దక్షిణాఫ్రికాలో ఘోరం.. అర్ధరాత్రి ఇంట్లోకి జొరబడి కాల్పులు.. 11 మంది దుర్మరణం!

South Africa Shooting: దక్షిణాఫ్రికాలో మరోసారి బుల్లెట్ల మోత మోగింది. ఆనందంగా గడుపుతున్న ఒక కుటుంబ వేడుక క్షణాల్లో రక్తసిక్తంగా మారిపోయింది. డర్బన్ నగర సమీపంలోని క్వామాఖుతా టౌన్‌షిప్‌లోని ఓ నివాస భవనంలోకి చొరబడిన సాయుధులు జరిపిన విచక్షణారహిత కాల్పుల్లో 11 మంది ప్రాణాలు కోల్పోగా.. మరో ముగ్గురు తీవ్రంగా గాయపడ్డారు. మంగళవారం అర్ధరాత్రి వేళ చోటుచేసుకున్న ఈ దారుణం స్థానికంగా తీవ్ర భయాందోళనలు రేకెత్తించింది.

సంతోషంగా పార్టీ చేసుకుంటుండగానే..

స్థానిక అధికారుల వివరాల ప్రకారం.. సదరు ఇంట్లో కుటుంబసభ్యులు, స్నేహితులు కలిసి సరదాగా పార్టీ చేసుకుంటున్నారు. అంతా సరదాగా గడుపుతున్న సమయంలో.. ఊహించని విధంగా ముగ్గురు దుండగులు ఆయుధాలతో ఇంట్లోకి చొరబడ్డారు. అక్కడ ఉన్న వారిపై ఏమాత్రం కనికరం లేకుండా విచక్షణారహితంగా పలు రౌండ్ల కాల్పులు జరిపారు. ఒక్కసారిగా తుపాకుల మోత మోగడంతో భయంతో చుట్టుపక్కల ప్రజలు పరుగులు తీశారు.

అక్కడికక్కడే 10 మంది మృతి

ఈ దాడి ఎంత ఘోరంగా జరిగిందంటే.. కాల్పుల ధాటికి 10 మంది ఘటనా స్థలంలోనే రక్తపు మడుగులో ప్రాణాలు వదిలారు. తీవ్రంగా గాయపడిన మరో నలుగురిని ఆస్పత్రికి తరలించగా.. చికిత్స పొందుతూ ఒకరు మృతి చెందారు. దీంతో మొత్తం మృతుల సంఖ్య 11కు చేరింది. ఈ విషాదంలో మరింత కలచివేసే అంశమేమిటంటే, మృతుల్లో ఒక గర్భిణి కూడా ఉన్నట్లు పోలీసులు ధృవీకరించారు.

పాత కక్షలే కారణమా?

సమాచారం అందుకున్న వెంటనే పోలీసులు ఘటనా స్థలానికి చేరుకుని పరిశీలించారు. ఈ దారుణానికి కచ్చితమైన కారణాలు ఇంకా తెలియనప్పటికీ, పాత గొడవలు లేదా ముఠాల మధ్య కక్షల కారణంగానే దుండగులు ఈ ఘాతకానికి ఒడిగట్టి ఉంటారని పోలీసులు అనుమానిస్తున్నారు. కేసు నమోదు చేసుకున్న పోలీసులు, నిందితుల కోసం విస్తృతంగా గాలింపు చర్యలు చేపట్టారు.

Also Read: శ్రీకాకుళంలో విషాదం.. టెక్కలి వద్ద రైలు ఢీకొని నలుగురు యువకులు దుర్మరణం!

Join WhatsApp Channel

Share

• 
• 
• 
• 
• 
•