Solo Travel Tips: సోలో ట్రిప్.. అంటే నచ్చిన ప్రదేశాలకు ఒంటరిగా ప్రయాణం చేయడం. ఈ మాట వినడానికే చాలా ఆత్రుతగా, కొత్తగా అనిపిస్తుంది. మనకు తోచినట్లు, మనకిష్టమైన ప్రదేశాలకు ఎవరి ప్రమేయం లేకుండా వెళ్లడం ఒక గొప్ప అనుభవం. అయితే మొదటిసారి ఒంటరిగా ప్రయాణం చేసేటప్పుడు ఎంత ఆనందం ఉంటుందో.. మనసులో అంతే భయం, కంగారు కూడా ఉంటాయి. అయితే సరైన ప్రణాళిక, కొన్ని చిన్న చిన్న జాగ్రత్తలు తీసుకుంటే.. మీ మొదటి సోలో ప్రయాణం జీవితాంతం గుర్తుండిపోయే ఒక అందమైన జ్ఞాపకంగా మారుతుంది.
సోలో ట్రిప్ అనగానే ఏదో ఒకరోజు హఠాత్తుగా బ్యాగ్ సర్దుకుని బయలుదేరిపోవడం సినిమాలోనే బాగుంటుంది. నిజ జీవితంలో అలా చేస్తే ఇబ్బందులు పడాల్సి వస్తుంది. మీరు వెళ్లాలనుకుంటున్న ప్రదేశం గురించి ముందుగానే పూర్తిగా తెలుసుకోవాలి. అక్కడ వాతావరణం ఎలా ఉంది? చూడాల్సిన ప్రాంతాలు ఏమిటి? రవాణా సౌకర్యాలు ఎలా ఉన్నాయో.. ముందుగానే ఒక అవగాహనకు రావాలి. అలాగే మీరు ఉండేందుకు సురక్షితమైన హోటల్ లేదా హోమ్‌స్టేని అప్పటికే బుక్ చేసుకోవడం చాలా మంచిది. చివరి నిమిషంలో వసతి కోసం వెతుక్కోవడం వల్ల సమయం దండగవ్వడమే కాకుండా భయం కూడా పెరుగుతుంది.
మీరు ఒంటరిగా ప్రయాణిస్తున్నప్పుడు మీ భద్రతకు మీరే బాధ్యత వహించాలి. అందుకే మీరు వెళ్తున్న ప్రదేశం, అక్కడ మీరు ఉండే హోటల్ చిరునామా, మీ ప్రయాణ ప్రణాళిక గురించి ఇంట్లో వాళ్లకు లేదా అత్యంత సన్నిహిత మిత్రులకు ఖచ్చితంగా చెప్పాలి. రోజూ ప్రయాణంలో ఉన్నప్పుడు మీ వివరాలను, మీరు ఎక్కడ ఉన్నారనే విషయాలను ఎప్పటికప్పుడు వాళ్లకు ఫోన్ చేసి లేదా మెసేజ్ ద్వారా తెలియజేస్తూ ఉండటం చాలా అవసరం. దీంతో మీకు ఏ చిన్న ఇబ్బంది వచ్చినా సహాయం చేయడానికి వారికి ఒక మార్గం ఉంటుంది.
Also Read: 1000 కోట్ల వజ్రాన్ని పేపర్ వెయిట్‌గా వాడిన నిజాం.. ప్రపంచంలోనే నెం.1 ధనవంతుడు ఎలా అయ్యాడు?
ప్రయాణంలో డబ్బులు చాలా కీలకమైనవి. అందుకే మొత్తం డబ్బును ఒకే చోట లేదా ఒకే జేబులో పెట్టుకోకూడదు. కొంత నగదును వాలెట్‌లో, మరికొంత బ్యాగులోని వేర్వేరు జేబుల్లో దాచుకోవాలి. డిజిటల్ పేమెంట్స్ అందుబాటులో ఉన్నప్పటికీ.. దూరప్రాంతాల్లో లేదా సిగ్నల్స్ లేనిచోట క్యాష్ చాలా అవసరమవుతుంది. అలాగే మీ ఆధార్ కార్డు లేదా పాస్‌పోర్ట్ వంటి ముఖ్యమైన గుర్తించే కార్డులను భద్రంగా ఉంచుకోవాలి. వాటి జిరాక్స్ ప్రతులను, ఫోన్‌లో సాఫ్ట్ కాపీలను కూడా సిద్ధంగా ఉంచుకోవడం ఎంతో మంచిది.
కొత్త ప్రదేశాలకు వెళ్లినప్పుడు అక్కడ ఆహారం, నీరు మన శరీరానికి త్వరగా అలవాటు పడవు. అందుకే వీలైనంత వరకు శుభ్రమైన నీటిని, వేడిగా ఉండే తాజా ఆహారాన్ని మాత్రమే తీసుకోవడానికి ప్రయత్నించాలి. వీధి పక్కన దొరికే ఆహారాన్ని ఎక్కువగా తినకపోవడమే మంచిది. ప్రయాణంలో మీతో పాటు ఒక చిన్న మెడికల్ కిట్ ఉంచుకోవడం మరచిపోవద్దు. అందులో జ్వరం, తలనొప్పి, కడుపునొప్పి, వాంతులు, చిన్న గాయాలకు సంబంధించిన అవసరమైన మందులు ఉండేలా చూసుకోవాలి. ప్రయాణంలో ఆరోగ్యం బాగుంటేనే మనం పర్యటనను పూర్తిగా ఆస్వాదించగలం.
మనం వెళ్లే కొత్త ప్రదేశంలో మనుషులు, వారి సంస్కృతి కొత్తగా ఉంటాయి. అందరినీ గుడ్డిగా నమ్మడం మంచిది కాదు. ఎవరైనా అతిగా చొరవ చూపిస్తే కొంచెం దూరంగా ఉండటమే శ్రేయస్కరం. స్థానికులతో గౌరవంగా మాట్లాడుతూనే.. మీ వ్యక్తిగత వివరాలను పరిచయం లేని వారితో పంచుకోకుండా ఉండాలి. అలాగే రాత్రి వేళల్లో ఒంటరిగా నిర్మానుష్యమైన ప్రాంతాల్లో తిరగకపోవడం చాలా మంచిది. మీ ఆత్మవిశ్వాసమే మీ అతిపెద్ద రక్షణ అని గుర్తుంచుకోవాలి. ఏ పరిస్థితిలోనైనా ధైర్యంగా, అప్రమత్తంగా ఉంటే మీ మొదటి సోలో ట్రిప్ అత్యంత సురక్షితంగా, సంతోషంగా ముగుస్తుంది.
Also Read: అసలైన ‘హైదరాబాదీ మటన్ దమ్ బిర్యానీ’ రుచి చూడాలంటే.. పాతబస్తీలో ఈ 5 చోట్లకు వెళ్లాల్సిందే!
Share
మరో ఖరీదైన ఇల్లు కొన్న విరుష్క...ధర వింటే కళ్లు తిరగాల్సిందే..!
అడుగడుగునా అవమానాలే...వాళ్ల టార్చర్ భరించలేకనే అజింక్య రహానే రిటైర్మెంట్
