ఈవీ మార్కెట్ లో టీవీఎస్ దూకుడు.. జస్ట్ 7 నెలల్లో 3 లక్షలకుపైగా స్కూటర్ల సేల్!

TVS Electric Scooter Sales 2026: భారత ఎలక్ట్రిక్ టూ వీలర్ మార్కెట్లో టీవీఎస్ మోటార్ సత్తా చాటుతోంది. 2026 జనవరి నుంచి జూలై వరకు కేవలం ఏడు నెలల్లోనే ఏకంగా 3 లక్షల ఈవీ యూనిట్లను అమ్మింది. ఈ సమయంలో కంపెనీ మొత్తం 3.07 లక్షలకు పైగా ఎలక్ట్రిక్ స్కూటర్లను విక్రయించింది. ఈ అమ్మకాలతో టీవీఎస్ గత ఏడాది మొత్తం అమ్మిన ఎలక్ట్రిక్ టూ వీలర్ల సంఖ్యకు చాలా దగ్గరగా చేరుకుంది. 2025లో కంపెనీ 3.15 లక్షల యూనిట్ల అమ్మకాలు నమోదు చేయగా, 2026లో కేవలం ఏడు నెలల్లోనే అందులో దాదాపు 97 శాతం అమ్మకాలను సాధించింది.

జూలైలో అమ్మకాల జోరు

జూలై 2026 టీవీఎస్‌కు ప్రత్యేకమైన నెలగా నిలిచింది. ఆ నెలలో కంపెనీ తన అత్యధిక నెలవారీ ఎలక్ట్రిక్ స్కూటర్ అమ్మకాలను నమోదు చేసింది. ఒక్క జూలైలోనే 55,465 యూనిట్లను విక్రయించింది. అంతకుముందు మార్చి నెలలో 51,632 యూనిట్ల అమ్మకాలతో 50 వేల మార్కును దాటిన టీవీఎస్, ఇప్పుడు మరింత వేగంగా ముందుకు సాగుతోంది. ప్రస్తుత అమ్మకాల వేగాన్ని కొనసాగిస్తే, టీవీఎస్ 2026 చివరి నాటికి 5 లక్షల ఎలక్ట్రిక్ స్కూటర్ల అమ్మకాల మార్కును దాటే అవకాశం ఉందని మార్కెట్ నిపుణులు అంచనా వేస్తున్నారు. జనవరి నుంచి జూలై వరకు కంపెనీ నెలకు సగటున 43,898 యూనిట్లను విక్రయించింది. ఇదే స్థాయి అమ్మకాలు కొనసాగితే ఆగస్టు నుంచి డిసెంబర్ మధ్య మరో 2 లక్షలకు పైగా యూనిట్లు అమ్ముడయ్యే అవకాశం ఉంది. ముఖ్యంగా సెప్టెంబర్ నుంచి ప్రారంభమయ్యే పండుగ సీజన్ ఎలక్ట్రిక్ వాహనాల అమ్మకాలకు మరింత జోష్ ఇచ్చే అవకాశం ఉంది. దీంతో టీవీఎస్ పూర్తి సంవత్సరం అమ్మకాలు 5.27 లక్షల నుంచి 5.47 లక్షల యూనిట్ల మధ్య ఉండవచ్చని అంచనా వేస్తున్నారు.

బజాజ్, ఏథర్‌ను వెనక్కి నెట్టిన టీవీఎస్

2026 మొదటి ఏడు నెలల అమ్మకాల గణాంకాలను పరిశీలిస్తే, ఎలక్ట్రిక్ టూ-వీలర్ మార్కెట్లో టీవీఎస్ అగ్రస్థానంలో కొనసాగుతోంది. రెండో స్థానంలో ఉన్న బజాజ్ ఆటో ఇదే కాలంలో సుమారు 2.64 లక్షల యూనిట్లను విక్రయించింది. టీవీఎస్‌తో పోలిస్తే బజాజ్ అమ్మకాలు దాదాపు 43 వేల యూనిట్లు తక్కువగా ఉన్నాయి. ఇక ఏథర్ ఎనర్జీ జనవరి నుంచి జూలై మధ్య 2 లక్షలకు పైగా ఎలక్ట్రిక్ స్కూటర్లను విక్రయించి మూడో స్థానంలో నిలిచింది. ప్రస్తుతం టీవీఎస్, ఏథర్ కంటే లక్షకు పైగా యూనిట్ల ఆధిక్యంలో ఉంది.

హీరో విడా జోష్, ఓలా అమ్మకాల్లో తగ్గుదల

హీరో ఎలక్ట్రిక్ బ్రాండ్ విడా కూడా మంచి వృద్ధిని నమోదు చేసింది. 2026 మొదటి ఏడు నెలల్లో విడా సుమారు 1.29 లక్షల యూనిట్లను విక్రయించి నాలుగో స్థానంలో నిలిచింది. ఇది 2025లో మొత్తం ఏడాది విక్రయించిన 1.13 లక్షల యూనిట్ల కంటే కూడా ఎక్కువ. మరోవైపు గతంలో ఎలక్ట్రిక్ స్కూటర్ మార్కెట్లో అగ్రస్థానంలో ఉన్న ఓలా ఎలక్ట్రిక్ అమ్మకాలు మాత్రం తగ్గాయి. 2026 జనవరి నుంచి జూలై వరకు కంపెనీ 80,282 యూనిట్లను మాత్రమే విక్రయించింది. ఇది గత ఏడాది అమ్మకాలతో పోలిస్తే గణనీయమైన తగ్గుదలగా కనిపిస్తోంది. గ్రీవ్స్ ఎలక్ట్రిక్ మొబిలిటీ 53,938 యూనిట్ల అమ్మకాలతో తర్వాతి స్థానంలో నిలిచింది.