బిడ్డకు ఆకలి వేసిందో లేదో ఎలా తెలుసుకోవాలి? తల్లిదండ్రులకు రెస్పాన్సివ్ ఫీడింగ్ గైడ్

Responsive Feeding Routine for Babies| బిడ్డ ఏడిస్తే వెంటనే ఆకలిగా ఉందని అనుకుంటారా? లేదా తినడం ఆపేస్తే ఆహారం నచ్చలేదని భావిస్తారా? నిజానికి బిడ్డ తన ఆకలి, కడుపు నిండిన భావాలను కొన్ని ప్రత్యేక సంకేతాల ద్వారా తెలియజేస్తుంది. ఈ సంకేతాలను అర్థం చేసుకుని పిల్లలకు ఆహారం ఇవ్వడమే రెస్పాన్సివ్ ఫీడింగ్ అంటారు. ముఖ్యంగా ఆరు నెలల తర్వాత సాలిడ్ ఫుడ్స్ ప్రారంభించే సమయంలో ఈ పద్ధతి చాలా ఉపయోగకరంగా ఉంటుంది.

రెస్పాన్సివ్ ఫీడింగ్ అంటే ఏంటి?

బిడ్డకు నిర్ణీత సమయం ప్రకారం బలవంతంగా ఆహారం పెట్టడం రెస్పాన్సివ్ ఫీడింగ్ కాదు. బిడ్డ ప్రవర్తనను గమనించి, ఆకలి సంకేతాలకు అనుగుణంగా ఆహారం ఇవ్వడం ఈ పద్ధతిలో ముఖ్యం. బిడ్డకు ఆకలి ఉన్నప్పుడు తినిపించి, కడుపు నిండినప్పుడు ఆపడం అవసరం. ప్రపంచ ఆరోగ్య సంస్థ కూడా చిన్నారుల అనుబంధ ఆహారంలో రెస్పాన్సివ్ ఫీడింగ్‌కు ప్రాధాన్యం ఇస్తుంది.

బిడ్డకు ఆకలి వేసిన సంకేతాలను ఎలా గుర్తించాలి?

ప్రతిసారి బిడ్డ ఏడిస్తే ఆకలిగా ఉందని అనుకోవాల్సిన అవసరం లేదు. నిద్ర, అసౌకర్యం లేదా తల్లిదండ్రుల దృష్టి కోసం కూడా బిడ్డ ఏడుస్తుంది. ఆకలిగా ఉన్నప్పుడు బిడ్డ ఆహారం వైపు చేతులు చూపించి సైగలు చేయవచ్చు.
చెంచా కనిపించగానే నోరు తెరవడం లేదా ఆహారం వైపు ముందుకు వెళ్లడానికి ప్రయత్నించడం లాంటివి కూడా గమనించాలి. కొంతమంది పిల్లలు తమకు ఇష్టమైన ఆహారం కనిపిస్తే ఉత్సాహంగా స్పందిస్తారు.
పెరిగే పిల్లలు ఆహారం వైపు చూపించడం లేదా పట్టుకోవడానికి ప్రయత్నించడం లాంటివి చేస్తారు.

బిడ్డ కడుపు నిండిందని ఎలా తెలుసుకోవాలి?

కడుపు నిండినప్పుడు కూడా బిడ్డ కొన్ని స్పష్టమైన సంకేతాలు ఇస్తుంది. నోరు మూసుకుని మరో ముద్ద తీసుకోవడానికి పిల్లలు నిరాకరిస్తారు. అది తన తలను పక్కకు తిప్పవచ్చు లేదా ఆహారాన్ని దూరంగా నెట్టవచ్చు. కొన్నిసార్లు తినడంపై పూర్తిగా ఆసక్తి కోల్పోతారు. ఇలాంటి సంకేతాలను గమనించి బలవంతంగా ఆహారం పెట్టకూడదు.

6 నెలల తర్వాత సాలిడ్ ఫుడ్స్ ఎలా ప్రారంభించాలి?

