ఈ ఏడాది అత్యధికంగా అమ్ముడైన పెట్రోల్ కార్లు ఇవే.. నెంబర్ వన్ ఏదంటే?

Best Selling Petrol Cars in India H1 2026: ఈ ఏడాది తొలి ఆరు నెలల్లో భారత ఆటోమొబైల్ మార్కెట్లో పెట్రోల్ కార్లకు మంచి డిమాండ్ కొనసాగింది. ముఖ్యంగా టాప్ 20 పెట్రోల్ కార్లు మొత్తం పెట్రోల్ ప్యాసింజర్ వాహనాల అమ్మకాలలో సుమారు 71 శాతం మార్కెట్ వాటా సాధించాయి. ఈ జాబితాలో మారుతి సుజుకి తన ఆధిపత్యాన్ని కొనసాగించగా, టాటా, హ్యుందాయ్, కియా కంపెనీలు కూడా సత్తా చాటాయి.

నెంబర్ వన్ గా బాలెనో

2026 జనవరి నుంచి జూన్ వరకు మారుతి సుజుకి బాలెనో అత్యధికంగా అమ్ముడైన పెట్రోల్ కారుగా గుర్తింపు పొందింది. ఈ కాలంలో 83,552 యూనిట్లు అమ్మగా, గత ఏడాదితో పోలిస్తే దాదాపు 19 శాతం వృద్ధి నమోదైంది. ఇప్పటి వరకు అగ్రస్థానంలో ఉన్న మారుతి స్విఫ్ట్ ఈసారి రెండో స్థానానికి పరిమితమైంది. స్విఫ్ట్ 81,046 యూనిట్లు అమ్మగా, గత ఏడాదితో పోలిస్తే అమ్మకాలు దాదాపు సమానంగానే ఉన్నాయి.

టాటా పంచ్ దూకుడు

టాటా పంచ్ ఈసారి అద్భుతమైన ఫలితాలు సాధించింది. మొత్తం 61,701 యూనిట్లు అమ్ముడవడంతో మూడో స్థానాన్ని దక్కించుకుంది. గత ఏడాదితో పోలిస్తే దీని అమ్మకాలు 29 శాతం పెరిగాయి. చిన్న SUVలపై వినియోగదారుల ఆసక్తి పెరుగుతున్నట్లు ఈ గణాంకాలు చెబుతున్నాయి.

టాప్ లిస్టులో ఫ్రాంక్స్, ఆల్టో

మారుతి ఫ్రాంక్స్ 61,565 యూనిట్ల అమ్మకాలతో నాలుగో స్థానంలో నిలిచింది. అయితే, గత ఏడాదితో పోలిస్తే స్వల్పంగా 6 శాతం తగ్గుదల కనిపించింది. మరోవైపు మారుతి ఆల్టో సత్తా చాటింది. మొత్తం 59,165 యూనిట్లు అమ్ముడవడంతో ఐదో స్థానానికి చేరుకుంది. అమ్మకాలు ఏకంగా 38 శాతం పెరిగాయి. తక్కువ ధరలో అందుబాటులో ఉండే కార్లకు ఇప్పటికీ మంచి డిమాండ్ ఉందని ఈ వివరాలు వెల్లడిస్తున్నాయి.

హ్యుందాయ్, టాటా SUVలకు మంచి డిమాండ్

హ్యుందాయ్ వెన్యూ 55,750 యూనిట్ల అమ్మకాలతో ఆరో స్థానంలో నిలిచి 26 శాతం వృద్ధిని నమోదు చేసింది. టాటా నెక్సాన్ కూడా 50,240 యూనిట్లతో 31 శాతం వృద్ధిని సాధించి టాప్-10లో తన స్థానాన్ని మరింత బలోపేతం చేసుకుంది. అయితే మారుతి బ్రెజ్జా, హ్యుందాయ్ క్రెటా పెట్రోల్ వేరియంట్ల అమ్మకాలు గత ఏడాదితో పోలిస్తే తగ్గాయి. అయినప్పటికీ ఈ రెండు SUVలు టాప్-10 జాబితాలో కొనసాగాయి.

కియా సెల్టోస్ భారీ జంప్

ఈ ఏడాది అత్యంత వేగంగా వృద్ధి చెందిన మోడళ్లలో కియా సెల్టోస్ ఒకటి. దీని పెట్రోల్ అమ్మకాలు 81 శాతం పెరిగి 39,899 యూనిట్లకు చేరుకున్నాయి. అలాగే, కియా సోనెట్ కూడా 43,945 యూనిట్ల అమ్మకాలతో 28 శాతం వృద్ధిని నమోదు చేసింది. కియా SUVలకు మార్కెట్లో మంచి ఆదరణ లభిస్తున్నట్లు ఈ గణాంకాలు తెలియజేస్తున్నాయి. ఇక మారుతి సుజుకి ఇటీవల ప్రవేశపెట్టిన విక్టోరిస్ తొలి ఆరు నెలల్లోనే 31,875 యూనిట్ల అమ్మకాలతో మంచి ప్రారంభాన్ని నమోదు చేసింది. అలాగే టయోటా హైరైడర్ కూడా 76 శాతం వృద్ధిని నమోదు చేసి ఆకట్టుకుంది.