Korean Medical Thriller Drama OTT : హాస్పిటల్ కు వెళ్లే ప్రతి ఒక్కరూ డాక్టర్లను నమ్మి తమ ప్రాణాలను వారి చేతుల్లో పెడతారు. కానీ రోగుల ప్రాణాలు కాపాడాల్సిన ఆసుపత్రిలోనే అధికారం, అవినీతి, స్వార్థం రాజ్యమేలితే… వైద్యం కంటే పదవులు, డబ్బు, తమ పలుకుబడిని కాపాడుకోవడానికే కొందరు పెద్దలు ప్రాధాన్యం ఇస్తే… అలాంటి వ్యవస్థలో నిజాయితీగా పని చేయాలనుకునే డాక్టర్ పరిస్థితి ఎలా ఉంటుంది ? ఈ ప్రశ్నలకు సమాధానమే దక్షిణ కొరియా మెడికల్ డ్రామా ‘Doctor X Age of the White Mafia’. వైద్యరంగం వెనుక దాగి ఉన్న అధికార పోరాటాలను చూపించే ఈ సిరీస్ తాజాగా ఓటీటీలోకి వచ్చింది. మరి ఈ సిరీస్ ఏ ఓటీటీలో స్ట్రీమింగ్ కి వచ్చింది అంటే…
గే సూ-జంగ్ ఓ ప్రతిభావంతమైన సర్జన్. వైద్య పరిజ్ఞానం, క్లిష్టమైన కేసులను ఎదుర్కొనే స్కిల్స్ ఆమె బలం. రోగి పరిస్థితి ఎంత ప్రమాదకరంగా ఉన్నా, వైద్యపరంగా సరైన నిర్ణయం తీసుకోవడమే ఆమెకు ముఖ్యం. కానీ ఆమె పని చేసే గుసియో యూనివర్సిటీ హాస్పిటల్ లో పరిస్థితులు అంత సులభంగా ఉండవు. ఆసుపత్రిలో వైద్య నైపుణ్యంతో పాటు రాజకీయాలు, అధికారం, అంతర్గత వర్గపోరు కూడా కీలక పాత్ర పోషిస్తాయి. ఆసుపత్రి డైరెక్టర్ బూ సియుంగ్-గ్వాన్‌ తన స్థానాన్ని నిలబెట్టుకోవడానికి ప్రయత్నిస్తుంటాడు. వైద్య సంస్థను నడపాల్సిన బాధ్యత ఉన్నప్పటికీ, అక్కడి అధికార వ్యవస్థలో ఎవరి మాట నడవాలి, ఎవరు పైకి ఎదగాలి, ఎవరి నిర్ణయాలకు ప్రాధాన్యం ఇవ్వాలి అనే అంశాలు కూడా కీలకంగా మారతాయి.
ఇలాంటి వాతావరణంలో సూ-జంగ్ తన పనిని నిజాయితీగా వర్క్ చేయడం సవాలుగా మారుతుంది. ఆసుపత్రిలో కొత్తగా చేరిన ఇంటర్న్ పార్క్ టే-గ్యోంగ్ కూడా ఈ వ్యవస్థలోని వాస్తవాలను దగ్గరగా చూస్తాడు. వైద్య విద్యలో నేర్చుకున్న ఆదర్శాలు, ఆసుపత్రిలో ప్రత్యక్షంగా ఎదురయ్యే పరిస్థితుల మధ్య ఎంత తేడా ఉందో అతడికి అర్థమవుతుంది. రోగికి ఏది మంచిదనే దానికంటే, సంస్థలో ఉన్న అధికారులకు ఏది అనుకూలమనే దానిపై నిర్ణయాలు ప్రభావితం అవుతుంది. సూ-జంగ్ ఇలాంటి పరిస్థితులను నిశ్శబ్దంగా అంగీకరించే వ్యక్తి కాదు.
తన వైద్య నైపుణ్యాన్ని ఉపయోగించి రోగులను కాపాడాలనుకునే ఆమె, ఆసుపత్రిలోని అధికార వర్గాలు సృష్టించే అడ్డంకులను ఎదుర్కోవాల్సి వస్తుంది. ఒకవైపు వైద్యపరమైన క్లిష్ట కేసులు, మరోవైపు వ్యవస్థలో పాతుకుపోయిన అవినీతి… ఈ రెండింటినీ ఎదుర్కోవడం ఆమెకు పెద్ద పరీక్షగా మారుతుంది. ఇక్కడ కథ కేవలం డాక్టర్లు, రోగుల మధ్య జరిగే సంఘటనలకే పరిమితం కాదు. వైద్య వ్యవస్థను ఎవరు నియంత్రిస్తున్నారు ? ఆసుపత్రి పేరుతో లాభపడుతున్నది ఎవరు ? నిజాయితీగా పని చేసే వ్యక్తులు ఆ వ్యవస్థలో నిలబడగలరా ? సూ-జంగ్ అవినీతి వ్యవస్థను బయట పెట్టగలదా? తన వృత్తిపరమైన విలువలను కాపాడుకుంటూ ముందుకు వెళ్లగలదా ? అన్నదే ఈ సిరీస్‌లోని ప్రధాన ఉత్కంఠ.
ALso Read : హోటల్ నిండా దెయ్యాలు… చిన్న పిల్లాడిలో డెమాన్… నవ్విస్తూనే భయపెట్టడానికి తిరిగొచ్చిన సీజన్ 2
‘డాక్టర్ ఎక్స్ ఏజ్ ఆఫ్ ది వైట్ మాఫియా’లో కిమ్ జీ-వోన్ డాక్టర్ గే సూ-జంగ్‌గా, సన్ హ్యూన్-జూ ఆసుపత్రి డైరెక్టర్ బూ సియుంగ్-గ్వాన్‌ గా, కిమ్ వూ-సోక్ ఇంటర్న్ పార్క్ టే-గ్యోంగ్ గా నటించారు. ఈ సిరీస్ కు లీ జంగ్-రిమ్ దర్శకత్వం వహించారు. ఇది వైద్యరంగంలోని అవినీతి, అధికార పోరాటాల చుట్టూ తిరిగే కొరియన్ మెడికల్ నోయిర్ డ్రామా. అక్టోబర్ 9 నుంచి Netflixలో స్ట్రీమింగ్ అవుతోంది.
Share
ఫేక్ ఇ-ఇన్‌వాయిస్ మెసేజ్‌లతో మోసపోకండి..అసలు,నకిలీ బిల్లులను ఇలా గుర్తించండి!
రేపు 10 గంటలపాటు రైళ్లు బంద్, 57 మెట్రో స్టేషన్లు మూసివేత!
