Kazipet Railway Station New Look: చారిత్రక ప్రాధాన్యం ఉన్న కాజీపేట రైల్వే జంక్షన్ ఇప్పుడు సరికొత్త రూపాన్ని సంతరించుకుంది. అమృత్ భారత్ స్టేషన్ పథకంలో భాగంగా చేపట్టిన అభివృద్ధి పనులతో స్టేషన్ రూపురేఖలు పూర్తిగా మారిపోతున్నాయి. ప్రయాణికులకు మెరుగైన సౌకర్యాలు కల్పించడంతో పాటు, అత్యాధునిక అవసరాలకు అనుగుణంగా స్టేషన్ను తీర్చిదిద్దారు. ఇప్పటికే పలు పనులు పూర్తికాగా, మిగిలిన ఏర్పాట్లను కూడా అధికారులు పూర్తి చేస్తున్నారు.
కాజీపేట స్టేషన్ లోకి అడుగుపెట్టగానే కొత్తగా నిర్మించిన ఎంట్రెన్స్ ప్రాంతం ఆకట్టుకునేలా ఉంది. అత్యాధునిక డిజైన్ తో స్టేషన్ ముఖద్వారాన్ని తీర్చిదిద్దారు. ప్రయాణికుల రాకపోకలు సులభంగా ఉండేలా సర్క్యులేటింగ్ ఏరియా, పార్కింగ్ ప్రాంతాలను కూడా అభివృద్ధి చేస్తున్నారు. స్టేషన్కు వస్తున్న ప్రయాణికులకు మెరుగైన సౌకర్యాలు కల్పించేలా మౌలిక వసతులను కల్పిస్తున్నారు.
స్టేషన్లో వెయిటింగ్ హాళ్లను అద్భుతంగా తీర్చిదిద్దారు. లిఫ్టులు, ఎస్కలేటర్లు ఏర్పాటు చేయడంతో వృద్ధులు, దివ్యాంగులు, పిల్లలతో వచ్చే కుటుంబాలకు రాకపోకలు సులభం కానున్నాయి. 12 మీటర్ల వెడల్పుతో ఫుట్ ఓవర్ బ్రిడ్జి కూడా నిర్మించారు. ప్లాట్ ఫారాలపై సౌకర్యాలను మెరుగుపరచడంతో పాటు మరుగుదొడ్లు, ప్రయాణికుల సమాచార వ్యవస్థలు లాంటి వసతులకు కూడా ప్రాధాన్యం ఇచ్చారు. అమృత్ భారత్ స్టేషన్ పథకంలో భాగంగా సాధారణంగా ప్రయాణికుల సౌకర్యాలు, వేచి ఉండే ప్రదేశాలు, ఫుట్ ఓవర్ బ్రిడ్జిలు, యాక్సెసిబిలిటీ వంటి అంశాలపై దృష్టి పెడుతున్నట్లు రైల్వే శాఖ పేర్కొంది.
కాజీపేట స్టేషన్ అభివృద్ధి పనులకు సుమారు రూ.36 కోట్లు వెచ్చించినట్లు అధికారులు తెలిపారు. స్టేషన్ భవనం, పోర్చ్, ప్లాట్ ఫారాలు, ఏసీ వెయిటింగ్ హాల్, పార్కింగ్, సర్క్యులేటింగ్ ఏరియా లాంటి పనులు ప్రాజెక్టులో భాగంగా ఉన్నాయి. కాజీపేట స్టేషన్లో లిఫ్ట్, ఎస్కలేటర్, 12 మీటర్ల ఫుట్ ఓవర్ బ్రిడ్జి, ప్లాట్ఫాం షెల్టర్ లాంటి పలు పనులు ఇప్పటికే పూర్తయ్యాయి.
అభివృద్ధి పనులు పూర్తవుతున్న నేపథ్యంలో కొత్త రూపంలో కాజీపేట స్టేషన్ను ప్రయాణికులకు అందుబాటులోకి తీసుకురావడానికి ఏర్పాట్లు జరుగుతున్నాయి. ప్రధాని నరేంద్ర మోదీ చేతుల మీదుగా వర్చువల్ గా ప్రారంభం కానుంది. ఈ కార్యక్రమానికి అధికారులు సన్నాహాలు చేస్తున్నట్లు సమాచారం. దేశవ్యాప్తంగా అమృత్ భారత్ స్టేషన్ పథకంలో పునరాభివృద్ధి చేసిన స్టేషన్లను దశలవారీగా ప్రారంభిస్తున్నారు.
కాజీపేట జంక్షన్ నార్త్, సౌత్ రైల్వే మార్గాలకు కీలకమైన అనుసంధాన కేంద్రంగా ఉంది. ప్రస్తుతం మూడు ప్లాట్ఫారాలు ఉండగా, భవిష్యత్ అవసరాలను దృష్టిలో పెట్టుకుని మరో రెండు ప్లాట్ఫారాలు నిర్మించే దిశగా అధికారులు చర్యలు చేపట్టారు. నాలుగు, ఐదు నంబర్ ప్లాట్ఫారాలు అందుబాటులోకి వస్తే రైళ్ల రాకపోకలను మరింత సమర్థంగా నిర్వహించేందుకు అవకాశం ఉంటుంది. కొత్త సౌకర్యాలతో పాటు అదనపు ప్లాట్ఫారాలు కూడా అందుబాటులోకి వస్తే కాజీపేట స్టేషన్ మరింత కీలక రైల్వే కేంద్రంగా మారనుంది.
#Wow , Kazipet Railway Junction got a Major facelift under amrut bharat Scheme.#kazipet #warangal #telangana pic.twitter.com/BKkfZU6PTg
— Bharath Ramineni (@BharathRaminen1) September 9, 2026
Read Also:దసరా, దీపావళి ప్రయాణికులకు అదిరిపోయే న్యూస్.. చర్లపల్లి నుంచి 38 స్పెషల్ ట్రైన్లు!
Share
రియల్మీ నుంచి హ్యారీ పాటర్ లవర్స్కు స్పెషల్ గిఫ్ట్.. ఈ క్రేజీ లుక్కి ఎవరైనా ఫిదా అవ్వాల్సిందే!
SC/ST అట్రాసిటీ చట్టంపై సీఎం రేవంత్ సమీక్ష.. కీలక ఆదేశాలు జారీ!
