వారంతా విమానం కోసం ఎదురు చూస్తున్నారు. బోర్డింగ్‌కు ఇంకా టైమ్ ఉండటంతో మొబైళ్లు చూస్తూ.. ఎవరి పనిలో వారు నిమగ్నమై ఉన్నారు. ఇంతలో ఎక్కడి నుంచి వచ్చిందో ఓ బాంబు.. నేరుగా వారి తలపై పడింది. అంతే.. అక్కడికక్కడే 13 మంది చనిపోయారు. వీరిలో భారతీయ ప్రయాణికులు సైతం ఉన్నారు. కొందరు మాత్రం.. లక్కీగా తప్పించుకున్నారు. మరికొందరు తీవ్ర గాయాలతో హాస్పిటల్‌లో ప్రాణాపాయ స్థితిలో ఉన్నారు.
సౌదీ అరేబియా రాజధాని రియాద్‌లోని కింగ్ ఖాలిద్ అంతర్జాతీయ విమానాశ్రయంలో జరిగిన క్షిపణి దాడికి సంబంధించిన కొన్ని సీసీటీవీ వీడియోలు సోషల్ మీడియాలో చక్కర్లు కొడుతున్నాయి. ఈ వీడియోలను Al Arabiya మీడియా సంస్థ సోమవారం విడుదల చేసింది. విమానం ఎక్కేందుకు సిద్ధమవుతున్న ప్రయాణికులు, ఉమ్రా యాత్రికులు టెర్మినల్ లోపల వేచి ఉన్న సమయంలో ఈ దాడి జరిగినట్లు ఈ ఫుటేజ్ స్పష్టం చేస్తోంది.
సౌదీ అధికారులు తెలిపిన వివరాల ప్రకారం.. శనివారం (అక్టోబర్ 10) జరిగిన ఈ క్షిపణి దాడిలో 13 మంది ప్రాణాలు కోల్పోగా, 300 మందికి పైగా గాయపడ్డారు. మృతిచెందిన వారిలో ఒక భారతీయ పౌరుడు కూడా ఉన్నారు. మరో 11 మంది భారతీయులు గాయపడినట్లు రియాద్‌లోని భారత రాయబార కార్యాలయం వెల్లడించింది. క్షతగాత్రులకు మెరుగైన వైద్యం అందేలా స్థానిక అధికారులతో సంప్రదింపులు జరుపుతున్నామని రాయబార కార్యాలయం తెలిపింది.
ఈ దాడిలో ప్రాణాలు కోల్పోయిన భారతీయ పౌరుడిని హైదరాబాద్, మెహిదీపట్నానికి చెందిన 46 ఏళ్ల ఐటీ నిపుణుడు మొహమ్మద్ యూసుఫ్‌గా గుర్తించారు. ఆయన తన కుటుంబంతో కలిసి ఉమ్రా నిమిత్తం మదీనా వెళ్లేందుకు చెకింగ్ కౌంటర్ దగ్గర వేచి చూస్తున్న సమయంలో ఈ ప్రమాదం జరిగింది. పేలుడు ధాటికి విమానాశ్రయ శిథిలాలు ఆయనపై పడటంతో తీవ్ర గాయాలపాలై ఆసుపత్రిలో చికిత్స పొందుతూ మృతి చెందారు. ఈ ఘటనలో ఆయన భార్య, ఇద్దరు పిల్లలు కూడా గాయపడ్డారు. తీవ్రగాయాలతో ప్రాణాల కోసం పోరాడుతున్నారు.
మొహమ్మద్ యూసుఫ్ మృతిపై విదేశాంగ మంత్రి ఎస్. జైశంకర్ తీవ్ర సంతాపం వ్యక్తం చేశారు. బాధిత కుటుంబానికి అన్ని విధాలా అండగా ఉంటామని, యూసుఫ్ భౌతిక కాయాన్ని త్వరగా భారత్‌కు రప్పించేందుకు చర్యలు తీసుకుంటున్నామని రాయబార కార్యాలయం స్పష్టం చేసింది.
ఆదివారం కూడా రియాద్ విమానాశ్రయంలోని డొమెస్టిక్ టెర్మినల్స్ 3, 4పై మరో దాడి జరిగినట్లు సమాచారం. యెమెన్‌లోని ఇరాన్ మద్దతుదారులైన హూతీ రెబెల్స్ గత కొన్ని రోజులుగా సౌదీ విమానాశ్రయాలు, చమురు కేంద్రాలను లక్ష్యంగా చేసుకుని దాడులు చేస్తున్న సంగతి తెలిసిందే. తాజా దాడుల నేపథ్యంలో యెమెన్ విమానాశ్రయాలు, సౌదీ గగనతలాన్ని ఉపయోగించవద్దని హూతీ మిలిటరీ ప్రతినిధి హెచ్చరికలు జారీ చేశారు. ఈ దాడులను భారత్ తీవ్రంగా ఖండించింది. పౌరులు, పౌర మౌలిక సదుపాయాలపై దాడులు పూర్తిగా ఆమోదయోగ్యం కానిదని, ఇలాంటి దాడులను వెంటనే నిలిపివేయాలని భారత్ పేర్కొంది.
Share
జియో సూపర్ డూపర్ ప్లాన్స్.. రూ. 449 vs రూ. 500.. దేని బెనిఫిట్స్ ఎంత?
టీమిండియాలో సిక్స్ ప్యాక్ యుగం నడుస్తోంది.. వీరేంద్ర సెహ్వాగ్ సంచలనం
