Poha Recipe:10 నిమిషాల్లోనే రెడీ అయ్యే హెల్తీ బ్రేక్ ఫాస్ట్.. వెంటనే ట్రై చేయండి

Poha Recipe: ఉదయం పూట బ్రేక్‌ఫాస్ట్ తయారు చేయడానికి కొన్ని సార్లు ఎక్కువగా సమయం ఉండదు. ఇలాంటి సందర్భంలో తక్కువ టైంలో టేస్టీగా, హెల్తీగా చేయాలంటే.. ముందుగా గుర్తుకు వచ్చేది అటుకుల పోహా.
దీనిని చాలా సులభంగా తయారు చేయవచ్చు. ఇదిలా ఉంటే పోహా తిన్న వెంటనే కడుపు నిండిన భావన కూడా కలుగుతుంది. అటుకుల పోహాను మనం ఇంట్లోనే రకరకాలుగా తయారు చేసుకోవచ్చు. కారం పోహా, స్వీట్ పోహా ఇలా చాలా వెరైటీలే ఉన్నాయి.

అటుకుల పోహా రెసిపీ తయారీకి కావాల్సిన పదార్థాలు:

అటుకులు – 2 కప్పులు

ఉల్లిపాయ – 1 (చిన్నగా తరిగినది)

పచ్చిమిర్చి – 2-3 (చిన్నగా తరిగినది)

కరివేపాకు – 1 రెమ్మ

ఆవాలు – 1/2 టీస్పూన్

జీలకర్ర – 1/2 టీస్పూన్

పల్లీలు – 1/4 కప్పు

పసుపు – 1/4 టీస్పూన్

ఉప్పు – రుచికి సరిపడా

నూనె – 2 టేబుల్ స్పూన్లు

నిమ్మరసం – 1 టీస్పూన్

కొత్తిమీర – కొద్దిగా (గార్నిష్ కోసం)

అటుకుల పోహా తయారీ విధానం:
అటుకులను సిద్ధం చేసుకోవడం: ముందుగా అటుకులను ఒక గిన్నెలోకి తీసుకుని వాటిని శుభ్రంగా కడగాలి. అటుకులపై కొద్దిగా నీళ్లు చల్లి, అవి మెత్తబడేంత వరకు పక్కన పెట్టాలి. అటుకులు మెత్తబడ్డాక.. వాటిలో ఉన్న నీటిని పూర్తిగా తీసివేయాలి. అప్పుడు అటుకులు మెత్తబడినప్పటికీ విరిగిపోకుండా ఉంటాయి.

పోహా తాలింపు: ఇప్పుడు స్టవ్ మీద ఒక పాన్ పెట్టి.. అందులో నూనె వేసి వేడి చేయాలి. నూనె వేడి అయిన తరువాత, ఆవాలు, జీలకర్ర వేసి అవి చిటపటలాడే వరకు వేయించాలి. తర్వాత పల్లీలు వేసి గోధుమ రంగులోకి వచ్చేంత వరకు వేయించాలి. పల్లీలు బాగా వేగిన తరువాత.. పచ్చిమిర్చి, ఉల్లిపాయ ముక్కలు, కరివేపాకు వేసి ఉల్లిపాయలు మెత్తబడే వరకు వేయించాలి.

పసుపు, ఉప్పు కలపడం: ఉల్లిపాయలు వేగిన తర్వాత పసుపు, ఉప్పు వేసి బాగా కలపాలి. తక్కువ మంట మీద సుమారు 10 నుంచి 15 సెకండ్ల వరకు వేగనివ్వాలి.

అటుకులు కలపడం: ఇప్పుడు ముందుగా తడి చేసుకున్న అటుకులను ఈ మిశ్రమంలో వేసి బాగా కలపాలి. అటుకులు విరిగిపోకుండా జాగ్రత్తగా కలపాలి. అన్ని పదార్థాలు అటుకులకు బాగా కలిసేలా చూసుకోవాలి. తర్వాత మూత పెట్టి తక్కువ మంట మీద 2 నుండి 3 నిమిషాలు ఉడికించాలి. దీనివల్ల పోహాకు అన్ని రుచులు బాగా పడతాయి.

చివరి మెరుగులు: స్టవ్ ఆఫ్ చేసి, నిమ్మరసం, సన్నగా తరిగిన కొత్తిమీర వేసి కలపాలి. అటుకుల పోహాను వేడి వేడిగా వడ్డించుకోవాలి.

Also Read: గోంగూర రొయ్యల కర్రీ.. ఇలా చేస్తే లొట్టలేసుకుంటూ తినాల్సిందే !

చిట్కాలు:

పోహా కోసం కొంచెం మందంగా ఉండే అటుకులను ఎంచుకుంటే పోహా తక్కువగా విరిగిపోతుంది.

అటుకులను నానబెట్టేటప్పుడు, ఎక్కువ నీరు వేయకూడదు. కొద్దిగా నీటిని చల్లితే చాలు.

పల్లీలకు బదులుగా, జీడిపప్పు, శనగపప్పు కూడా వాడవచ్చు.

ఇష్టమైతే.. తాలింపులో బంగాళదుంప, క్యారెట్, బఠానీలు వంటి కూరగాయలు కూడా వేసుకోవచ్చు.

ఈ అటుకుల పోహా చాలా తేలికగా.. తక్కువ సమయంలోనే చేసుకోవచ్చు. అంతేకాకుండా ఇది ఆరోగ్యానికి కూడా చాలా మంచిది. ఇందులో పీచు, పోషకాలు పుష్కలంగా ఉంటాయి. దీనిని ఉదయం బ్రేక్ ఫాస్ట్‌గా తీసుకుంటే రోజంతా ఉత్సాహంగా ఉంటారు. ఈ రుచికరమైన అటుకుల పోహా మీరు కూడా మీ ఇంట్లో ప్రయత్నించి చూడండి. మీ కుటుంబ సభ్యులు ఖచ్చితంగా ఇష్టపడతారు.

Also Read: రెస్టారెంట్ స్టైల్‌లో వెజిటెబుల్ పులావ్.. ఇలా చేస్తే అదిరపోయే టేస్ట్

Share

• 
• 
• 
• 
• 
•