Pod taxi Hyderabad: హైదరాబాద్ లో గంటల తరబడి వాహనాల్లో కూర్చుని వెయిటింగ్ చేసే కంటే, స్మార్ట్‌ఫోన్‌లో బుకింగ్ వేసి, ఎక్కిన వెంటనే టెన్షన్ లేకుండా గమ్యానికి చేరే వ్యవస్థ ఒక్కసారి వచ్చేస్తే? ఇప్పుడు అదే జరుగబోతోంది. కేంద్ర మంత్రి నితిన్ గడ్కరీ ఇటీవల వెల్లడించిన ప్రకారం, భారత్‌లో పాడ్ టాక్సీల పరంపర మొదలుకాబోతోంది. ఇప్పటికే పలు దేశాల్లో విజయవంతంగా నడుస్తున్న ఈ వినూత్న రవాణా విధానాన్ని ఇప్పుడు మన నగరాల్లో కూడా ప్రవేశపెట్టాలని కేంద్రం ప్రణాళికలు సిద్ధం చేసింది.
పాడ్ టాక్సీలు అంటే ఇవేంటండి?
చిన్నపాటి కారు లాంటివి, కానీ డ్రైవర్ ఉండదు. ఇవి రోడ్డుపై కాకుండా ఎలివేటెడ్ ట్రాక్‌పై నడుస్తాయి. ముందే మార్గం ఫిక్స్ చేసినట్టు, మనం ఎక్కడికి వెళ్లాలో సెట్ చేస్తే సరిపోతుంది. మిగతాదంతా సాంకేతికమే చూసుకుంటుంది. ఈ పాడ్ టాక్సీలు ఒక్కోసారి 4 నుంచి 6 మందికి సరిపడేలా ఉంటాయి. దీన్ని పర్సనల్ రాపిడ్ ట్రాన్సిట్ అంటే PRT అని పిలుస్తారు. ప్రయాణికుడు పూర్తిగా ప్రైవేట్‌గా, శాంతిగా ప్రయాణించేందుకు వీలుగా ఉంటాయి. ఇవి పూర్తిగా విద్యుత్ ఆధారంగా నడుస్తాయి కాబట్టి, శబ్దం తక్కువ, కాలుష్యం లేదు.. ఒకింత మెట్రో ట్రైన్, ఒకింత వావ్ అనిపించే అనుభూతిని కలిగిస్తాయి.
ఇవి ఎలా పని చేస్తాయి?
ఓ మొబైల్ యాప్‌లో బుక్ చేస్తే చాలు. మీకు దగ్గరలోని స్టేషన్‌కు పాడ్ టాక్సీ వచ్చేస్తుంది. మీరు ఎక్కడికి వెళ్లాలో ఎంచుకుంటే, పాడ్ అటుగా వెళ్లే మార్గాన్ని తీసుకుని నేరుగా అక్కడికి తీసుకెళ్తుంది. ఆ మధ్య ఎవరూ ఎక్కరు, ఎవరూ దించరు. ప్రయాణం మొత్తం మీకే ప్రత్యేకం. ఇది ఓ ప్రైవేట్ క్యాబ్ లా ఉంటుంది గానీ, ట్రాఫిక్ లేదు, ఇంధన ఖర్చు లేదు.. అంతే కాదు, సమయాన్ని ఆదా చేస్తుంది.
ఎక్కడ మొదలవుతుందంటే..
ప్రస్తుతానికి ఢిల్లీ, బెంగళూరు వంటి మెట్రో నగరాల్లో ఇది ప్రయోగంగా అమలు చేయాలని ప్రభుత్వం చూస్తోంది. ఉదాహరణకు, బెంగళూరులోని ఎలక్ట్రానిక్ సిటీ నుంచి హెబ్బాల్ వరకు లేదా ఏరియా నుంచి ఎయిర్‌పోర్ట్ దాకా పాడ్ టాక్సీ రూట్ ఉండే అవకాశముంది. ఇది సాధారణ బస్సు లేదా క్యాబ్ కంటే కనీసం 50% వేగంగా ఉంటుంది. ట్రాఫిక్ అంతా క్రింద, మీ ప్రయాణం పైపైన.. ఇక అర్ధమవుతోంది కదా!
ఇవి మనకు ఎందుకు అవసరం?
