసుకున్నారు అన్నమాట.
వరద భయంతో జీవిస్తున్న కాలనీవాసులు
ఈ నాలా మూసుకుపోవడంతో పక్కనే ఉన్న సాయిబాబా కాలనీ, హెచ్‌ఏఎల్ కాలనీ, మైత్రినగర్ కాలనీ వర్షం పడినప్పుడల్లా వరద ముంపుతో నానా ఇబ్బందులు పడుతున్నాయి. పై నుంచి వచ్చే వరదజలాలు సాఫీగా సాగలేకపోవడంతో అవి ఇళ్లలోకి చొరబడుతున్నాయి. చిన్న వర్షమే పడినా కాలనీల్లో నీటమునిగే పరిస్థితి నెలకొనడంతో ప్రజలు ఆందోళన చెందుతున్నారు. ఈ విషయాన్ని స్థానికులు పలు మార్లు అధికారుల దృష్టికి తీసుకెళ్లారు. చివరికి జలమండలి అధికారులు పరిశీలించి నివేదిక సమర్పించడంతో హైడ్రా యంత్రాలతో ఆక్రమణలు తొలగించే పనిని సోమవారం చేపట్టారు.
హైడ్రా బుల్డోజర్.. కూలిన షాపులు
ఉదయం మొదలైన ఈ కూల్చివేతలో హైడ్రా యంత్రం నాలాపై కట్టిన షాపులను కూల్చివేసింది. ఒక్కో షట్టర్ కూలిపోవడంతో అక్కడి వ్యాపారులు ఆశ్చర్యపోయారు. అయితే ప్రజా ప్రయోజనాన్ని దృష్టిలో పెట్టుకుని చేపట్టిన ఈ చర్యపై కాలనీవాసులు హర్షం వ్యక్తం చేశారు. ఇన్నాళ్లు తాము పడిన కష్టాలు తగ్గుతాయన్న నమ్మకాన్ని వ్యక్తం చేస్తున్నారు.
ఇక ముంపు భయం తగ్గింది.. స్థానికుల సంతోషం
కాలనీవాసులు మాట్లాడుతూ.. ఏ వర్షం పడినా మా ఇళ్లలోకి నీరు రావడం మాకు భయంకరంగా ఉండేది. పిల్లలు, పెద్దలు ఇబ్బందులు పడేవాళ్లం. ఇప్పుడు నాలా శుభ్రం చేశారు. హైడ్రా యంత్రంతో కూల్చివేత జరగడంతో ఇక ముంపు భయం తగ్గుతుంది. మా కాలనీల్లో మళ్లీ సుఖంగా ఉండొచ్చని అనిపిస్తోందని సంతోషం వ్యక్తం చేశారు.
Also Read: Tirumala ghat road: శ్రీవారి దర్శనంతో పాటు ప్రకృతి సోయగం.. వర్షాలతో శోభిల్లుతున్న తిరుమల!
ప్రభుత్వంపై నమ్మకం పెరిగిన ప్రజలు
సాధారణంగా ఇలాంటి ఆక్రమణలపై అధికారులు కఠిన చర్యలు తీసుకోవడం అరుదుగా జరుగుతుంది. చాలా సందర్భాల్లో రాజకీయ ఒత్తిళ్లు, స్థానిక ప్రభావం వల్ల పనులు ఆగిపోతాయి. కానీ ఈసారి హైడ్రా బుల్డోజర్ నాలాపైకి ఎక్కి ఆక్రమణలను కూల్చడంతో ప్రజల్లో ప్రభుత్వంపై నమ్మకం పెరిగింది. ఎవరు ఎంత పెద్దవాళ్లయినా.. నాలాపై కట్టుకున్న నిర్మాణాలను వదిలిపెట్టరన్న నమ్మకాన్ని కలిగించింది.
వరదల సమస్యకు ఇది శాశ్వత పరిష్కరమా?
ప్రస్తుతం ఆక్రమణలు తొలగించడంతో సమస్య తగ్గినట్లే ఉన్నా, ఇది శాశ్వత పరిష్కారమా? అన్న ప్రశ్న ఇంకా మిగిలే ఉంది. ఎందుకంటే నగరంలోని అనేక ప్రాంతాల్లో నాలాలపై ఇలాంటి నిర్మాణాలు కట్టబడి ఉన్నాయి. ఒకవేళ అక్కడ కూడా ఇలాంటి చర్యలు చేపడితేనే నిజమైన పరిష్కారం లభిస్తుంది. లేకపోతే వర్షకాలంలో ముంపు సమస్య మళ్లీ మళ్లీ ఎదురవుతూనే ఉంటుంది.
ఏవీబీపురంలో నాలా ఆక్రమణలు తొలగించడం వల్ల మూడు పెద్ద కాలనీలు ఊపిరి పీల్చుకున్నాయి. ఇక భవిష్యత్తులో ఇలాంటి ఆక్రమణలు లేకుండా చూడటం, ప్రజలు కూడా చట్టాన్ని గౌరవించడం అవసరం. ఆక్రమణలే ముంపు సమస్యకు మూల కారణమని మరోసారి ఈ ఘటన చూపించింది. ప్రజల సౌకర్యం కోసం తీసుకున్న ఈ నిర్ణయం నిజంగా అభినందనీయమని చెప్పక తప్పదు.
Share
Lice remove tips:పేలు, చుండ్రులతో ఇబ్బంది పెడుతున్నారా? అమ్మమ్మల కాలంనాటి టిప్స్ ప్రయత్నించి చూడండి
OTT Movie : చచ్చే ముందు ఇదేం పిచ్చి కోరిక మావా ? అక్కడక్కడా ఆ సీన్స్ కూడా... ఊహించని క్లైమాక్స్
