Survival Thriller: ఊహించండి.. బయట అడుగు పెడితే చాలు శరీరం గడ్డకట్టిపోయేంత చలి. నగరాలు కొన్ని గంటల్లోనే మంచులో కూరుకుపోతే? కరెంట్ లేకపోతే, వాహనాలు పనిచేయకపోతే, ప్రపంచంతో కమ్యూనికేషన్ పూర్తిగా తెగిపోతే? అదే సమయంలో ప్రపంచాన్ని నాశనం చేయగల ప్రాణాంతక వైరస్కు మందు దొరికితే.. ఆ మందును సురక్షితంగా మరో ల్యాబ్కు చేర్చాల్సిన బాధ్యత కొందరిపై పడితే? ప్రకృతి ఒకవైపు, సమయం మరోవైపు వెంటాడుతుంటే వాళ్లు ఆ ప్రయాణాన్ని పూర్తి చేయగలరా? ఇలాంటి ఉత్కంఠభరిత పరిస్థితులతో తెరకెక్కిన డిజాస్టర్ సైన్స్ ఫిక్షన్ సర్వైవల్ థ్రిల్లర్ ‘అపోకలిప్స్ ఆఫ్ ఐస్’ (Apocalypse of Ice).
భూమిపై వాతావరణ సమతుల్యత తీవ్రంగా దెబ్బతినడంతో పరిస్థితులు అదుపు తప్పుతాయి. ఉత్తర, దక్షిణ ధ్రువ ప్రాంతాల్లో చోటుచేసుకున్న మార్పులు తీవ్రమైన మంచు తుఫానులకు దారితీస్తాయి. వాటిలో అత్యంత ప్రమాదకరమైనది ‘పోలార్ వోర్టెక్స్’. ఈ మంచు తుఫాన్లు సాధారణ చలికి పూర్తిగా భిన్నంగా ఉంటాయి. పరిస్థితులు వేగంగా దిగజారడంతో నగరాలు గంటల వ్యవధిలోనే మంచుతో కప్పబడటం మొదలవుతుంది.
ఉష్ణోగ్రతలు మైనస్ 100 డిగ్రీలకు పడిపోయే పరిస్థితి రావడంతో బయటకు వెళ్లడం అంటే ప్రాణాలతో ఆడుకోవడమే అవుతుంది. మనుషులు ఇంటి నుంచి బయటకు వచ్చినా క్షణాల్లోనే గడ్డకట్టే ప్రమాదం. ఇలాంటి పరిస్థితుల్లో సాధారణ జీవితం పూర్తిగా స్తంభిస్తుంది. విద్యుత్ వ్యవస్థ దెబ్బతింటుంది. రవాణా ఆగిపోతుంది. వైర్లెస్ కమ్యూనికేషన్ వ్యవస్థలు కూడా పనిచేయకుండా పోతాయి. అంటే ఒక ప్రాంతంలో ఉన్న వాళ్లు మరో ప్రాంతంతో సంబంధాలు పెట్టుకోవడమే కష్టంగా మారుతుంది.
ఇదే సమయంలో ప్రపంచాన్ని మరో ప్రమాదం వెంటాడుతుంటుంది. ఇప్పటికే అనేక సమస్యలు సృష్టిస్తున్న ఒక ప్రాణాంతక వైరస్కు విరుగుడు కనుగొనే ప్రయత్నం అంటార్కిటికాలోని పరిశోధనా కేంద్రంలో కొనసాగుతుంది. అక్కడ ఉన్న శాస్త్రవేత్తలు చివరకు కీలకమైన విజయాన్ని సాధిస్తారు. వైరస్కు అవసరమైన క్యూయర్ దొరుకుతుంది. కానీ దాన్ని అక్కడే ఉంచితే ప్రయోజనం లేదు. మానవాళిని కాపాడాలంటే దాన్ని ఉష్ణమండల ప్రాంతంలో ఉన్న మరో ల్యాబ్కు సురక్షితంగా చేర్చాలి.
అక్కడి నుంచే అసలు సర్వైవల్ జర్నీ మొదలవుతుంది. శాస్త్రవేత్తలు, సర్వైవల్ నిపుణులు కలిసి ఆ మందును తీసుకుని మంచు తుఫానులో ప్రయాణం ప్రారంభిస్తారు. కానీ వాళ్లకు ఎదురయ్యే సమస్యలు ఒక్కటే కావు. దారిలో మంచు పర్వతాలు కూలిపోవచ్చు. ఆక్సిజన్ తగ్గిపోవచ్చు. వాహనాల్లోని ఇంధనం గడ్డకట్టిపోవచ్చు. ప్రతి సమస్యకు పరిష్కారం వెతికేలోపే మరో ప్రమాదం ఎదురయ్యే పరిస్థితి ఉంటుంది.
ఈ ప్రయాణంలో సమయం అత్యంత కీలకమైన అంశంగా మారుతుంది. ఒకవైపు ప్రకృతి మొత్తం మనుషులపై తిరుగుబాటు చేసినట్టుగా ఉంటుంది. మరోవైపు వైరస్ను అడ్డుకోవడానికి అవసరమైన క్యూయర్ సురక్షితంగా గమ్యస్థానానికి చేరాలి. ఈ ప్రయాణం మధ్యలో ఎదురయ్యే ప్రతి అడ్డంకి కథలో టెన్షన్ను పెంచుతుంది. చివరకు ఆ క్యూయర్ ల్యాబ్కు చేరుతుందా? ప్రపంచాన్ని కాపాడే అవకాశం మానవాళికి దక్కుతుందా? అనేది సినిమా ఉత్కంఠ.
‘అపోకలిప్స్ ఆఫ్ ఐస్’ (Apocalypse of Ice) ప్రస్తుతం హాట్స్టార్ (Hotstar)లో తెలుగు ఆడియో డబ్బింగ్తో అందుబాటులో ఉంది. ప్రకృతి విపత్తులు, ఎక్స్ట్రీమ్ వెదర్, సర్వైవల్ మిషన్లు, ప్రపంచాన్ని కాపాడే రేస్ తరహా కథలు ఇష్టపడేవారికి ఈ సినిమా మంచి ఆప్షన్.
Read Also: ట్రిప్ పేరుతో ఇదేం ట్విస్ట్… కార్పొరేట్ ఆఫీస్ పాలిటిక్స్ కల్చర్ను ఎండగట్టిన సినిమా
Share
కదిరి వైసీపీలో రగులుతున్న వర్గపోరు.. పిలవని పేరంటానికి వచ్చి రచ్చ..!
శుద్ధీకరణ పేరిట దళితులపై అవమానం.. ఏడుగురిని అరెస్ట్ చేసిన పోలీసులు!
