Enough Retirement Corpus| రిటైర్మెంట్ తర్వాత సౌకర్యవంతంగా జీవించడానికి ఎంత డబ్బు కావాలో చాలామందికి సందేహం ఉంటుంది. కొందరూ రూ.1 కోటి, రూ.5 కోట్లు కావాలని ఆలోచిస్తే మరికొందరు రూ.10 కోట్లు లేదా రూ.40 కోట్లు కావాలా అని ఆలోచిస్తుంటారు. ఎడెల్వైస్ మ్యూచువల్ ఫండ్ ఎండీ, సీఈఓ రాధికా గుప్తా దీనిపై ముఖ్యమైన సూచనలు చేశారు.
రిటైర్మెంట్ కోసం భారీ మొత్తాన్ని లక్ష్యంగా పెట్టుకోవడం కంటే ఖర్చులను ముందుగా లెక్కించుకోవాలని ఆమె సూచించారు. పెద్ద మొత్తాన్ని చూసి భయపడితే పెట్టుబడులు ప్రారంభించకుండా ఉండే ప్రమాదం ఉంటుంది.
ఉద్యోగం లేకపోయినా మీకు ఎంత ఖర్చు అవుతుందో ముందుగా అంచనా వేయాలి. 40, 50 ఏళ్ల వయసులో ఉన్నవారు తమ ప్రస్తుత అవసరమైన ఖర్చులను లెక్కించుకోవాలి. ఇప్పటికే మీ వద్ద సొంత ఇల్లు ఉంటే దాని ఖర్చును లెక్కలోంచి మినహాయించవచ్చు. తర్వాత ద్రవ్యోల్బణాన్ని పరిగణనలోకి తీసుకుని భవిష్యత్తు ఖర్చులను అంచనా వేయాలి. జీవనశైలి మార్పులు, కుటుంబ బాధ్యతలు కూడా భవిష్యత్తు ఖర్చులపై ప్రభావం చూపుతాయి.
ప్రతి వ్యక్తికి ఒకే రిటైర్మెంట్ కార్పస్ సరిపోదు. మీరు నివసించే నగరం, జీవనశైలి, ఆస్తులు, ఇల్లు, కుటుంబ బాధ్యతలు కీలకంగా మారతాయి. బెంగుళూరు, ఢిల్లీ, ముంబైలో నివసించే వ్యక్తి ఖర్చులు చిన్న నగరంలో నివసించే వ్యక్తి కంటే ఎక్కువగా ఉండవచ్చు. సొంత ఇల్లు ఉన్నవారికి రిటైర్మెంట్ తర్వాత గృహ ఖర్చులు తక్కువగా ఉండవచ్చు. పిల్లల బాధ్యతలు ఉన్నవారికి ఎక్కువ మొత్తంలో పొదుపు చేయాల్సిన అవసరం ఉంది.
రాధికా గుప్తా ముంబై ఉదాహరణ ప్రస్తావించారు. సొంత ఇల్లు పూర్తిగా ఉన్న కొందరికి రూ.5 కోట్ల నుంచి రూ.7 కోట్ల వరకు సరిపోవచ్చని ఆమె చెప్పారు. అయితే ఇది అందరికీ వర్తించే రిటైర్మెంట్ లక్ష్యం కాదు. వ్యక్తిగత ఖర్చులు, కుటుంబ బాధ్యతలు, జీవనశైలి ఆధారంగా ఈ మొత్తం మారవచ్చు.
ఢిల్లీలో సొంత ఇల్లు ఉన్న ఒక ఫ్యామిలీ మ్యాన్ ఉదాహరణను కూడా ఆమె చెప్పారు. ఆ వ్యక్తి పిల్లలు ఇంకా సంపాదించడం ప్రారంభించకపోవడంతో తనపై అదనపు బాధ్యతల గురించి కూలా ఆలోచిస్తాడు. అలాంటి పరిస్థితిలో రూ.7 కోట్ల నుంచి రూ.8 కోట్ల కార్పస్ ఉపయోగకరంగా ఉంటుందని ఆమె సూచించారు. ఇలాంటి ఉదాహరణలు వ్యక్తిగత రిటైర్మెంట్ ప్లానింగ్ ప్రాముఖ్యతను చూపిస్తాయి.
భారీ మొత్తాలను చూసి నిర్ణయం తీసుకోవడం కంటే రిటైర్మెంట్ కాలిక్యులేటర్లను ఉపయోగించవచ్చు. ఇవి భవిష్యత్తు ఖర్చులు, ద్రవ్యోల్బణం, పెట్టుబడి అవసరాలను అంచనా వేయడంలో సహాయపడతాయి. మీ జీవనశైలికి అనుగుణంగా వ్యక్తిగత రిటైర్మెంట్ లక్ష్యాన్ని నిర్ణయించుకోవచ్చు.
రిటైర్మెంట్ కోసం పెట్టుబడి ప్రారంభించడానికి పెద్ద మొత్తం అవసరం లేదని గుప్తా చెప్పారు. మ్యూచువల్ ఫండ్స్లో రూ.100తో కూడా పెట్టుబడి ప్రారంభించవచ్చని ఆమె పేర్కొన్నారు. చిన్న మొత్తంతో ప్రారంభించి క్రమంగా పెట్టుబడిని పెంచుకోవచ్చు. యువతకు మొదట పెట్టుబడి అలవాటును పెంచుకోవడం ముఖ్యమని ఆమె సూచించారు.
గుప్తా 10-30-50 పొదుపు విధానాన్ని సూచించారు. 20 ఏళ్ల వయసులో పన్నులు మినహాయించిన తరువాత ఆదాయంలో 10 శాతం పెట్టుబడి చేయాలని ఆమె సూచించారు. 30 ఏళ్లలో ఈ మొత్తాన్ని 30 శాతానికి పెంచుకోవాలి. 40 ఏళ్లలో ఆదాయంలో 50 శాతం వరకు పెట్టుబడి చేసేలా ప్రయత్నించండి.
Also Read: ఎంత సంపాదిస్తే భారతీయులు సంతోషంగా ఉంటారు? డబ్బు, సంతోషం మధ్య లింక్ ఉందా?
రిటైర్మెంట్ లక్ష్యం జీవిత పరిస్థితులతో పాటు మారుతూ ఉండాలి. ఆదాయం, ఖర్చులు, కుటుంబ బాధ్యతలు మారినప్పుడు ఆర్థిక ప్రణాళికను కూడా సమీక్షించాలి. ఒక భారీ మొత్తాన్ని చూసి భయపడకుండా ముందుగానే పెట్టుబడులు ప్రారంభించడం మంచిది. రిటైర్మెంట్కు ఎంత డబ్బు కావాలో నిర్ణయించేటప్పుడు మీ భవిష్యత్తు జీవనశైలిని పరిగణనలోకి తీసుకోండి. రూ.40 కోట్లు అవసరమా అని ఆలోచించే బదులు, మీకు నిజంగా ఎంత అవసరమో లెక్కించండి.
Also Read: ఈఎంఐ ఉచ్చులో భారత మధ్యతరగతి.. వేధింపులు, ఆర్థిక ఒత్తిడితో ఆత్మహత్యలు
Share
ఏఐ మ్యాజిక్తో సామ్సంగ్ 75 ఇంచుల టీవీ.. విజువల్స్ వేరే లెవెల్ అంతే!
కాంటినెంటల్ GT 650 కొనాలనుకున్నారా? ముందు ఈ 8 విషయాలు తెలుసుకోండి!
