Secunderabad to Visakha train: రైలు టికెట్ ధరల పెంపు.. సికింద్రాబాద్ – విశాఖ రైళ్ల కొత్త ఛార్జీలు ఇవే

Secunderabad to Visakha train: రైలు ప్రయాణం అంటే చాలామందికి ఓ మధురమైన అనుభూతి. అలాంటి ప్రయాణాన్ని తక్కువ ఖర్చుతో చేయొచ్చని, టైమ్‌కు ఎక్కడికైనా చేరుకోవచ్చని చాలా మంది భావించడం కామన్. ప్రత్యేకించి సికింద్రాబాద్ నుంచి విశాఖపట్నం వరకూ తరచూ ప్రయాణించే విద్యార్థులు, ఉద్యోగులు, కుటుంబాలు ఎక్కువగా ఉంటారు. కానీ ఇప్పుడు పరిస్థితి కాస్త మార్చుకోవాల్సి ఉంటుంది. ఎందుకంటే జూలై 1 నుంచి రైలు టికెట్ ధరలు పెరగబోతున్నాయి. ఈ మార్పు చిన్నదే అయినా, తరచూ ప్రయాణించే వారికి ఖచ్చితంగా టికెట్ రేట్లు షాకివ్వనున్నాయి.

ఇప్పటి వరకు ఎలా?
ఇప్పటి వరకు సికింద్రాబాద్ నుంచి విశాఖపట్నం వరకూ దాదాపు 663 కిలోమీటర్ల ప్రయాణానికి జనరల్ టికెట్ ధర రూ.245 ఉండేది. స్లీపర్ క్లాస్ టికెట్ రూ.380. ఇక 3rd AC ధర రూ.1030 నుంచి 1080 వరకు ఉండేది. 2nd AC టికెట్ రూ.1470 నుంచి 1520 మధ్య ఉండేది. ఇక 1st AC టికెట్ మాత్రం రూ.2540 నుంచి 2565 వరకు ఉండేది. ఇవన్నీ చాలా కాలంగా స్థిరంగా ఉన్న ధరలే. కానీ ఇప్పుడు ఈ ధరలు పైపైకి వెళ్లనున్నాయి.

జూలై 1 నుండి.. ఈ ధరలే!
జూలై 1 నుంచి రైల్వే శాఖ నిర్ణయం ప్రకారం, ప్రీమియం తరగతులకు ప్రతి కిలోమీటరుకి 2 పైసల చొప్పున, నాన్-ఏసీ స్లీపర్ తరగతికి 1 పైసా చొప్పున, జనరల్ క్లాస్ ప్రయాణానికి 500 కిలోమీటర్లకు మించిన దూరాల్లో 0.5 పైసల చొప్పున టికెట్ ధరలు పెరుగనున్నాయి. ఈ లెక్కన చూస్తే.. సికింద్రాబాద్ నుంచి విశాఖ దూరం 663 కిలోమీటర్లకు వర్తించే ధరల మార్పు ఇలా ఉంటుంది.

జనరల్ టికెట్ రూ.245 నుంచి రూ.246 అవుతుంది. అంటే ఒక్క రూపాయి పెరిగినట్టే. స్లీపర్ క్లాస్ టికెట్ రూ.380 నుంచి రూ.387కి పెరుగుతుంది. ఇది పెద్ద మార్పే కాదు అనిపించినా, రోజూ ప్రయాణించే వారికి మాత్రం నెలకు అదనంగా రూ.200 వరకు పడే అవకాశం ఉంటుంది. ఇక 3rd AC టికెట్ ధర రూ.1043 వరకు పెరగనుంది. అలాగే 2nd AC టికెట్ రూ.1483 వరకూ వెళ్లనుంది. ఇక 1st AC ధర రూ.2553 వరకు పెరుగుతుంది. మొత్తంగా చూస్తే, ప్రతి తరగతిలో రూ.10 నుంచి రూ.15 మధ్య అదనపు ఖర్చు తప్పదు.

ఈ పెంపుని ఎందుకు చేస్తున్నారంటే, రైల్వే శాఖకి వచ్చే ఖర్చులు రోజురోజుకూ పెరుగుతున్నాయట. డీజిల్, విద్యుత్ ఖర్చులు, ట్రాకుల సంరక్షణ, కొత్త కోచులు కొనడం, సిబ్బందికి జీతాలివ్వడం ఇవి అన్నీ కలిపి భారీ భారమని ఇండియన్ రైల్వే భావిస్తున్నట్లు విశ్లేషకుల అభిప్రాయం. అందుకే ప్రయాణీకులపై కొంచెం భారం వేస్తూ ఈ పెంపును తీసుకొచ్చారట. అయితే, దీనివల్ల సంవత్సరానికి రైల్వే శాఖకు రూ.700 కోట్లు నుంచి రూ.1300 కోట్ల వరకూ అదనపు ఆదాయం వచ్చే అవకాశం ఉందంటున్నారు.

Also Read: 1 KM Metro cost India: రైలు రైలు అనుకుంటున్నారా? వెనుక ఖర్చులు తెలిస్తే గుండె గుభేల్!

ఇది వినిపించడానికి పెద్ద విషయం కాదు అనిపించొచ్చు. కానీ మీరు రోజూ లేదా వారానికి కనీసం మూడు నాలుగు సార్లు ప్రయాణిస్తే ఈ పెంపు స్పష్టంగా మీ ఖర్చును ప్రభావితం చేస్తుంది. ముఖ్యంగా ఉద్యోగులు, స్టూడెంట్స్, చిన్న వాణిజ్యవేత్తలు.. వీళ్లకి ఇది భారమేనన్న టాక్ నడుస్తోంది.

ముందే ఇలా ప్లాన్ చేసుకోండి
ఇక ప్రయాణికులకు కొన్ని సూచనలు. ముందుగా బుకింగ్ చేసుకుంటే కొంతమేరకు ఈ పెంపు ప్రభావం తగ్గుతుంది. మీరు తక్కువ దూరం ప్రయాణిస్తే జనరల్ లేదా స్లీపర్ తరగతిలో ప్రయాణించడం మంచిదే. అలాగే గుంపులుగా ప్రయాణించే వారు కోచ్ షేర్ చేసుకుంటే ఖర్చు తగ్గించుకోవచ్చు. ముఖ్యంగా సీజన్ టైమ్‌లో టికెట్ ధరలు మామూలుగా ఉన్నా డిమాండ్ ఎక్కువగా ఉంటే, పెరిగినట్టే ఉంటుంది. అందుకే ముందుగానే ప్లాన్ చేసుకుంటే మంచిదే.

ఈ మార్పులతో ప్రయాణీకులకు కొంత అసౌకర్యంగా అనిపించినా, దీని వెనుక ఉన్న ఆర్థిక అవసరాలను కూడా అర్థం చేసుకోవాల్సిందే. దేశవ్యాప్తంగా లక్షలాది మంది రోజూ ప్రయాణించే రైళ్ల నిర్వహణ ఒక చిన్న విషయం కాదు. కానీ ఈ సేవలు ఇంకా మెరుగ్గా ఉండాలంటే, మనం కొంచెం భరించాల్సిందే. ఇంతకీ.. ఇప్పుడు మీరు రైలు ఎక్కబోతున్నారా? అయితే టికెట్ ధర చెక్ చేసుకుంటే మంచిదే!

Share

• 
• 
• 
• 
• 
•