Kailasagiri Toy: కొండపై మబ్బులు తాకుతుంటే కింద సముద్ర కెరటాలు పలకరిస్తుంటే.. చుట్టూ విశాఖ అందాలు కనిపిస్తుంటే ఆ అందాల మధ్య చిన్నారుల కేరింతలు పర్యాటకుల సందడి సింపుల్ గా చెప్పాలంటే ఇదే కైలాసగిరి టాయ్ ట్రైన్ ప్రయాణం. విశాఖకు వచ్చే పర్యాటకులకు కైలాసగిరి ఓ ప్రత్యేక ఆకర్షణ. ఆ అందాలకు మరింత వన్నె తెచ్చింది ఈ చిన్న రైలు. 2007లో ప్రారంభమైన కైలాసగిరి టాయ్ ట్రైన్ కొండపై పర్యాటకుల ప్రయాణంలో ఓ మధుర జ్ఞాపకంగా మారింది. కేవలం 150 రూపాయల టికెట్తో రోజుకు 500 నుంచి 800 మంది వరకు పర్యాటకులు ఈ రైలులో ప్రయాణించేవారు. నెలకు దాదాపు 30 లక్షల ఆదాయం కూడా వచ్చేది. అలా కొండపై చుక్చుక్ అంటూ పరుగులు తీస్తూ.. పర్యాటకుల ఆనందాన్ని రెట్టింపు చేసింది ఈ చిన్న రైలు. కానీ కాలం మారింది. రైలుకు మరమ్మతులు పెరిగాయి. ట్రాక్ దెబ్బతింది. నిర్వహణలోనూ సమస్యలు మొదలయ్యాయి.
గతంలో బీఓటీ విధానంలో ఓ ప్రైవేట్ సంస్థ టాయ్ ట్రైన్ నిర్వహణ బాధ్యతలు చేపట్టింది. ఆదాయంలో 60 శాతం సంస్థకు 40 శాతం వీఎంఆర్డీఏకు వచ్చేలా ఒప్పందం జరిగింది. అయితే నిబంధనల ఉల్లంఘన, బకాయిల చెల్లింపుల అంశాలతో 2024లో వీఎంఆర్డీఏ ఆ ఒప్పందాన్ని రద్దు చేసింది. ఆ తర్వాత నిర్వహణ బాధ్యతలు వీఎంఆర్డీఏ చేతుల్లోకి వచ్చినా సమస్యలు మాత్రం వెంటాడుతూనే ఉన్నాయి. పట్టాలపై పరిగెత్తాల్సిన రైలు మరమ్మతుల కోసం ఆగిపోయింది. గతేడాది డిసెంబర్లో బ్రేకులు ఫెయిల్ కావడంతో టాయ్ ట్రైన్ పూర్తిగా నిలిచిపోయింది. అప్పటి నుంచి కైలాసగిరి కొండపై రైలు కూత లేదు. పర్యాటకుల కేరింతలు లేవు. చిన్నారుల సందడి లేదు.
Also Read: పోలీసులు మళ్లీ కొడతారనే భయంతో.. ఓ యువకుడు ఆత్మహత్య!
టాయ్ ట్రైన్ మళ్లీ అందుబాటులోకి వస్తే పిల్లలు, కుటుంబాలతో వచ్చే పర్యాటకులకు చాలా ఆనందంగా ఉంటుందని త్వరగా రైలు ప్రారంభించాలని పర్యాటకులు కోరుకుంటున్నారు. పిక్నిక్ సీజన్ దగ్గరపడుతోంది. క్రిస్మస్, సంక్రాంతి వరుస సెలవులతో కైలాసగిరికి పర్యాటకుల తాకిడి మరింత పెరిగే అవకాశం ఉంది. దీంతో పాత రైలుకు వీడ్కోలు పలికి కొత్త విద్యుత్ రైలును పట్టాలెక్కించాలని వీఎంఆర్డీఏ నిర్ణయించింది. విధివిధానాలు ఖరారైన వెంటనే టెండర్లు పిలిచి పనులు ప్రారంభిస్తామని వీఎంఆర్డీఏ ఛైర్మన్ ప్రణవ్ గోపాల్ అంటున్నారు. పాత టాయ్ ట్రైన్తో ఎన్నో జ్ఞాపకాలు కొత్త విద్యుత్ రైలుపై ఎన్నో ఆశలు సముద్రాన్ని చూపించే ఆ ప్రయాణం విశాఖ అందాలను పలకరించే ఆ రైలు ప్రయాణం మళ్లీ ఎప్పుడు మొదలవుతుందా అని పర్యాటకులు ఎదురుచూస్తున్నారు.
కైలాసగిరి అందాల వడిలో చుక్చుక్ అంటూ మళ్లీ రైలు పరుగులు తీస్తే.. ఆ సందడి మరింత రెట్టింపవ్వడం ఖాయం. పాత టాయ్ ట్రైన్ జ్ఞాపకంగా మిగిలినా కొత్త విద్యుత్ రైలు ఆశగా కనిపిస్తోంది. కైలాసగిరి కొండపై మళ్లీ రైలు కూత ఎప్పుడు వినిపిస్తుంది? పర్యాటకుల ఎదురుచూపులకు ఎప్పుడు తెరపడుతుంది? విశాఖ అందాల మధ్య ఆ చిన్న రైలు మళ్లీ పరుగులు పెట్టే రోజు కోసం పర్యాటకులు ఆసక్తిగా ఎదురుచూస్తున్నారు.
Also read: 13 ఏళ్ల బాలుడిపై స్కూల్ టీచర్ లైంగిక దాడి!
Share
సాయి పల్లవి ఫస్ట్ మూవీ రెమ్యూనరేషన్ ఎంతో తెలుసా?
ఢిల్లీలో కేంద్ర జలశక్తి మంత్రి సీఆర్ పాటిల్తో సీఎం రేవంత్ భేటీ!
