మళ్లీ వస్తాం.. రూ.80 లక్షలు రెడీగా ఉంచండి!.. లాయర్ ఇంట్లో రూ.3.15 కోట్లు దోచేసి దొంగల వార్నింగ్!

Kurukshetra Robbery: హరియాణాలోని కురుక్షేత్రలో భారీ దొంగతనం వెలుగులోకి వచ్చింది. ఒకే ఇంటిని లక్ష్యంగా చేసుకుని దొంగలు రెండోసారి ఎంట్రీ ఇచ్చారు. అది కూడా కోట్లలో దోపిడీకి పాల్పడటం స్థానికంగా సంచలనం రేపుతోంది.

బాధితులను బంధించి, బెదిరించి..

సీనియర్ న్యాయవాది బల్వంత్ సింగ్ వాలియా ఇంట్లో గురువారం రాత్రి ఈ ఘటన జరిగింది. రాత్రి 10 గంటల సమయంలో తుపాకులు, ఆయుధాలతో ఇంట్లోకి నలుగురు దొంగలు చొరబడ్డారు. మొదట ఇంట్లో ఉన్న వాలియా భార్యను తుపాకితో బెదిరించి, కాళ్లూ చేతులు కట్టేశారు. ఆ తర్వాత కొద్ది సేపటికి ఇంటికి వచ్చిన న్యాయవాదిని కూడా చుట్టుముట్టి బంధించారు. దంపతులిద్దరి పై దాడి చేసి, చంపేస్తామని బెదిరించి బీరువా తాళాలు లాక్కున్నారు.

రూ.3.15 కోట్ల సొత్తు అపహరణ

బీరువాల్లో ఉన్న రూ.3.15 కోట్ల విలువైన నగదు, బంగారం, వెండి ఆభరణాలతో పాటు న్యాయవాదికి చెందిన లైసెన్స్డ్ రివాల్వర్‌ను కూడా దొంగలు ఎత్తి కెళ్లారు. అంతేకాకుండా, గతంలో ఈ ఏడాది మార్చి నెలలో ఇదే ఇంట్లో జరిగిన రూ.50 లక్షల దొంగతనం కూడా తామే చేశామని దొంగలు చెప్పడంతో న్యాయవాది దంపతులు తీవ్ర దిగ్భ్రాంతికి గురయ్యారు.

మళ్లీ వస్తామని హెచ్చరిక

వెళ్లేముందు దొంగలు సీసీటీవీ కెమెరాలను పూర్తిగా ధ్వంసం చేశారు. మరో రూ.80 లక్షలు సిద్ధంగా ఉంచుకోవాలని, మళ్లీ వస్తామని హెచ్చరిస్తూ అక్కడి నుంచి పరారయ్యారు.

సమాచారం అందుకున్న పోలీసులు సంఘటనా స్థలానికి చేరుకుని పరిశీలించారు. బాధితుడి ఫిర్యాదు మేరకు కేసు నమోదు చేసుకుని, నిందితులను పట్టుకోవడానికి ప్రత్యేక బృందాలతో గాలింపు చర్యలు చేపట్టారు.

Also Read: టీడీపీ ఆదేశంతో చలసాని బిగ్ డెసిషన్.. కృష్ణా డెయిరీ ఛైర్మన్ పదవికి రాజీనామా!