మలక్‌పేటలో విషాదం.. యువతికి వీడియో కాల్ చేసి.. కానిస్టేబుల్ ఆత్మహత్య!

Constable Suicide: హైదరాబాద్‌ మలక్‌పేట పోలీస్ స్టేషన్ పరిధిలోని ముసారాంబాగ్‌ శాలివాహననగర్‌లో ఒక విషాద సంఘటన చోటుచేసుకుంది. అంబర్‌పేట పోలీస్ హెడ్‌క్వార్టర్స్‌లో రైటర్‌గా విధులు నిర్వహిస్తున్న కానిస్టేబుల్ చంద్రశేఖర్ (35) తన ఇంట్లో ఉరివేసుకుని ఆత్మహత్యకు పాల్పడ్డాడు. ఈ ఘటన స్థానికంగా తీవ్ర కలకలం రేపింది.

యువతికి వీడియో కాల్..

పోలీసుల ప్రాథమిక సమాచారం ప్రకారం.. ఆదివారం అర్ధరాత్రి సమయంలో చంద్రశేఖర్ ఒక యువతికి వీడియో కాల్ చేశాడు. మాటల మధ్యలో తానూ ఉరివేసుకుంటున్నట్లు ఆ వీడియో కాల్‌లోనే ప్రత్యక్షంగా చూపిస్తూ ప్రాణాలు తీసుకునేందుకు సిద్ధమయ్యాడు. దీంతో తీవ్ర భయాందోళనకు గురైన ఆ యువతి వెంటనే అప్రమత్తమై చైతన్యపురి పోలీసులకు సమాచారం అందించింది.

కేసు నమోదు..

విషయం తెలుసుకున్న పోలీసులు వెంటనే ఘటనా స్థలానికి చేరుకున్నప్పటికీ, అప్పటికే చంద్రశేఖర్ మృతిచెందాడు. అనంతరం మృతదేహాన్ని స్వాధీనం చేసుకుని, పోస్టుమార్టం నిమిత్తం ఉస్మానియా ఆస్పత్రి మార్చురీకి తరలించారు. చంద్రశేఖర్ ఈ తీవ్ర నిర్ణయం తీసుకోవడానికి వెనుక ఉన్న అసలు కారణాలేమిటన్న కోణంలో చైతన్యపురి, మలక్‌పేట పోలీసులు కేసు నమోదు చేసుకుని దర్యాప్తు వేగవంతం చేశారు.

Also Read: ఎర్రవెల్లి ఫామ్‌హౌస్ పరిసరాల్లో 388 ఎకరాల కబ్జాపై విచారణ జరపాలి: జనసేన