Vande Bharat Express at 180 kmph: భారతీయ రైల్వేలో హైస్పీడ్ ప్రయాణాల దిశగా మరో కీలక అడుగు పడింది. మధుర–నాగ్దా రైల్వే సెక్షన్‌లో 16 కోచ్‌ల వందే భారత్ చైర్ కార్ రైలును గంటకు 180 కిలోమీటర్ల వేగంతో అధికారులు పరీక్షించారు. అక్టోబర్ 8, 2026న చీఫ్ కమిషనర్ ఆఫ్ రైల్వే సేఫ్టీ (CCRS) పర్యవేక్షణలో ఈ ట్రయల్ నిర్వహించినట్లు వెల్లడించారు. వందే భారత్ రైళ్లు ఇకపై ఇదే వేగంతో ప్రయాణిస్తాయా అనేది ఇప్పుడు తెలుసుకుందాం..
మధుర–నాగ్దా రైల్వే మార్గం ఢిల్లీ–ముంబై రైల్ కారిడార్‌లో కీలకమైన భాగం. ఉత్తర, పశ్చిమ ప్రాంతాలను లింక్ చేసే ఈ మార్గంలో రైళ్ల వేగ సామర్థ్యాన్ని పరీక్షించడం ప్రాధాన్యత సంతరించుకుంది. పంజాబ్‌లోని కపుర్తలాలో ఉన్న రైల్ కోచ్ ఫ్యాక్టరీ (RCF)లో తయారైన 16 కోచ్‌ల వందే భారత్ రైలుతో ఈ పరీక్ష నిర్వహించారు. రైలు హైస్పీడ్ లో ప్రయాణిస్తున్నప్పుడు దాని పనితీరు, స్థిరత్వం, ప్రయాణ నాణ్యత, భద్రతా వ్యవస్థలను పరిశీలించారు.
వందే భారత్ రైళ్లకు గంటకు 180 కిలోమీటర్ల డిజైన్ స్పీడ్ ఉంటుంది. అయితే, సాధారణ ప్రయాణాల్లో వీటి గరిష్ట నిర్వహణ వేగం గంటకు 160 కిలోమీటర్లుగా నిర్ణయించారు. ట్రయల్ లో గంటకు 180 కిలోమీటర్ల వేగాన్ని చేరుకోవడంతో ఇకపై అవసరం అయితే, అదే స్పీడ్ తో నడిపే అవకాశం ఉంటుంది. అయితే, గంటకు 180 కిలోమీటర్ల వేగంతో ట్రయల్ నిర్వహించడం, సాధారణ సర్వీసుల్లో అదే వేగాన్ని అనుమతించడం రెండూ వేర్వేరు విషయాలు. ప్రతి మార్గంలోని మౌలిక సదుపాయాలు, భద్రతా ప్రమాణాలు, రైల్వే అనుమతులను బట్టి వేగం నిర్ణయిస్తారు.
రైల్వే ట్రాక్‌లు, సిగ్నలింగ్ వ్యవస్థలు, భద్రతా పరికరాలు హైస్పీడ్ కు అనుగుణంగా ఉంటే భవిష్యత్తులో ప్రయాణ సమయాన్ని తగ్గించే అవకాశం ఉంటుంది. భారతీయ రైల్వే ట్రాక్‌ల ఆధునీకరణపై దృష్టి సారిస్తున్న నేపథ్యంలో ఇటువంటి హైస్పీడ్ ట్రయల్స్ భవిష్యత్తులో వేగవంతమైన రైలు ప్రయాణాలకు మార్గం సుగమం చేయవచ్చు. అయితే, ప్రయాణికులకు ఈ ప్రయోజనం ఎప్పటి నుంచి అందుతుందనేది అధికారిక అనుమతులు, ఆ తర్వాతి నిర్ణయాలపై ఆధారపడి ఉంటుంది.
Read Also: సౌదీ అరేబియాకు వెళ్లొద్దు.. హౌతీ దాడులతో పలు దేశాల హెచ్చరికలు!
Share
హస్తిన పోరులో తెలంగాణ కీ రోల్! రేవంత్పై భారీ నమ్మకం పెట్టుకున్న ఏఐసీసీ! ఢిల్లీ పోరులో టీ కాంగ్రెస్ హవా!
కాంగ్రెస్ నేతలు ఒసామా బిన్ లాడెన్ వారసులు.. రేవంత్ రెడ్డికి రామచందర్ రావు స్ట్రాంగ్ కౌంటర్!
