Blood Falls| తెల్లని మంచుతో నిండిన పర్వతాల్లో ఒక్కసారిగా ఎర్రటి నీరు ప్రవహిస్తే ఎలా ఉంటుంది? చూడటానికి అది రక్తంలానే కనిపిస్తుంది.
ఈ వింత దృశ్యాన్ని బ్లడ్ ఫాల్స్ అని పిలుస్తారు. ఈ ఎరుపు రంగు వెనుక దాగి ఉన్న సైంటిఫిక్ కారణం మరింత ఆసక్తికరంగా ఉంటుంది.
బ్లడ్ ఫాల్స్ అంటార్కిటికాలోని టేలర్ గ్లేసియర్ ప్రాంతంలో కనిపిస్తుంది. ఇది మెక్మర్డో డ్రై వ్యాలీస్ ప్రాంతంలో ఉంది. ఆస్ట్రేలియా భూవిజ్ఞాన శాస్త్రవేత్త థామస్ గ్రిఫిత్ టేలర్ దీన్ని 1911లో గుర్తించారు. ఈ ప్రదేశం లేక్ బోనీ సమీపంలో ఉంటుంది. తెల్లటి మంచు మధ్య ఎర్రటి నీరు కనిపించడం వల్ల ఇది ప్రత్యేకంగా కనిపిస్తుంది. అందుకే ప్రపంచంలోని అత్యంత విచిత్రమైన సహజ అద్భుతాల్లో ఇది ఒకటిగా నిలిచింది.
బ్లడ్ ఫాల్స్లో అసలు రక్తం ఉండదు. దాని ఎరుపు రంగుకు ప్రధాన కారణం ఐరన్ అధికంగా ఉన్న నీరు. ఈ నీళ్లు.. టేలర్ గ్లేసియర్ కింద చాలా కాలంగా చిక్కుకుని ఉంది. అక్కడ సూర్యరశ్మి, ఆక్సిజన్ చాలా తక్కువగా ఉంటాయి. ఈ నీటిలో ఉప్పు, ఇతర ఖనిజాలు కూడా అధికంగా ఉంటాయి. అందువల్ల అత్యంత చల్లని పరిస్థితుల్లో కూడా నీరు ద్రవరూపంలో ఉంటుంది. ఈ నీటి ఉష్ణోగ్రత సుమారు మైనస్ 5.2 డిగ్రీల సెల్సియస్ వరకు ఉంటుంది.
Also Read: రాత్రివేళ లాంగ్ డ్రైవ్ చేస్తున్నారా? ఈ జాగ్రత్తలు తప్పక పాటించండి
గ్లేసియర్లోని పగుళ్ల ద్వారా ఈ నీరు బయటకు వచ్చినప్పుడు ఆక్సిజన్ను కలుస్తుంది. అప్పుడు నీళ్లలోని ఐరన్.. ఆక్సిజన్తో రియాక్షన్ జరిగి ఆక్సీడేషన్కు గురవుతుంది. దీంతో ఐరన్కు సంబంధించిన కాంపౌండ్స్ ఏర్పడి నీటికి ఎరుపు రంగు వస్తుంది. నీళ్లలోని సూక్ష్మంగా ఉండే ఐరన్ కణాలు కూడా ఈ రంగుకు కారణమవుతాయి. ఐరన్, ఆక్సిజన్, ఉప్పు, మంచు కలిసి ఈ అద్భుతమైన దృశ్యాన్ని సృష్టిస్తాయి.
Also Read: హోటల్ గదిలో చెక్ ఇన్ చేశాక ఈ 5 విషయాలు తప్పకుండా చెక్ చేయాలి.. లేకపోతే ప్రమాదకరం
బ్లడ్ ఫాల్స్లో మరో ఆశ్చర్యకరమైన విషయం కూడా ఉంది. చీకటి, ఉప్పగా ఉండే నీటిలో సూక్ష్మజీవులు జీవిస్తున్నట్లు శాస్త్రవేత్తలు గుర్తించారు.
వీటికి సూర్యరశ్మి, ఆక్సిజన్ చాలా తక్కువగా లభిస్తాయి. ఇలాంటి జీవులపై పరిశోధనలు తీవ్రమైన పరిస్థితుల్లో జీవం ఎలా కొనసాగుతుందో తెలుసుకోవడానికి సహాయపడతాయి. ఇలాంటి పరిశోధనలు ఇతర గ్రహాల్లో జీవం సాధ్యమా అనే అధ్యయనాలకు కూడా ఉపయోగపడవచ్చు.
బ్లడ్ ఫాల్స్ను సందర్శించడం సాధ్యమే, కానీ అక్కడికి చేరుకోవడం చాలా కష్టం. అంటార్కిటికాకు ప్రయాణమే ఖరీదైనది, చాలా ప్లానింగ్ చేయాల్సి ఉంటుంది. సాధారణ అంటార్కిటిక్ క్రూయిజ్లు ఎక్కువగా ఈ ప్రాంతానికి వెళ్లవు. కొన్ని ప్రత్యేక టూర్లు ‘రాస్ సీ’ ప్రాంతానికి చేరుకునే అవకాశం కల్పిస్తాయి. కొన్ని ప్రత్యేక కార్యక్రమాలు టేలర్ గ్లేసియర్ సమీపానికి విమాన ప్రయాణాలను కూడా అందిస్తాయి. అయితే వాతావరణం, అనుమతులు, ప్రయాణ పరిస్థితులు ఈ అవకాశాలను ప్రభావితం చేస్తాయి.
Share
రాహుల్ కాదు కదా.. ఆయన జేజమ్మ వచ్చినా మోడీని ఏమీ చేయలేరు: ఈటల రాజేందర్
ఎమ్మెల్సీ బరిలో ఆ ఇద్దరు నేతలు.. రేవంత్ రెడ్డి మార్క్ మాస్టర్ ప్లాన్!
