స్మార్ట్‌గా బురిడీ కొట్టిస్తున్న డీలర్లు.. ఎరువుల యాప్ ఓపెన్ చేసేలోపే ఖాళీ.. ఎలా సాధ్యం?

Urea Booking: తెలంగాణలో సాగు సీజన్ వచ్చిందంటే చాలు.. రైతుల కళ్లు ఎరువుల బస్తాల కోసమే వెతుకుతుంటాయి. తెల్లవారుజామునే లేచి, కడుపునకాలి తిండి మానేసి, ఎండనకా వాననకా సొసైటీలు, డీలర్ల షాపుల ముందు గంటల తరబడి క్యూలైన్లలో నిలబడటం ఏళ్ల తరబడి చూస్తున్న దృశ్యమే. తీరా నంబర్ వచ్చేసరికి ‘స్టాక్ అయిపోయింది’ అనే బోర్డు చూసి గుండె పగిలినంత పనయ్యేది రైతులకు. ఈ ఇబ్బందులకు శాశ్వత పరిష్కారం చూపాలని భావించిన ప్రభుత్వం, ఎరువుల పంపిణీలో పారదర్శకత కోసం సరికొత్త బుకింగ్ యాప్‌ను, మీసేవా విధానాన్ని తెరపైకి తెచ్చింది. స్మార్ట్‌ఫోన్ లేని సామాన్య రైతుల కోసం మీసేవా కేంద్రాల ద్వారా కూడా బుకింగ్ చేసుకునే వెసులుబాటు కల్పించింది.

డిజిటల్ సిస్టమ్ తెచ్చిన మార్పు.. అడ్డుకట్ట పడిన అక్రమాలు

సాంకేతికంగా చూస్తే ఈ ఆన్‌లైన్ విధానం బ్లాక్ మార్కెట్‌కు పెద్ద బ్రేక్ వేసిందనే చెప్పాలి. యాప్‌లో కానీ, మీసేవాలో కానీ ఎరువులు బుక్ చేయాలంటే ఖచ్చితంగా పట్టాదార్ పాస్‌బుక్ నంబర్ ఎంటర్ చేయాలి. ఆ తర్వాత సదరు రైతు రిజిస్టర్డ్ మొబైల్ నంబర్‌కు వచ్చే ఓటీపీ (OTP)ని ధృవీకరిస్తేనే బుకింగ్ పూర్తవుతుంది. దీనివల్ల గతంలో డీలర్లు ఇష్టారాజ్యంగా ఎరువుల స్టాక్‌ను పక్కదారి పట్టించి, అక్రమంగా ఎక్కువ ధరలకు అమ్ముకునే దోపిడీకి చాలావరకు అడ్డుకట్ట పడింది.

Also Read: ఏపీని ఊపేస్తున్న ‘ప్రశ్న రావణ్’ కేసు.. అసలు అతని వెనుక ఉన్న ‘ఆ’ పెద్ద హస్తం ఎవరిది?

కొత్త సిస్టమ్‌లో పాత జబ్బులు.. డీలర్ల మాయాజాలం

వ్యవస్థ మారినా కొందరు డీలర్ల బుద్ధి మాత్రం మారలేదు. టెక్నాలజీని కూడా వారు తమకు అనుకూలంగా మార్చుకుంటున్నారు. తమకు కావాల్సిన, అనుకూలమైన రైతుల ఫోన్ నంబర్లను ముందే సేకరించి పెట్టుకుంటున్నారు. యాప్ ఓపెన్ కాగానే క్షణాల్లో బుకింగ్స్ పూర్తి చేసేస్తున్నారు. తీరా సాధారణ రైతులు యాప్ ఓపెన్ చేసేసరికి ‘నో స్టాక్’ అని చూపిస్తోంది. ఇక మీసేవా కేంద్రాల వద్ద పరిస్థితి మరింత ఘోరంగా తయారైంది. అక్కడ క్యూలైన్లు పెరగడమే కాకుండా, ఆపరేటర్ లాగిన్ అయ్యి ఓటీపీ ఎంటర్ చేసే లోపే సర్వర్ డౌన్ అవ్వడమో లేదా స్టాక్ అయిపోవడమో జరుగుతోంది. దీంతో డిజిటల్ సిస్టమ్ వచ్చినా రైతులకు నిరాశే మిగులుతోంది.

పరిష్కారం ఎక్కడ? పాత పద్ధతి సాధ్యమేనా?

కేవలం టెక్నాలజీని నమ్ముకుంటే సరిపోదు, క్షేత్రస్థాయిలో ఎరువుల కోటాను పెంచడం ముఖ్యం. సర్వర్ల సామర్థ్యాన్ని పెంచి, సాంకేతిక లోపాలు లేకుండా చూస్తేనే ఈ సమస్య తీరుతుంది. అయితే, ఈ ఆన్‌లైన్ ఇబ్బందులు భరించలేక కొన్ని జిల్లాల్లో రైతులు పాత పద్ధతినే తిరిగి ప్రవేశపెట్టాలని ధర్నాలు, నిరసనలు చేస్తున్నారు. పారదర్శకత కోసం తెచ్చిన ఆన్‌లైన్ విధానాన్ని ప్రభుత్వం పూర్తిగా రద్దు చేసే అవకాశం లేనప్పటికీ, రైతుల ఇబ్బందులను గమనించి ఈ లోపాలను ఎలా సరిదిద్దుతుందనేదే ఇప్పుడు అందరి ముందున్న ప్రశ్న.

Also Read: సినిమా సీన్‌ని తలపించేలా నవవధువు కిడ్నాప్.. వీడియో వైరల్!