CM Revanth Reddy: ప్రజల జీవితాల్లో వెలుగులు నిండాలని ఆకాంక్షిస్తూ.. సీఎం రేవంత్ దీపావళి శుభాకాంక్షలు

CM Revanth Reddy: తెలంగాణ ముఖ్యమంత్రి రేవంత్ రెడ్డి రాష్ట్ర ప్రజలకు దీపావళి పండుగ శుభాకాంక్షలు తెలిపారు. అయితే గత రెండేళ్ల ప్రజా పాలనలో ప్రజల జీవితాల్లో చీకట్లు తొలగిపోయి, కొత్త వెలుగులు వచ్చాయని ఆయన అన్నారు. ప్రజా ప్రభుత్వం అన్ని వర్గాల సంక్షేమం, అభివృద్ధిని లక్ష్యంగా చేసుకుని, ప్రజల జీవన స్థితిగతులను మెరుగుపరుచే దిశగా పనిచేస్తోందని ఆయన పేర్కొన్నారు. దీపావళి, చెడుపై మంచి సాధించిన విజయానికి ప్రతీకగా జరుపుకునే పండుగ అని, ఈ వెలుగుల పండుగను రాష్ట్ర ప్రజలందరూ ఆనందోత్సాహాలతో జరుపుకోవాలని ఆయన కోరారు.

ముఖ్యమంత్రి తన సందేశంలో, దీపాల కాంతులతో ప్రతి ఇంట సుఖ సంతోషాలు వెల్లి విరియాలని ఆకాంక్షించారు. అంతేకాక, పర్యావరణానికి హాని కలిగించకుండా, చిన్నా పెద్దా అందరూ ఈ పండుగను ఆనందంగా జరుపుకోవాలని అన్నారు. ప్రమాదాలను నివారించేందుకు తగిన జాగ్రత్తలు తీసుకోవాలని ఆయన ప్రజలను కోరారు. దీపావళి సందర్భంగా బాణసంచా వాడకంలో జాగ్రత్తలు పాటించాలని, పర్యావరణ సమతుల్యతను కాపాడేందుకు గ్రీన్ క్రాకర్స్ వంటి పర్యావరణ హితమైన ఎంపికలను ఎంచుకోవాలని ఆయన సూచించారు.

Also Read: భారీ చోరీ.. పట్ట పగలే కోట్లు విలువ చేసే నగలు మాయం..

తెలంగాణ ప్రభుత్వం గత రెండేళ్లలో అనేక సంక్షేమ పథకాలు, అభివృద్ధి కార్యక్రమాల ద్వారా ప్రజల జీవన నాణ్యతను మెరుగుపరుచేందుకు కృషి చేస్తోందని సీఎం రేవంత్ రెడ్డి తెలిపారు. ఈ పండుగ సందర్భంగా, సమాజంలో ఐక్యత, సామరస్యం, సంతోషాలు నిండాలని ఆయన ఆకాంక్షించారు. దీపావళి వెలుగులు ప్రతి ఒక్కరి జీవితంలో సానుకూల మార్పులను తీసుకురావాలని, రాష్ట్రం మరింత అభివృద్ధి పథంలో పురోగమించాలని ఆయన ఆశాభావం వ్యక్తం చేశారు.