రైలు ప్రయాణంలో ఫ్యామిలీకి వేర్వేరు సీట్లు వచ్చాయా? ఇదిగో ముందుగానే ఇలా మార్చుకోండి

Coseat Train Seat Exchange| కుటుంబం లేదా స్నేహితులతో కలిసి రైలు ప్రయాణం చేయాలని టికెట్లు బుక్ చేసుకున్నారు. కానీ రిజర్వేషన్ తర్వాత చూస్తే ఒకరి సీటు ఒక కోచ్‌లో, మరొకరి సీటు ఇంకో కోచ్‌లో ఉంటుంది. దీంతో ప్రయాణం మొదలయ్యాక సీట్లు మార్చుకునేందుకు ఇతర ప్రయాణికులను అడగాల్సి వస్తుంది. కొన్నిసార్లు వారు అంగీకరించకపోవచ్చు. ఈ సమస్యకు డిజిటల్ పరిష్కారం ఆలోచించింది 13 ఏళ్ల అమ్మాయి. ఆమె ఆలోచనతో రూపొందించిన ఒక ప్లాట్ ఫామ్ ప్రయాణికులకు ముందుగానే సీట్లు మార్చుకునే అవకాశం కల్పించేందుకు ప్రయత్నిస్తుంది.

ప్రయాణికులకు సీట్లు మార్చుకునే అవకాశాన్ని కల్పించే CoSeat

CoSeat రైలు ప్రయాణికులు ముందుగానే సీట్లు మార్చుకునేందుకు సహాయపడే ప్లాట్‌ఫామ్‌గా పనిచేస్తుంది. ప్రయాణికులు తమ రైలులో సీటు మార్చుకోవడానికి సిద్ధంగా ఉన్న ఇతర ప్రయాణికులను వెతకవచ్చు. ఈ ప్లాట్‌ఫామ్‌లో ప్రయాణికులు తమ PNR వివరాలను ధృవీకరించాలి. ఆ తర్వాత తమకు కావాల్సిన సీటింగ్ ఆప్షన్లను ఎంచుకోవచ్చు. కుటుంబ సభ్యులతో కలిసి కూర్చోవాలనుకుంటే ఆ అవసరాన్ని కూడా నమోదు చేసుకునే వీలుంది. తల్లిదండ్రులు లేదా వృద్ధులకు లోయర్ బెర్త్ కావాలంటే ఆ ఎంపికను కూడా ఇందులో ఉంది. విండో సీటు లేదా ఎక్కువ లెగ్‌రూమ్ వంటి అవసరాలను కూడా తెలియజేయవచ్చు.

PNR ధృవీకరణ తర్వాత కావాల్సిన సీటు కోసం వెతకాలి

ముందుగా ప్రయాణికులు తమ రైలు PNR నంబర్‌ను నమోదు చేయాలి. ప్లాట్‌ఫామ్ ఆ బుకింగ్ వివరాలను ధృవీకరిస్తుంది. తర్వాత ప్రయాణికులు తమకు కావాల్సిన సీటింగ్ విధానాన్ని ఎంచుకోవచ్చు. అదే రైలు లేదా కోచ్‌లో సీటు మార్చుకోవడానికి సిద్ధంగా ఉన్నవారిని వెతకాలి. ఇలా ప్రయాణికులు రైలు ఎక్కకముందే సీటు మార్పు గురించి మాట్లాడుకోవచ్చు.

ఇద్దరూ అంగీకరించిన తర్వాత సీట్లు మార్చుకోవచ్చు

సీటు మార్పు కోసం ఇద్దరు ప్రయాణికులు పరస్పరం అంగీకరించాలి. ఇద్దరి అవసరాలు సరిపోతే సీట్లు మార్చుకునే అవకాశం ఉంటుంది. దీంతో రైలు ఎక్కిన తర్వాత అపరిచితులను సీటు మార్చమని అడగాల్సిన అవసరం తగ్గుతుంది. కుటుంబాలు, స్నేహితుల బృందాలు ఈ విధానాన్ని ఉపయోగించుకోవచ్చు. తల్లిదండ్రులతో ప్రయాణించే వారికి కూడా ఇది ఉపయోగపడే అవకాశం ఉంది.

Also Read: 31 ఏళ్ల క్రితం రూ.100 లంచం తీసుకున్న ఉద్యోగికి ఇప్పుడు జైలు శిక్ష.. కోర్టు విచిత్ర తీర్పు

రైలు ప్రయాణ సమస్య నుంచి వచ్చిన ఆలోచన

13 ఏళ్ల శిరీన్ కల్రా అనే అమ్మాయి తన కుటుంబంతో ప్రయాణిస్తున్నప్పుడు ఎదురైన ప్రయాణ సమస్య వల్లే ఈ ఐడియా రావడానికి కారణం. కుటుంబ సభ్యులు కలిసి ప్రయాణించినా, వారికి ఒకే చోట సీట్లు దొరకలేదు. ఈ అనుభవం ఆమెను సమస్యకు సాంకేతిక పరిష్కారం గురించి ఆలోచించేలా చేసింది. ఆ ఆలోచనే CoSeat రూపకల్పనకు దారితీసింది.
సాధారణ ప్రయాణ సమస్యకు టెక్నాలజీ ద్వారా పరిష్కారం చూపించవచ్చని ఈ ప్రయత్నం చెబుతోంది. భవిష్యత్తులో ఇలాంటి ప్లాట్‌ఫామ్‌లు రైలు ప్రయాణాలను మరింత సౌకర్యవంతంగా మార్చే అవకాశం ఉంది.

Also Read: ఆఫీస్ పాలిటిక్స్‌తో మీ మానసిక ఆరోగ్యం దెబ్బతింటోందా? స్ట్రెస్ తగ్గించుకోవడానికి సింపుల్ టిప్స్