రైస్ వాటర్‌తో మెరిసే జుట్టు, గ్లాస్ స్కిన్ సాధ్యమేనా? సోషల్ మీడియాలో చెప్పేదంతా నిజమేనా?

Korean Glass Skin Tips: బియ్యం కడిగిన నీటితో జుట్టుకు మెరుపు తీసుకురావచ్చని, చర్మానికి నిగారింపు అందించవచ్చని కొన్ని రోజులుగా సోషల్ మీడియాలో పెద్ద ఎత్తున ప్రచారం జరుగుతోంది. కొరియన్ బ్యూటీ సీక్రెట్స్ పేరుతో వైరల్ అవుతున్న ఈ చిట్కా చాలామందిని ఆకర్షిస్తోంది. కొందరు దీనిని సహజసిద్ధమైన బ్యూటీ ట్రీట్‌మెంట్‌గా భావిస్తుంటే.. మరికొందరు నిజంగానే బియ్యం కడిగిన నీటితో ఇంతటి ప్రయోజనాలు పొందవచ్చా? అని సందేహం వ్యక్తం చేస్తున్నారు.

అసలు బియ్యం నీటిలో ఉండే పోషకాలు ఏమిటి? అది జుట్టు పెరుగుదలకు, చర్మ సౌందర్యానికి ఎంతవరకు ఉపయోగపడుతుంది? దీనిని ఎలా ఉపయోగించాలి? ఏమైనా దుష్ప్రభావాలు ఉన్నాయా? సోషల్ మీడియాలో జరుగుతున్న ప్రచారంలో ఎంతవరకు నిజం ఉంది? ఈ విషయాలన్నింటినీ శాస్త్రీయ ఆధారాల వెలుగులో ఇప్పుడు వివరంగా తెలుసుకుందాం.

పాత సాంప్రదాయం..

మనం సాధారణంగా అన్నం వండిన తర్వాత లేదా బియ్యం కడిగిన తర్వాత ఆ నీటిని పారబోస్తుంటాం. కానీ దక్షిణ కొరియాతో సహా అనేక ఆసియా దేశాల్లో తరతరాలుగా ఈ నీటిని జుట్టు, చర్మ సౌందర్యం కోసం వాడుతున్నారు. బియ్యం నీటిలోని పిండి పదార్థం జుట్టుపై ఒక తేలికపాటి పొరలా ఏర్పడి, జుట్టును సున్నితంగా, చిక్కులు లేకుండా చేస్తుంది.

Also Read: మధ్యాహ్నం కాగానే కళ్లు మూతలు పడుతున్నాయా? శరీరం ఇచ్చే డేంజర్ సిగ్నల్ ఇది!

శాస్త్రీయ ఆధారాలు..

చర్మ సంరక్షణలో రైస్ సెరమైడ్స్ తేమను కాపాడతాయని కొన్ని పరిశోధనల్లో తేలింది. అయితే ఇవి ప్రత్యేకంగా తయారు చేసిన ప్రయోగశాల ఉత్పత్తులపై చేసిన అధ్యయనాలు. ఇంట్లో తయారు చేసుకునే మామూలు బియ్యం నీళ్లు తాగడం వల్ల లేదా వాడటం వల్ల చర్మంపై నల్లటి మచ్చలు మాయమైపోతాయని, రంగు మారిపోతుందని చెప్పడానికి ఎలాంటి బలమైన శాస్త్రీయ ఆధారాలు లేవు.

వాడే పద్ధతి ముఖ్యం..

రైస్ వాటర్ ఉపయోగించాలనుకుంటే దాన్ని తయారు చేసుకునే విధానం చాలా ముఖ్యం. బియ్యాన్ని కాసేపు నానబెట్టిన తర్వాత వచ్చే నీటిని వాడటం సులువైన మార్గం. ఈ నీటిని ఎక్కువ రోజులు నిల్వ ఉంచితే క్రిములు చేరే ప్రమాదం ఉంది. కాబట్టి.. ఎప్పటికప్పుడు తాజాగా తయారు చేసుకుని, షాంపూ చేసిన తర్వాత జుట్టుకు పూసి కాసేపటి తర్వాత శుభ్రంగా కడుక్కోవాలి.

జాగ్రత్తలు అవసరం..

ఈ నీళ్లు వాడినప్పుడు స్కాల్ప్‌పై దురద, ఎరుపు లేదా మంటగా అనిపిస్తే వెంటనే వాడటం ఆపేయాలి. బియ్యం నీళ్లు మీ బ్యూటీ రొటీన్‌లో ఒక చిన్న సహాయకారి మాత్రమే తప్ప, రాత్రికి రాత్రే అద్భుతాలు చేసే మేజిక్ కాదు. సమతుల్య ఆహారం, సరైన జీవన శైలి మాత్రమే ఆరోగ్యకరమైన జుట్టును, ప్రకాశవంతమైన చర్మాన్ని అందిస్తాయి.

Also Read: ‘నేను బాగానే ఉన్నా’ అన్న ప్రతీసారీ నమ్మకండి.. పిల్లల ఆ ప్రవర్తన వెనుక పెద్ద రహస్యమే ఉంది!