రూ.2 లక్షలకే అదిరిపోయే స్పోర్ట్స్ బైక్.. జస్ట్ రూ. 10 వేలతో బుక్ చేసుకోండి!

Yamaha R2 Pre Bookings Open: యమహా కొత్త స్పోర్ట్స్ బైక్ R2 కోసం ప్రీ బుకింగ్స్ ప్రారంభించింది. రూ.10,000 చెల్లించి ఈ బైక్‌ ను ముందుగానే బుక్ చేసుకునే అవకాశం కల్పిస్తోంది. ఆగస్టు 27న అధికారికంగా విడుదల కానున్న R2పై ఇప్పటికే బైక్ ప్రియుల్లో ఆసక్తి పెరిగింది. యమహా లైనప్‌ లో ఇది R15కి పైస్థానంలో ఉండనుంది. ప్రస్తుతం R2కి సంబంధించిన పూర్తి వివరాలను కంపెనీ వెల్లడించలేదు. అయితే, ఈ బైక్‌లో 200-220cc మధ్య సింగిల్ సిలిండర్ ఇంజన్ ఉండే అవకాశం ఉందని తెలుస్తోంది.

R15 కంటే పై స్థాయిలో..

యమహా R2ను R15కు ప్రత్యామ్నాయంగా తీసుకురావడం లేదు. R15 లైనప్‌ లోనే కొత్త మార్పులు చేసి, R2కు ప్రత్యేక స్థానం కల్పించనున్నట్లు తెలుస్తోంది. ప్రస్తుతం ఉన్న R15 M వేరియంట్ భవిష్యత్తులో నిలిపివేసే అవకాశం ఉందని తెలుస్తోంది. అలాగే థర్డ్ జెనరేషన్ R15 ఆధారంగా ఉన్న R15 S కూడా లైనప్ నుంచి తప్పుకునే అవకాశం ఉంది. ప్రస్తుతం యమహా R15 ధర సుమారు రూ.1.57 లక్షల నుంచి రూ.1.98 లక్షల వరకు ఉంది. ఈ నేపథ్యంలో R2 ధర రూ.2 లక్షల నుంచి రూ.2.20 లక్షల మధ్య ఉండొచ్చని తెలుస్తోంది. అయితే, అధికారిక ధరను ఆగస్టు 27న లాంచ్ సమయంలో ప్రకటించే అవకాశం ఉంది.

KTM, హీరో బైక్‌లకు పోటీ

కొత్త యమహా R2కు మార్కెట్లో KTM RC 200, హీరో కరిజ్మా XMR గట్టి పోటీ ఇవ్వనున్నాయి. ఈ రెండు బైక్‌లు దాదాపు 25hp వరకు పవర్‌ ను అందిస్తాయి. R2 కూడా ఇదే స్థాయిలో పనితీరును అందించే అవకాశం ఉందని అంచనాలు ఉన్నాయి. R15లో ఉన్న అధిక రివింగ్ ఇంజన్ స్వభావాన్ని R2లో కూడా కొనసాగించే అవకాశం ఉంది. అయితే, ఎక్కువ సామర్థ్యం ఉన్న ఇంజన్ కారణంగా పనితీరు మరింత మెరుగ్గా ఉండొచ్చని భావిస్తున్నారు.

భారత్‌లోనే తయారీ!

యమహా R2ను భారత్‌లోనే తయారు చేయనున్నట్లు తెలుస్తోంది. దేశీయ మార్కెట్లో విక్రయించడంతో పాటు ఇతర అంతర్జాతీయ మార్కెట్లకు కూడా ఇక్కడి నుంచే ఎగుమతి చేసే అవకాశం ఉంది.

ప్రీ బుకింగ్ కోసం చెల్లించే రూ.10,000 పూర్తిగా రీఫండ్ చేయనున్నట్లు కంపెనీ తెలిపింది. అయితే, రీఫండ్ ప్రక్రియ సెప్టెంబర్ 5 తర్వాత ప్రారంభమవుతుందని సమాచారం. ముందుగానే బుక్ చేసుకున్న కస్టమర్లకు బైక్ డెలివరీ విషయంలో ప్రాధాన్యత ఇవ్వనున్నట్లు యమహా తెలిపింది. R15 కంటే ఎక్కువ పనితీరు కోరుకునే, ఖరీదైన స్పోర్ట్స్ బైక్‌ తీసుకోవాలనుకునే వారికి యమహా R2 ఆసక్తికరమైన ఆప్షన్‌ గా మారే అవకాశం ఉంది.