Broccoli Benefits: బ్రోకలీ తినడం వల్ల.. ఎన్ని ప్రయోజనాలు ఉంటాయో తెలుసా ?

Broccoli Benefits: ఆరోగ్యకరమైన ఆహారంలో బ్రోకలీకి ప్రత్యేక స్థానం ఉంది. ఇది కేవలం ఆకుపచ్చని కూరగాయ మాత్రమే కాదు.. పోషకాలతో నిండిన ఒక అద్భుతమైన ఆహారం. బ్రోకలీ శాస్త్రీయ నామం బ్రాసికా ఒలెరేసియా ఇటాలికా. ఇది క్యాబేజీ జాతికి చెందినది. విటమిన్లు, ఖనిజాలు, ఫైబర్ తో పాటు శక్తివంతమైన యాంటీఆక్సిడెంట్లతో సమృద్ధిగా ఉండే బ్రోకలీని రోజువారీ ఆహారంలో చేర్చుకోవడం వల్ల అనేక ఆరోగ్య ప్రయోజనాలను పొందవచ్చు. ఇంతకీ బ్రోకలీ తింటే ఎలాంటి ఆరోగ్య ప్రయోజనాలు ఉంటాయో ఇప్పుడు తెలుసుకుందాం.

బ్రోకలీ వల్ల కలిగే ప్రధాన ఆరోగ్య ప్రయోజనాలు:

1. క్యాన్సర్ నివారణ:
బ్రోకలీలో సల్ఫోరాఫేన్, ఇండోల్-3-కార్బినాల్ వంటి శక్తివంతమైన యాంటీఆక్సిడెంట్లు ఉంటాయి. ఈ సమ్మేళనాలు క్యాన్సర్ కణాల పెరుగుదలను నిరోధించడంలో అంతే కాకుండా శరీరంలోని విష పదార్థాలను తొలగించడంలో సహాయపడతాయి. ముఖ్యంగా రొమ్ము, ప్రోస్టేట్, పెద్దపేగు, ఊపిరితిత్తుల క్యాన్సర్లను నివారించడంలో బ్రోకలీ ప్రభావవంతంగా పనిచేస్తుందని పలు అధ్యయనాల్లో వెల్లడైంది.

2. జీర్ణక్రియను మెరుగుదల:
బ్రోకలీలో పీచుపదార్థం (ఫైబర్) అధికంగా ఉంటుంది. ఫైబర్ జీర్ణవ్యవస్థను ఆరోగ్యంగా ఉంచడంలో సహాయపడుతుంది. మలబద్ధకాన్ని నివారిస్తుంది. అంతే కాకుండా పేగు కదలికలను క్రమబద్ధీకరిస్తుంది. ఇది జీర్ణక్రియను సులభతరం చేయడమే కాకుండా.. పేగులలో ఆరోగ్యకరమైన బ్యాక్టీరియా వృద్ధికి కూడా తోడ్పడుతుంది.

3. గుండె ఆరోగ్యానికి మేలు:

బ్రోకలీలో ఉండే ఫైబర్, పొటాషియం, విటమిన్ సి, యాంటీఆక్సిడెంట్లు గుండె ఆరోగ్యానికి మేలు చేస్తాయి. ఫైబర్ శరీరంలోని చెడు కొలెస్ట్రాల్ (LDL) స్థాయిలను తగ్గించడంలో సహాయపడుతుంది. తద్వారా గుండె జబ్బుల ప్రమాదాన్ని తగ్గిస్తుంది. పొటాషియం రక్తపోటును నియంత్రించడంలో సహాయపడుతుంది. అంతే కాకుండా ఇది గుండెపై ఒత్తిడిని తగ్గిస్తుంది.

4. ఎముకల ఆరోగ్యానికి అవసరం:

విటమిన్ కె , కాల్షియం బ్రోకలీలో పుష్కలంగా ఉంటాయి. ఈ రెండు పోషకాలు ఎముకల ఆరోగ్యాన్ని కాపాడటానికి, ఎముక సాంద్రతను పెంచడానికి చాలా అవసరం. ఎముకలు బలహీనపడకుండా, బోలు ఎముకల వ్యాధ రాకుండా నిరోధించడంలో బ్రోకలీ సహాయపడుతుంది.

5. రోగనిరోధక శక్తిని పెంచుతుంది:
బ్రోకలీలో విటమిన్ సి అధికంగా ఉంటుంది. ఇది రోగనిరోధక వ్యవస్థకు చాలా ముఖ్యమైన పోషకం. విటమిన్ సి శరీరంలో యాంటీబాడీల ఉత్పత్తిని పెంచి, వ్యాధులతో పోరాడే శక్తిని అందిస్తుంది. జలుబు, ఫ్లూ వంటి సాధారణ అంటువ్యాధుల నుంచి రక్షించడంలో ఇది సహాయపడుతుంది.

6. చర్మ ఆరోగ్యం, వృద్ధాప్య సంకేతాలను తగ్గిస్తుంది:
బ్రోకలీలోని విటమిన్ సి, విటమిన్ ఇ , ఇతర యాంటీఆక్సిడెంట్లు చర్మాన్ని ఫ్రీ రాడికల్స్ నుండి రక్షించి, ఆరోగ్యంగా ఉంచుతాయి. ఇది చర్మాన్ని కాంతివంతంగా ఉంచడమే కాకుండా.. ముడతలు, వృద్ధాప్య సంకేతాలను తగ్గించడంలో కూడా సహాయపడుతుంది.

Also Read: బట్టతలపై కూడా జుట్టు పెరగాలంటే.. ఈ ఒక్క ఆయిల్ వాడితే చాలు

7. రక్తంలో చక్కెర స్థాయిలను నియంత్రిస్తుంది:
బ్రోకలీలో ఉండే ఫైబర్, యాంటీఆక్సిడెంట్లు రక్తంలో చక్కెర స్థాయిలను నియంత్రించడంలో సహాయపడతాయి. అంతే కాకుండా ఇవి మధుమేహ వ్యాధిగ్రస్తులకు ప్రయోజనకరంగా ఉంటాయి.

బ్రోకలీని సలాడ్లలో, సూప్‌లలో, కూరలుగా లేదా ఆవిరి మీద ఉడికించి కూడా తినవచ్చు. దీనిని మీ రోజువారీ ఆహారంలో చేర్చుకోవడం ద్వారా ఆరోగ్యకరమైన జీవితాన్ని పొందవచ్చు.