Wuling Hongguang Mini EV: ప్రపంచ వ్యాప్తంగా తక్కువ ధరలో లభించే ఎలక్ట్రిక్ కార్లలో వులింగ్ హాంగ్ గ్వాంగ్ మినీ EV ప్రత్యేక గుర్తింపు సంపాదించింది. చైనాకు చెందిన SAIC GM Wuling సంస్థ తయారు చేస్తున్న ఈ చిన్న ఎలక్ట్రిక్ కారు సిటీలో రోజువారీ ప్రయాణాలకు ఎంతో అనుకూలంగా ఉంటుంది. తాజాగా వచ్చిన ఫిఫ్త్ జెనరేషన్ 4 డోర్ మోడల్ అందుబాటులో ఉంది. కానీ, రెండు డోర్ల మోడల్ బాగా పాపులర్ అయ్యింది. అత్యాధునిక డిజైన్, మెరుగైన ఫీచర్లు ఆకట్టుకుంటాయి. ప్రస్తుతం మోడల్ సుమారు రూ.5.1 లక్షల నుంచి రూ.6.2 లక్షల మధ్య ఉంటుంది. కానీ, రెండు డోర్ల మోడల్ ధర జస్ట్ రూ. 3 లక్షలకే లభిస్తుంది. తక్కువ ధరలోనే మంచి రేంజ్, ఆధునిక ఫీచర్లు అందించడంతో ఈ కారు ప్రపంచవ్యాప్తంగా మంచి ఆదరణ దక్కించుకుంది.
ఈ కారులో 30 kW పర్మనెంట్ మాగ్నెట్ సింక్రోనస్ ఎలక్ట్రిక్ మోటార్ అందించారు. ఇది సుమారు 42 హార్స్ పవర్ శక్తిని ఉత్పత్తి చేస్తుంది. నగరాల్లో ట్రాఫిక్ పరిస్థితులకు అనుగుణంగా వేగంగా స్పందించేలా దీనిని రూపొందించారు. కేవలం 4.5 సెకన్లలో 0 నుంచి 50 కిలోమీటర్ల వేగాన్ని అందుకుంటుంది. ఈ కారు 205 కిలోమీటర్లు, 301 కిలోమీటర్ల CLTC రేంజ్ అనే రెండు ఆప్షన్లలో అందుబాటులో ఉంటుంది. రోజువారీ ప్రయాణాలకు ఈ రేంజ్ చాలామందికి సరిపోతుంది. అంతేకాదు, DC ఫాస్ట్ ఛార్జింగ్ సదుపాయం కూడా ఉంది. దీని ద్వారా బ్యాటరీని కేవలం 35 నిమిషాల్లో 30 శాతం నుంచి 80 శాతం వరకు ఛార్జ్ చేసుకోవచ్చు. దీంతో ఎక్కువసేపు ఛార్జింగ్ కోసం వేచి ఉండాల్సిన అవసరం ఉండదు.
చిన్న పరిమాణంలో ఉన్నప్పటికీ ఈ కారు లోపల మంచి స్థలాన్ని అందిస్తుంది. కొత్త మోడల్ లో 4 డోర్లు ఉన్నా, పాత మోడల్ లో 2 డోర్లు మాత్రమే ఉన్నాయి. 4 సీట్లు ఉన్నాయి. 10.1 అంగుళాల టచ్ స్క్రీన్ ఇన్ఫోటైన్ మెంట్ సిస్టమ్, స్మార్ట్ ఫోన్ యాప్ ద్వారా రిమోట్ ఏసీ కంట్రోల్ లాంటి స్మార్ట్ ఫీచర్లు కూడా అందుబాటులో ఉన్నాయి. చిన్న కుటుంబాల అవసరాలకు, షాపింగ్, లగేజీ తీసుకెళ్లడానికి కూడా ఈ కారు ఉపయోగపడుతుంది.
డిజైన్ పరంగా కూడా ఈ కారు ఆకర్షణీయంగా కనిపిస్తుంది. గుండ్రని స్టార్ రింగ్ LED హెడ్లైట్లు, స్మూత్ బాడీ లైన్లు, రెట్రో స్టైల్ తో కూడిన లేటెస్ట్ డిజైన్ ప్రత్యేక లుక్ను తీసుకొచ్చాయి. నగరాల్లో నడిపేందుకు అనువుగా చిన్న సైజులో ఉండటంతో పాటు 4.5 మీటర్ల టర్నింగ్ రేడియస్ ఉండటం వల్ల ఇరుకైన రోడ్లలో కూడా సులభంగా నడిపే అవకాశం ఉంటుంది. పార్కింగ్ కూడా చాలా ఈజీగా ఉంటుంది. భద్రత విషయంలో కూడా కంపెనీ రాజీ పడలేదు. ఈ కారును 67 శాతం హై స్ట్రెంగ్త్ స్టీల్ ఉపయోగించి తయారు చేశారు. ఇందులో ఎలక్ట్రానిక్ స్టెబిలిటీ కంట్రోల్, ముందు భాగంలో ఎయిర్ బ్యాగ్ లు, డిస్క్ బ్రేకులు లాంటి కీలక భద్రతా ఫీచర్లు ఉన్నాయి. తక్కువ ధరలో మంచి రేంజ్, ఫాస్ట్ ఛార్జింగ్, ఆధునిక టెక్నాలజీ, చక్కటి డిజైన్ కోరుకునే వారికి వులింగ్ హాంగ్గ్వాంగ్ మినీ EV ఒక మంచి ఎంపికగా చెప్పవచ్చు.
Read Also: రూ.9 లక్షల నుంచే లగ్జరీ ఫీచర్.. వెంటిలేటెడ్ సీట్లతో వచ్చే చీప్ అండ్ బెస్ట్ కార్లు ఇవే!
Share
ప్రతినెలా కరెంటు బిల్లు సగం అవ్వాలా? లైట్, రిమోట్తో వచ్చే బెస్ట్ BLDC ఫ్యాన్లు ఇవే.. ఓ లుక్కేయండి!
CM Protocol: సీఎం రేవంత్ సభల్లో కొత్త రూల్స్.. ఇకపై ఆ హడావుడి చేస్తే వేదికపైకి నో ఎంట్రీ..?
