గుడి లాంటి అసెంబ్లీని బహిష్కరిస్తారా? చరిత్రలో ఎక్కడైనా ఉందా.. వైసీపీపై చంద్రబాబు ఫైర్!

Chandrababu Naidu: అసెంబ్లీ అంటే కేవలం ఒక భవనం కాదు.. కోట్లాది మంది ప్రజల ఆశలు, ఆకాంక్షలకు ప్రతిరూపం. అలాంటి పవిత్రమైన వేదికను ఏకంగా బహిష్కరించడం ప్రజాస్వామ్యాన్ని తీవ్రంగా అవమానించడమేనని ఆంధ్రప్రదేశ్ ముఖ్యమంత్రి నారా చంద్రబాబు నాయుడు స్పష్టం చేశారు. అమరావతిలో విలేకరులతో నిర్వహించిన వీడియా సమక్షంలో ఆయన ప్రతిపక్ష వైఎస్సార్ కాంగ్రెస్ పార్టీ వైఖరిపై తీవ్రస్థాయిలో ధ్వజమెత్తారు. ప్రజలు తమ సమస్యల తరఫున గొంతు విప్పుతారని ఎన్నుకుంటే, సభకు రాకుండా బయట కూర్చొని మాట్లాడటం వల్ల ఏమాత్రం ఉపయోగం ఉండదని, ఆ మాటలకు పెద్దగా విలువ కూడా దక్కదని సీఎం పేర్కొన్నారు.

బహిష్కరించడం ఎప్పుడూ చూడలేదు..

ప్రజాస్వామ్య వ్యవస్థలో శాసనసభ అత్యున్నత స్థానంలో ఉంటుందన్నారు. సుదీర్ఘమైన తన రాజకీయ జీవితంలో ఒక పార్టీ మొత్తం అసెంబ్లీని బహిష్కరించడం ఎప్పుడూ చూడలేదని చంద్రబాబు ఆవేదన వ్యక్తం చేశారు. గతంలో 2019-24 మధ్య కాలంలో తాను ఒక సవాల్ చేసి సభ నుంచి బయటకు వచ్చినా.. తమ కూటమి ఎమ్మెల్యేలు మాత్రం చివరి రోజు వరకు సభలోనే ఉంటూ ప్రజల కోసం పోరాడారని గుర్తుచేశారు. ప్రజా సమస్యలపై సభ వేదికగా సాగించే పోరాటమే ప్రజలను ఆలోచింపజేస్తుందని, బాధ్యతగల ప్రతిపక్షంగా అసెంబ్లీకి వచ్చి చర్చల్లో పాల్గొనాల్సింది పోయి పారిపోవడం సరికాదని హితవు పలికారు.

డీఎస్సీ ప్రక్రియపై బురద జల్లే ప్రయత్నం

గత ప్రభుత్వ హయాంలో జరిగిన గ్రూప్-1 తీవ్ర అక్రమాలను, తప్పులను కప్పిపుచ్చుకోవడానికే ప్రతిపక్ష నేతలు సభకు రాకుండా తప్పించుకుంటున్నారని సీఎం చంద్రబాబు విమర్శించారు. ఒకవైపు సభను బహిష్కరిస్తూనే.. మరోవైపు బయట కూర్చొని తాము ఎంతో పారదర్శకంగా చేపట్టిన డీఎస్సీ ప్రక్రియపై బురద జల్లే ప్రయత్నం చేస్తున్నారని మండిపడ్డారు. ప్రజాస్వామ్యాన్ని, చట్టసభలను చులకన చేసేలా వ్యవహరిస్తున్న ఇటువంటి వైఖరి ఉన్న నాయకులకు అసలు రాజకీయాలు అవసరమా అని తీవ్రంగా ప్రశ్నించారు. ప్రతిపక్షం చెబుతున్న అసత్యాలను, తప్పుడు ప్రచారాలను ప్రజలు ఎంతమాత్రం విశ్వసించే పరిస్థితిలో లేరని ఆయన స్పష్టం చేశారు.

బీసీ రిజర్వేషన్ల పునరుద్ధరణ చారిత్రాత్మక నిర్ణయం

గత ‘గొడ్డలి ప్రభుత్వం’ బీసీల హక్కులను కాలరాస్తూ రిజర్వేషన్లలో కోతలు విధించిందన్నారు. అయితే తమ ప్రభుత్వం అధికారంలోకి రాగానే ఆ బీసీ రిజర్వేషన్లను పునరుద్ధరిస్తూ చారిత్రాత్మక నిర్ణయం తీసుకుందని చంద్రబాబు తెలిపారు. ఈ నిర్ణయాన్ని రాష్ట్రంలోని అన్ని వర్గాల ప్రజలు హర్షిస్తూ స్వాగతిస్తున్నారని పేర్కొన్నారు. అమరావతిని మళ్లీ దారిన పెట్టడంతో పాటు, వెనుకబడిన వర్గాలకు బాసటగా నిలుస్తూ పాలనలో మార్పు చూపిస్తున్నామని, ప్రజలు ఇచ్చిన తీర్పుకు కట్టుబడి రాష్ట్రాన్ని అభివృద్ధి పథంలో నడిపించడమే తమ కూటమి ప్రభుత్వ ధ్యేయమని ఈ సందర్భంగా ముఖ్యమంత్రి స్పష్టం చేశారు.

Also Read: విజయసాయిరెడ్డి సంచలన నిర్ణయం.. కొత్త పార్టీతో మళ్లీ రాజకీయాల్లోకి!

Join WhatsApp Channel

Share

• 
• 
• 
• 
• 
•