అమ్మకాల్లో దుమ్మురేపిన మారుతి గ్రాండ్ విటారా.. ఏకంగా 4 లక్షల యూనిట్లు సేల్!

Maruti Grand Vitara Sales: మారుతి సుజుకి గ్రాండ్ విటారా మరో కీలక మైలురాయిని అందుకుంది. దేశీయ మార్కెట్లో ఈ మిడ్‌సైజ్ SUV అమ్మకాలు 4 లక్షల యూనిట్లను దాటాయి. 2022 సెప్టెంబర్‌ లో మార్కెట్లోకి వచ్చిన గ్రాండ్ విటారా.. జూన్ 2026 నాటికి మొత్తం 4,01,007 యూనిట్ల దేశీయ అమ్మకాలను నమోదు చేసింది. మరోవైపు 62,500 యూనిట్లను విదేశీ మార్కెట్లకు ఎగుమతి చేసింది. మారుతి సుజుకి ప్రీమియం నెక్సా షోరూమ్‌ల ద్వారా గ్రాండ్ విటారాను విక్రయిస్తోంది. 4 లక్షల అమ్మకాల మైలురాయిని చేరుకున్న తర్వాత నెక్సా బ్రాండ్‌ లో ఫ్రాంక్స్ తర్వాత అత్యధికంగా అమ్ముడైన రెండో SUVగా గ్రాండ్ విటారా నిలిచింది. ఫ్రాంక్స్ ఇప్పటివరకు 5,25,964 యూనిట్ల అమ్మకాలను నమోదు చేసింది.

అమ్మకాల్లో సరికొత్త దూకుడు

గ్రాండ్ విటారా మార్కెట్లోకి వచ్చిన తర్వాత మంచి స్పందన పొందింది. కేవలం 12 నెలల్లోనే లక్ష యూనిట్ల అమ్మకాల మైలురాయిని చేరుకుంది. అంతేకాదు, మిడ్‌సైజ్ SUV విభాగంలో ఈ ఘనత సాధించిన వేగవంతమైన మోడళ్లలో ఒకటిగా నిలిచింది. అలాగే 22 నెలల్లో 2 లక్షల యూనిట్ల అమ్మకాలను పూర్తి చేసింది. ఆ తర్వాత మరో 10 నెలల్లోనే 3 లక్షల మార్కును కూడా దాటింది. అయితే, నాలుగు లక్షల అమ్మకాల కోసం మరో లక్ష యూనిట్లను విక్రయించడానికి మాత్రం 14 నెలలకు పైగా సమయం పట్టింది. అమ్మకాల వేగం తగ్గడానికి కొత్తగా వచ్చిన మారుతి విక్టోరిస్ కారణం అయ్యింది. 2025 ఆగస్టులో మార్కెట్లోకి వచ్చిన విక్టోరిస్.. గ్రాండ్ విటారాతో ప్లాట్‌ ఫామ్, పవర్‌ ట్రెయిన్లను షేర్ చేసుకుంది.

FY2025లో అత్యధిక అమ్మకాలు

గ్రాండ్ విటారాకు FY2025 అత్యుత్తమ ఆర్థిక సంవత్సరంగా నిలిచింది. ఆ ఏడాది 1,23,946 యూనిట్లు అమ్ముడయ్యాయి. FY2024లో 1,21,169 యూనిట్ల విక్రయాలు నమోదయ్యాయి. FY2026లో అమ్మకాలు 83,849 యూనిట్లకు తగ్గాయి. FY2027 తొలి త్రైమాసికంలో అంటే ఏప్రిల్ నుంచి జూన్ 2026 మధ్య 20,728 యూనిట్లు విక్రయించింది. అదే సమయంలో హ్యుందాయ్ క్రెటా, కియా సెల్టోస్, టయోటా హైరైడర్ లాంటి ప్రత్యర్థి SUVలు గ్రాండ్ విటారా కంటే ఎక్కువ అమ్మకాలు సాధించాయి. దీంతో మిడ్‌సైజ్ SUV సెగ్మెంట్‌ లో పోటీ మరింత పెరిగినట్లు తెలుస్తోంది.

Nexa అమ్మకాల్లో కీలక మోడల్

గ్రాండ్ విటారా మారుతి నెక్సా బ్రాండ్‌ కు ముఖ్యమైన మోడళ్లలో ఒకటిగా కొనసాగుతోంది. 2023 ఆర్థిక సంవత్సరం నుంచి జూన్ 2026 వరకు Nexa మోడళ్ల అమ్మకాలను పరిశీలిస్తే, బాలెనో, ఫ్రాంక్స్ మాత్రమే గ్రాండ్ విటారా కంటే ముందున్నాయి. 2026 ఏప్రిల్-జూన్ మధ్య నెక్సా విక్రయించిన మొత్తం UVల్లో గ్రాండ్ విటారా 21 శాతం వాటాను కలిగి ఉంది. జూలై 2026లో కూడా మారుతి డీలర్లకు 8,127 గ్రాండ్ విటారా యూనిట్లను పంపింది. ప్రస్తుత ఆర్థిక సంవత్సరంలో ఇప్పటివరకు ఇదే అత్యధిక నెలవారీ డిస్పాచ్‌గా నిలిచింది.