Holiday vs Wellness Trip: నేటి ఉరుకుల పరుగుల జీవితంలో పని, ట్రాఫిక్, ఫోన్ కాల్స్, డెడ్లైన్లతో రోజులు ఎప్పుడు గడిచిపోతున్నాయో కూడా తెలియదు. అందుకే ఈ రొటీన్కు కాస్త దూరంగా వెళ్లి, మనసుకు నచ్చిన ప్రదేశంలో కొన్ని రోజులు ప్రశాంతంగా గడపాలని చాలామందికి అనిపిస్తుంటుంది. సాధారణ హాలీడే అంటే కొత్త ప్రదేశాలు చూడటం, రుచికరమైన ఫుడ్ ఆస్వాదించడం, షాపింగ్, ఫొటోలు, సరదాతో సమయం గడపడం. కానీ వెల్నెస్ ట్రిప్ ఉద్దేశం కాస్త భిన్నం. ప్రయాణంతో పాటు మనసుకు, శరీరానికి విశ్రాంతి ఇవ్వడం, రోజువారీ ఒత్తిడి నుంచి కాస్త బయటపడటమే ఇందులో ప్రధాన లక్ష్యం. రెండూ ప్రయాణాలే అయినా.. మనం అక్కడికి వెళ్లి ఏం పొందాలనుకుంటున్నామన్నదే వాటి మధ్య అసలు తేడా.
సాధారణ హాలీడే అంటే ఎక్కువగా మనకు నచ్చిన ప్రదేశాన్ని ఎంచుకుని, అక్కడి ముఖ్యమైన ప్రాంతాలు చూసి, నచ్చిన పనులు చేసుకుని తిరిగి రావడం. ఉదా: ఒక కొండ ప్రాంతానికి వెళ్లి వ్యూ పాయింట్లు చూడటం, స్థానిక వంటకాలు తినడం, మార్కెట్లో షాపింగ్ చేయడం వంటివి ఇందులో భాగం. ఇక్కడ లక్ష్యం కొత్త అనుభవాలు, వినోదం, కుటుంబం లేదా స్నేహితులతో గడిపే సమయం కావచ్చు. విశ్రాంతి దొరికినా, మొత్తం ట్రిప్ దాని చుట్టూ తిరగాల్సిన అవసరం లేదు.
Also Read: ఫోన్లు, ల్యాప్టాప్ల నుంచి టీవీల వరకు.. Flipkart Big Billion Days డేట్స్ వచ్చేశాయోచ్!
వెల్నెస్ ట్రిప్లో గమ్యస్థానం కంటే మన ఆరోగ్యం, ప్రశాంతతకు ఇచ్చే ప్రాధాన్యం ఎక్కువ. గ్లోబల్ వెల్నెస్ ఇన్స్టిట్యూట్ ప్రకారం.. వ్యక్తిగత శ్రేయస్సును కాపాడుకోవడం లేదా మెరుగుపరుచుకోవాలనే ఉద్దేశంతో చేసే ప్రయాణమే వెల్నెస్ టూరిజం. యోగా, ధ్యానం, ప్రకృతిలో నడక, ఆరోగ్యకరమైన ఆహారం, స్పా వంటి అనుభవాలు ఇందులో ఉండొచ్చు.
సాధారణ ట్రిప్లో ఒక రోజులో ఎక్కువ ప్రదేశాలు కవర్ చేయాలనే ఆలోచన ఉంటుంది. వెల్నెస్ ట్రిప్లో మాత్రం ఖాళీ సమయానికీ విలువ ఉంటుంది. ఉదయం ప్రశాంతంగా నడవడం, కొంతసేపు ఫోన్ పక్కన పెట్టడం, ధ్యానం చేయడం లేదా ప్రకృతిలో కూర్చోవడం లాంటి పనులకు చోటు ఉంటుంది. భారత ప్రభుత్వ పర్యాటక వెబ్సైట్లో కూడా వెల్నెస్ కింద యోగా, ఆయుర్వేదం, ధ్యానం, నేచురోపతి వంటి అనుభవాలను ప్రత్యేకంగా చూపిస్తోంది.
ఇది పూర్తిగా మన ట్రిప్ ఉద్దేశంపై ఆధారపడి ఉంటుంది. కొత్త ప్రదేశాలు చూడాలి, సరదాగా తిరగాలి అనుకుంటే సాధారణ హాలీడే సరిపోతుంది. పని ఒత్తిడి నుంచి కాస్త దూరంగా ఉండాలి, నిద్ర, ఆహారం, రోజువారీ అలవాట్లపై దృష్టి పెట్టాలి అనిపిస్తే.. వెల్నెస్ ట్రిప్ ఉపయోగపడొచ్చు. ఒక సాధారణ హాలీడేలోనే ఆరోగ్యకరమైన ఆహారం, నడక లేదా యోగా చేర్చినా అది కొంతవరకు వెల్నెస్ ట్రిప్ అనుభవంగా మారుతుంది. అందుకే వెల్నెస్ ట్రిప్ అంటే ఖరీదైన రిసార్ట్లోనే ఉండాల్సిన అవసరం లేదు. ప్రశాంతమైన ఊరు, పచ్చని ప్రదేశం, నిద్ర, తక్కువ హడావుడి కూడా ఆ అనుభవాన్ని ఇవ్వగలవు. చివరికి గమ్యం కంటే.. తిరిగి ఇంటికి వచ్చేసరికి మనం ఎలా ఫీల్ అవుతున్నామన్నదే తేడా. అదే గుర్తుంచుకుంటే సరిపోతుంది.
Also Read: హైదరాబాద్ నుంచి వీకెండ్ ట్రిప్.. రూ.5,000లోపే వెళ్లొచ్చే 5 అద్భుతమైన ప్రదేశాలు!
Share
లాంగ్ డిస్టెన్స్ లవ్ స్టోరీ.. ప్రేమికులు మిస్ అవ్వకుండా చూడాల్సిన రొమాంటిక్ డ్రామా
భర్తను వదిలేసి బావ కొడుకుతో ఎఫైర్.. చివరకు ఏమైందంటే..
