వర్షాకాలం వేసవి వేడి నుంచి ఉపశమనం కలిగిస్తుంది. అయితే ఈ సీజన్లో తేమ, కలుషిత నీళ్లు, దుమ్ము, కాలుష్యం కారణంగా ఇన్ఫెక్షన్ల ప్రమాదం కూడా పెరుగుతుంది. ముఖ్యంగా కళ్లకు సంబంధించిన సమస్యలు ఎక్కువగా కనిపిస్తాయి. చేతులు శుభ్రంగా లేకుండా కళ్లను రుద్దడం, ఇతరుల టవల్స్ లేదా మేకప్ వస్తువులు ఉపయోగించడం, కాంటాక్ట్ లెన్స్లను సరిగా శుభ్రం చేయకపోవడం వంటి అలవాట్లు ప్రమాదాన్ని మరింత పెంచుతాయి.
కంజంక్టివైటిస్ను సాధారణంగా ‘పింక్ ఐ’ అని అంటారు. ఈ సమస్య వచ్చినప్పుడు కళ్లలో ఎర్రదనం, దురద, నీరు కారడం, వాపు, జిగురుగా ఉండే స్రావం కనిపించవచ్చు. వైరస్, బ్యాక్టీరియా లేదా అలర్జీల కారణంగా ఇది రావచ్చు. ఈ వ్యాధి ఒకరి నుంచి మరొకరికి సులభంగా వ్యాపిస్తుంది. అందుకే ప్రత్యేక టవల్స్ ఉపయోగించడం, పరిశుభ్రత పాటించడం చాలా అవసరం. లక్షణాలు కనిపించిన వెంటనే వైద్యులను సంప్రదించాలి.
స్టై (stye) అనేది కనురెప్పలపై వచ్చే చిన్న ఎర్రటి గడ్డ. ఇది వస్తే చాలా నొప్పిగా కూడా ఉంటుంది. బ్యాక్టీరియా కారణంగా కనురెప్పల్లో ఉండే ఆయిల్ గ్రంథులు మూసుకుపోయినప్పుడు ఈ సమస్య వస్తుంది. వర్షాకాలంలో చెమట, దుమ్ము, కాలుష్యం కారణంగా స్టై సమస్య ఎక్కువగా కనిపిస్తుంది. కనురెప్పలను శుభ్రంగా ఉంచడం ద్వారా దీన్ని నివారించవచ్చు. ఉపశమనం కోసం గోరువెచ్చని నీళ్ల పట్టీలు వేయడం వల్ల నొప్పి, వాపు తగ్గుతాయి. అయితే స్టై గడ్డలని పగలగొట్టే ప్రయత్నం చేయకూడదు.
కంటి ముందు భాగంలో ఉండే కార్నియాకు ఇన్ఫెక్షన్ లేదా వాపు వచ్చినప్పుడు కెరటైటిస్ సమస్య ఏర్పడుతుంది. దీనివల్ల కంటి నొప్పి, చూపు మసకబారడం, నీరు కారడం, వెలుతురు చూడలేకపోవడం వంటి లక్షణాలు కనిపిస్తాయి. కాంటాక్ట్ లెన్స్లు ఉపయోగించే వారు మరింత జాగ్రత్తగా ఉండాలి. లెన్స్లను సాధారణ నీటితో కడగకూడదు. వాటిని ఎప్పుడూ శుభ్రమైన కేసులోనే నిల్వ చేయాలి.
కలుషిత నీరు, బురద, దుమ్ము లేదా మొక్కల భాగాలు కంటిలోకి వెళ్లడం వల్ల ఫంగల్ ఇన్ఫెక్షన్లు రావచ్చు. ఇవి అరుదుగా కనిపించినప్పటికీ ప్రమాదకరంగా మారే అవకాశం ఉంటుంది. కళ్లలో నొప్పి, ఎర్రదనం, నీరు కారడం, చూపు మందగించడం వంటి లక్షణాలు కనిపిస్తాయి. వైద్యుల సలహా లేకుండా ఐ డ్రాప్స్ వాడడం పరిస్థితిని మరింత కష్టతరం చేయవచ్చు.
బ్లెఫరైటిస్ అనేది కనురెప్పల వద్ద వచ్చే వాపు సమస్య. దీని వల్ల దురద, మంట, ఎర్రదనం, కళ్లలో ఇసుక పడినట్లు అనిపించడం, కళ్లు పొడిబారినట్లు అనిపించవచ్చు. అధిక తేమ, చెమట, దుమ్ము వల్ల ఈ సమస్య మరింత పెరుగుతుంది. కనురెప్పలను శుభ్రంగా ఉంచడం, గోరువెచ్చని పట్టీలు వేయడం వల్ల ఉపశమనం లభిస్తుంది.
Also Read: మౌనంగా ఉండడం మీకు అలవాటుగా మారిందా? ఈ 5 నష్టాలకు అదే కారణం.. ఈ పరిస్థితుల్లో నోరు విప్పాల్సిందే
కళ్లను తాకే ముందు చేతులను శుభ్రంగా కడుక్కోవాలి. కళ్లను రుద్దకూడదు. ఇతరుల టవల్స్, మేకప్ వస్తువులు, ఐ డ్రాప్స్ ఉపయోగించకూడదు. వైద్యుల సలహా లేకుండా మందులు వాడకూడదు. కంటి నొప్పి, ఎర్రదనం, చూపు మందగించడం లేదా వెలుతురును తట్టుకోలేకపోవడం వంటి లక్షణాలు కనిపిస్తే వెంటనే వైద్యులను సంప్రదించాలి.
సరైన పరిశుభ్రత, తగిన జాగ్రత్తలు పాటించడం ద్వారా వర్షాకాలంలో కంటి ఇన్ఫెక్షన్లను నివారించి కంటి ఆరోగ్యాన్ని కాపాడుకోవచ్చు.
Also Read: గుమ్మడికాయ ఆకులు తింటే రక్తహీనత సమస్యకు చెక్.. ఈ ఆకులతో అద్భుత ప్రయోజనాలు
Share
వర్షాకాలంలో బైక్ కేర్ టిప్స్.. ఈ చిన్న జాగ్రత్తలు తీసుకుంటే మీ టూవీలర్ సేఫ్!
సమంత ‘మా ఇంటి బంగారం’ 3 రోజుల గ్రాస్ ఎంతో తెలిస్తే?.. హీరోలు ఇక సద్దుకోవాల్సిందే..