రోజూ ఉద్యోగాలకు వెళ్లే వృద్ధులు, మహిళలు, విద్యార్థులు ట్రాఫిక్‌లో పడే తిప్పలు అంతా ఇంతా కావు. ఓ సాధారణ ప్రయాణానికి గంటల సమయం, పెట్రోల్ ఖర్చు, అటు ఒత్తిడి.. ఇవన్నీ పాడ్ టాక్సీ వల్ల తగ్గే అవకాశం ఉంది. ఇది కేవలం వేగం గురించే కాదు, భద్రత గురించి. ఇందులో GPS ట్రాకింగ్, ఎమర్జెన్సీ బటన్, ఆటోమేటిక్ బ్రేకింగ్ వంటి భద్రతా సదుపాయాలు ఉంటాయి.
Also Read: Hyperloop in Hyderabad: హైదరాబాద్ నుంచి విజయవాడకు కేవలం 20 నిమిషాల్లో? హైపర్‌లూప్ వచ్చేసింది!
పర్యావరణానికి కలిసివచ్చే ప్రయోజనం ఇదే
ఈ వాహనాలు పూర్తిగా ఎలక్ట్రిక్ మోడల్‌లో నడుస్తాయి. అంటే పెట్రోల్, డీజిల్ ఖర్చు ఉండదు. ఫ్యూయల్ కాలుష్యం తగ్గుతుంది. శబ్ద కాలుష్యం కూడా లేనట్టే. నగరాల్లో ఎక్కవ వాహనాల రాకపోకల వల్ల ఏర్పడే పొల్యూషన్ సమస్యలు తగ్గే అవకాశం ఉంది. ఇందులో ఉపయోగించే టెక్నాలజీ కూడా అత్యాధునికంగా ఉండటంతో, సాంకేతిక రంగానికి కూడా ఇది పెరిగే అవకాశాన్ని ఇస్తుంది.
ఉద్యోగాలు, అవకాశాలు ఏమిటంటే?
పాడ్ టాక్సీ ప్రాజెక్టుల నిర్మాణం, నిర్వహణ, ఆపరేషన్ కోసం ఇంజినీర్లు, సాంకేతిక నిపుణులు, సర్వీస్ స్టాఫ్ వంటి అనేక విభాగాల్లో ఉద్యోగ అవకాశాలు వస్తాయి. ఇది ప్రైవేట్ రంగానికి కూడా పెద్ద స్థాయిలో అవకాశాలు కల్పిస్తుంది. ఐటీ, ఎలక్ట్రికల్, ట్రాన్స్‌పోర్ట్ రంగాల్లో పని చేస్తున్న వారికి ఇది ఒక సరికొత్త మార్కెట్‌గా మారే అవకాశం ఉంది.
ఈ పద్ధతి విజయవంతం అయితే..
ఢిల్లీ, బెంగళూరు వంటి నగరాల్లో ఈ పాడ్ టాక్సీలు విజయవంతం అయితే, అనంతరం హైదరాబాద్, ముంబయి, విశాఖ వంటి మరిన్ని నగరాల్లో కూడా దీన్ని విస్తరించే అవకాశముంది. ప్రజల ఆదరణ, ప్రయోజనాన్ని బట్టి మరిన్ని మార్గాలు ఏర్పడతాయి. అలాగే, ఈ తరహా పద్ధతులు నగరాభివృద్ధికి దారితీయడమే కాదు, భారతదేశం ట్రాన్స్ పోర్ట్ రంగంలో మరో మెట్టు ఎక్కినట్టే.
ఇది కేవలం రవాణా మార్గం కాదు.. ఒక మార్పు ప్రారంభం!
పాడ్ టాక్సీలు అంటే కేవలం ఓ ప్రయాణ వాహనం కాదు.. ఇది ఒక జీవనశైలి మార్పు. త్వరగా, సురక్షితంగా, భద్రతగా ప్రయాణించాలనుకునే ప్రతి ఒక్కరికీ ఇది పరిష్కారం. ఇక రానున్న రోజుల్లో ట్రాఫిక్, కాలుష్యం, సమయనష్టం అన్నీ ఒక్కే సారి తగ్గించే శక్తి దీనికే ఉంది. సో, రేపటి ప్రయాణాలకు ఇది ఒక కొత్త దారి అని చెప్పవచ్చు.
Share
Ongole Politics : బాలినేనికి పవన్ ఇచ్చే పదవి ఇదేనా?
Gundeninda GudiGantalu Today episode: ప్రభావతికి షాకిచ్చిన బాలు.. మనోజ్, రోహిణికి దెబ్బ..మౌనికకు సంజయ్ గుడ్ న్యూస్..
