Causes Of Numbness: మన చేతులు, కాళ్లలో అప్పుడప్పుడు తిమ్మిర్లు రావడం సర్వసాధారణం. చాలాసార్లు ఒకే భంగిమలో ఎక్కువసేపు కూర్చోవడం లేదా పడుకోవడం వల్ల కూడా ఇలా జరుగుతుంది. ఈ తిమ్మిర్లు కొన్ని క్షణాల తర్వాత వాటంతట అవే తగ్గిపోతాయి. కానీ, ఈ తిమ్మిర్లు తరచుగా వస్తూ, ఎక్కువసేపు ఉండి, ఇతర లక్షణాలతో కలిసినప్పుడు మాత్రం అస్సలు నిర్లక్ష్యం చేయకూడదు. ఇది ఆరోగ్య సమస్యకు సంకేతం కావచ్చు. చేతులు, కాళ్లలో తరచూ తిమ్మిర్లు రావడానికి గల కారణాలు, నివారణ మార్గాలను గురించిన పూర్తి వివరాలను ఇప్పుడు తెలుసుకుందాం.
కారణాలు:
ఒత్తిడి, రక్తప్రసరణ సమస్యలు: ఒకే భంగిమలో ఎక్కువసేపు కూర్చోవడం లేదా పడుకోవడం వల్ల నరాలపై ఒత్తిడి పడి, ఆ ప్రాంతానికి రక్తప్రసరణ తగ్గుతుంది. దీనివల్ల తిమ్మిర్లు వస్తాయి. ఈ పరిస్థితిని ‘పెరిఫెరల్ న్యూరోపతి’ అని కూడా అంటారు.
విటమిన్ లోపాలు: విటమిన్ బి12, బి6, బి1, ఇ, నియాసిన్ లోపం వల్ల నరాల ఆరోగ్యం దెబ్బతింటుంది. ఇది తిమ్మిర్లకు దారితీస్తుంది.
మధుమేహం (డయాబెటిస్): దీర్ఘకాలంగా నియంత్రణలో లేని మధుమేహం వల్ల నరాలు దెబ్బతింటాయి. ఇది మధుమేహ సంబంధిత న్యూరోపతికి దారితీస్తుంది. ఈ పరిస్థితిలో కాళ్లు, పాదాలలో తిమ్మిర్లు, మంట, నొప్పి వంటి లక్షణాలు కనిపిస్తాయి.
కార్పల్ టన్నెల్ సిండ్రోమ్: మణికట్టులో ఉన్న ఒక సన్నని మార్గం ద్వారా వెళ్ళే మధ్య నాడి (మీడియన్ నర్వ్) పై ఒత్తిడి పడినప్పుడు ఈ పరిస్థితి ఏర్పడుతుంది. దీనివల్ల చేతి వేళ్ళు, అరచేతిలో తిమ్మిర్లు వస్తాయి. కంప్యూటర్ ఎక్కువగా ఉపయోగించేవారిలో ఇది ఎక్కువగా కనిపిస్తుంది.
థైరాయిడ్ సమస్యలు: థైరాయిడ్ గ్రంథి సరిగా పనిచేయనప్పుడు, శరీరంలోని జీవక్రియలు నెమ్మదిస్తాయి. ఇది కూడా నరాల మీద ప్రభావం చూపిస్తుంది.
వెన్నుపూస సమస్యలు: వెన్నుపూసలో డిస్క్ జారడం, వెన్నుముకకు సంబంధించిన సమస్యలు కాళ్లలో తిమ్మిర్లకు దారితీస్తాయి.
రక్తహీనత (అనీమియా): శరీరంలో రక్తం తక్కువగా ఉన్నప్పుడు, ఆక్సిజన్ సరఫరా తగ్గి, తిమ్మిర్లు రావచ్చు.
డాక్టర్‌ని ఎప్పుడు సంప్రదించాలి ?
తిమ్మిర్లతో పాటు నొప్పి, బలహీనత, లేదా స్పర్శ కోల్పోయినట్లైతే.
ఎటువంటి కారణం లేకుండా తిమ్మిర్లు మొదలైతే.
తల తిరగడం, కళ్లు మసకబారడం వంటి ఇతర లక్షణాలు కూడా కనిపిస్తే.
Also Read: అల్లంతో తేనె కలిపి తింటే.. మతిపోయే ప్రయోజనాలు !
నివారణ, చికిత్స:
లైఫ్ స్టైల్ మార్పులు: ఆరోగ్యకరమైన ఆహారం తీసుకోవడం, తగినంత వ్యాయామం చేయడం, ఒకే భంగిమలో ఎక్కువసేపు ఉండకుండా అప్పుడప్పుడు కదలడం వంటివి చేయాలి.
విటమిన్ సప్లిమెంట్స్: డాక్టర్ సలహా మేరకు విటమిన్ లోపం ఉంటే సప్లిమెంట్స్ తీసుకోవచ్చు.
వైద్య చికిత్స: మధుమేహం, థైరాయిడ్, లేదా వెన్నుపూస సమస్యలు ఉన్నట్లైతే.. వాటికి తగిన ట్రీట్ మెంట్ తీసుకోవడం వల్ల తిమ్మిర్లు తగ్గుతాయి. ఇందుకు ఫిజియోథెరపీ కూడా సహాయపడుతుంది.
చేతులు, కాళ్లలో వచ్చే తిమ్మిర్లు సాధారణంగా ప్రమాదకరం కానప్పటికీ.. వాటిని నిర్లక్ష్యం చేయకూడదు. పైన పేర్కొన్న లక్షణాలు మీకు కనిపిస్తే.. వెంటనే డాక్టర్‌ని సంప్రదించి సరైన కారణం తెలుసుకోవడం చాలా ముఖ్యం. సరైన సమయంలో చికిత్స తీసుకోవడం వల్ల సమస్యను పూర్తిగా నయం చేయవచ్చు. అంతే కాకుండా ఆరోగ్యకరమైన జీవితాన్ని గడపవచ్చు.
Share
Amazon Freedom Festival Laptops: రూ. 1 లక్ష లోపు ధరలో గేమింగ్ ల్యాప్‌టాప్స్.. బెస్ట్ డీల్స్ ఇవే
Panch Jyotirlinga Darshan: పంచ జ్యోతిర్లింగ దర్శనం.. సికింద్రాబాద్ నుంచి టూర్ ప్రారంభం!
