పరందూర్ ఎయిర్‌పోర్ట్ రద్దు.. విజయ్ నిర్ణయం సరైనదేనా? ఎందుకీ నిర్ణయం?

Parandur Airport Cancelled: తమిళనాడులో చెన్నై సెకెండ్ ఎయిర్ పోర్టు వ్యవహారం మళ్లీ హాట్‌ టాపిక్‌గా మారింది. పరందూర్‌ లో ప్రతిపాదించిన గ్రీన్‌ఫీల్డ్ ఎయిర్‌పోర్ట్ ప్రాజెక్టును రద్దు చేయడంతో కొత్త చర్చ మొదలైంది. ముఖ్యమంత్రి విజయ్ తీసుకున్న ఈ నిర్ణయం సరైందా? లేక చెన్నై భవిష్యత్ అభివృద్ధికి ఇది నష్టమా? అనే ప్రశ్నలు తెరపైకి వచ్చాయి.

చెన్నైకి రెండో విమానాశ్రయం అవసరం లేదా?

ప్రస్తుతం ఉన్న చెన్నై అంతర్జాతీయ విమానాశ్రయం రద్దీని ఎదుర్కొంటున్నట్లు పెద్దగా గణాంకాలు లేవు. ప్రస్తుతం ఉన్న టెర్మినళ్లతో పాటు విస్తరణ పనులు కొనసాగుతూనే ఉన్నాయి. టెర్మినల్-3 అభివృద్ధి పూర్తయితే సామర్థ్యం మరింత పెరిగే అవకాశం ఉంటుంది. భవిష్యత్‌లో ఐదో టెర్మినల్ నిర్మాణం కూడా ప్రతిపాదనలో ఉంది. అయితే, ప్రస్తుత అవసరాల కంటే దీర్ఘకాలిక అవసరాలు ఆందోళన కలిగిస్తున్నాయి. ప్రయాణికుల సంఖ్యతో పాటు చెన్నై పారిశ్రామిక రంగం కూడా వేగంగా విస్తరిస్తోంది. ఆటోమొబైల్, ఎలక్ట్రానిక్స్, హెవీ ఇంజినీరింగ్ రంగాలకు ఎయిర్ కార్గో సదుపాయాలు కీలకం కానున్నాయి. అందుకే రెండో విమానాశ్రయం భవిష్యత్‌ లో చెన్నై అభివృద్ధిలో కీలక పాత్ర పోషిస్తుందని పరిశ్రమ వర్గాలు భావిస్తున్నాయి.

పరందూర్ ప్రాజెక్టు రద్దు ఎందుకు?

చెన్నైకి సుమారు 70 కిలోమీటర్ల దూరంలోని పరందూర్‌ ను రెండో విమానాశ్రయానికి ఎంపిక చేశారు. అయితే, ఈ ప్రాజెక్టుకు మొదటి నుంచే గ్రామస్థులు, రైతుల నుంచి వ్యతిరేకత వ్యక్తమైంది. విమానాశ్రయం కోసం భారీ స్థాయిలో భూసేకరణ జరగడం, గ్రామాల ప్రజలు నిర్వాసితులు కావడం, వ్యవసాయ భూములు, చెరువులు ప్రభావితమయ్యే అవకాశం ఉండటంతో ఆందోళనలు మొదలయ్యాయి. ఈ కారణాలతో పరందూర్ ప్రాజెక్టును రద్దు చేస్తామని విజయ్ ప్రభుత్వం ప్రకటించింది. అయితే, రెండో విమానాశ్రయం ప్రణాళికను పూర్తిగా వదిలేసినట్లు కాదని, ప్రత్యామ్నాయ స్థలాన్ని ఎంపిక చేస్తామని ప్రభుత్వం స్పష్టం చేసింది.

భారీ ప్రాజెక్టు.. కొత్త సమస్యలు!

పరందూర్‌లో 13 గ్రామాల పరిధిలో 5,746 ఎకరాల్లో విమానాశ్రయం నిర్మించాలని ప్రణాళిక రూపొందించారు. ఈ ప్రాజెక్టును రూ.29,144 కోట్ల వ్యయంతో నాలుగు దశల్లో అభివృద్ధి చేయాలని భావించారు. ఎయిర్ ఫ్రైట్ విలేజ్, కొత్త రోడ్డు మార్గాలు, మెట్రో కనెక్టివిటీ వంటి సదుపాయాలు కూడా ఇందులో భాగంగా ఉన్నాయి. కానీ ఇప్పుడు ఈ ప్రాజెక్టు రద్దవడంతో మళ్లీ ప్రత్యామ్నాయ స్థలం కోసం వెతకాల్సిన పరిస్థితి ఏర్పడింది. అదే చెన్నై భవిష్యత్ విమానాశ్రయ ప్రణాళికకు ప్రధాన సవాలుగా మారింది.

భవిష్యత్ అవసరాలకు రెండో ఎయిర్‌పోర్ట్!

పరందూర్‌లో ప్రతిపాదించిన విమానాశ్రయం ఏటా 10 కోట్ల మంది ప్రయాణికులను నిర్వహించే స్థాయిలో అభివృద్ధి చేయాలని లక్ష్యంగా పెట్టుకున్నారు. అంటే ఇది కేవలం ప్రస్తుత రద్దీకి పరిష్కారంగా కాకుండా, చెన్నై భవిష్యత్ అవసరాలను దృష్టిలో పెట్టుకుని రూపొందించిన ప్రాజెక్టు. పరందూర్ ప్రాజెక్టును రద్దు చేసిన తర్వాత ప్రభుత్వం ఎంత త్వరగా కొత్త స్థలాన్ని గుర్తిస్తుందనేది ముందున్న ప్రశ్న. ఎందుకంటే, చెన్నైకి ప్రస్తుతం కొంత సమయం ఉన్నప్పటికీ, విమానాశ్రయ ప్రాజెక్టుల అమలులో ఆలస్యం జరిగితే భవిష్యత్‌ లో పెద్ద సమస్యగా మారే అవకాశం ఉంటుంది.