సాధారణంగా మొదటి ఆరు నెలలు తల్లిపాలను మాత్రమే ఇవ్వాలని WHO, UNICEF సూచిస్తున్నాయి. సుమారు ఆరు నెలల తర్వాత బిడ్డకు అదనపు పోషకాలు, ఎనర్జీ అవసరమవుతాయి. అప్పుడు తల్లిపాలను కొనసాగిస్తూ వారికి కాంప్లిమెంటరీ ఫుడ్ ప్రారంభించవచ్చు. మొదట చిన్న పరిమాణంలో మెత్తగా చేసిన లేదా సెమీ సాలిడ్ ఆహారం ఇవ్వాలి. బిడ్డ ఎదుగుదలను బట్టి ఆహారం పరిమాణాన్ని క్రమంగా పెంచాలి.

వయస్సు బట్టి ఫీడింగ్ రొటీన్

6 నుంచి 8 నెలలు

రోజుకు రెండు లేదా మూడు సార్లు తల్లిపాలతో పాటు పిల్లలకు కాంప్లిమెంటరీ ఫుడ్స్ ఇవ్వాలి.
తల్లిపాలను కూడా బిడ్డ అవసరాన్ని బట్టి కొనసాగించాలి.
కాంప్లిమెంటరీ ఫుడ్.. మెత్తగా, మాష్ చేసిన సెమీ సాలిడ్ ఆహారం అయితే మంచిది.

9 నుంచి 11 నెలలు

రోజుకు మూడు లేదా నాలుగు సార్లు ఆహారం ఇవ్వాలి.
అవసరాన్ని బట్టి ఒక పోషకమైన స్నాక్ కూడా ఇవ్వాలి.
కొద్దిగా గట్టిగా ఉండే ఆహారం, సాఫ్ట్ ఫింగర్ ఫుడ్స్ ప్రారంభించాలి.

12 నుంచి 23 నెలలు

రోజుకు మూడు లేదా నాలుగు సార్లు భోజనం ఇవ్వడం ప్రారంభించాలి. అదనంగా ఒకటి లేదా రెండు ఆరోగ్యకరమైన స్నాక్స్ తినిపించండి. కుటుంబ సభ్యులు తినే ఆహారాన్ని బిడ్డకు అనుగుణంగా మార్చి ఇవ్వండి.

ఈ ఫీడింగ్ తప్పులు చేయకండి

బిడ్డ కడుపు నిండిన తర్వాత బలవంతంగా తినిపించకండి. తింటున్న సమయంలో బిడ్డను ఎప్పుడూ ఒంటరిగా వదిలివేయకండి. వయస్సుకు తగిన ఆహార టెక్స్చర్‌ను మాత్రమే ఇవ్వండి. ఆహారం తయారుచేసే ముందు చేతులు, పాత్రలను శుభ్రంగా ఉంచండి. బిడ్డ నెమ్మదిగా తినేందుకు తగినంత సమయం ఇవ్వండి.

Also Read: ఈ విధానంలో భోజనం చేస్తే షుగర్ ఎప్పుడూ పెరగదు.. మధుమేహులకు డాక్టర్ చెప్పిన సింపుల్ చిట్కా

స్క్రీన్ చూస్తూ తినిపించడం మంచిది కాదు.. ఎందుకంటే

మొబైల్ లేదా టీవీ చూపిస్తూ తినిపిస్తే బిడ్డ సంకేతాలను గమనించడం కష్టమవుతుంది. భోజన సమయంలో బిడ్డతో మాట్లాడటం, ప్రేమగా స్పందించడం చాలా ముఖ్యం. ప్రశాంతమైన వాతావరణంలో తినిపించడం మంచి ఆహారపు అలవాట్లను పెంపొందించవచ్చు.

రెస్పాన్సివ్ ఫీడింగ్ ద్వారా తల్లిదండ్రులు బిడ్డ ఆకలి, కడుపు నిండిన సంకేతాలను అర్థం చేసుకోవచ్చు. బలవంతం చేయకుండా, ప్రేమగా, ఓపికగా తినిపించడం ఆరోగ్యకరమైన ఆహారపు అలవాట్లకు సహాయపడుతుంది.