Fantasy Comedy Series: ప్రపంచం అంతమయ్యే సమయం దగ్గరపడింది… స్వర్గం, నరకం తమ సైన్యాలను యుద్ధానికి సిద్ధం చేస్తున్నాయి. ఫోర్ హార్స్‌మెన్ ఆఫ్ ది అపోకలిప్స్ కూడా రంగంలోకి దిగబోతున్నారు. కానీ ఈ విధ్వంసానికి కారణం కావాల్సిన యాంటీక్రైస్ట్ మాత్రం కనిపించకుండా పోతాడు. ప్రపంచాన్ని కాపాడాల్సిన బాధ్యత మాత్రం ఊహించని విధంగా ఓ ఏంజెల్, ఓ డెమన్‌పై పడుతుంది. స్వర్గం, నరకం శత్రువులైనా… భూమిపై ఏర్పడిన అనుబంధం వాళ్లిద్దరినీ కలిసి పని చేసేలా చేస్తే ? ఇదే ఫాంటసీ కామెడీ సిరీస్ ‘గుడ్ ఓమెన్స్’ (Good Omens). మరి ఈ సిరీస్ స్ట్రీమింగ్ ఎక్కడ అంటే…
అజిరాఫేల్ స్వర్గానికి చెందిన ఏంజెల్. క్రౌలీ నరకానికి చెందిన డెమన్. ఇద్దరూ సిద్ధాంతపరంగా ఒకరికి ఒకరు పూర్తిగా వ్యతిరేకం. కానీ వేల ఏళ్లుగా భూమిపై తిరుగుతూ జీవించడం వల్ల వాళ్ల మధ్య ఊహించని స్నేహం ఏర్పడుతుంది. భూమిపై ఉన్న ఆహారం, పుస్తకాలు, జీవన విధానం… ఇలా ఇద్దరికీ ఈ ప్రపంచంపై ప్రత్యేకమైన ఇష్టం పెరుగుతుంది. అందుకే భూమి నాశనం కానుందనే విషయం తెలిసినప్పుడు వాళ్లిద్దరికీ అది అంత సులభంగా అంగీకరించలేని విషయంగా మారుతుంది.
ప్రపంచ అంతానికి దైవ ప్రణాళిక సిద్ధమై ఉంటుంది. స్వర్గం, నరకం తమ సైన్యాలను సిద్ధం చేసుకుంటాయి. ఫోర్ హార్స్‌మెన్ ఆఫ్ ది అపోకలిప్స్ కూడా తిరిగి రావడానికి సమయం దగ్గర పడుతుంది. ఈ మొత్తం ప్రక్రియకు కేంద్రంగా ఉండాల్సిన యాంటీక్రైస్ట్ మాత్రం ఓ సమస్యగా మారతాడు. అతడిని సరైన కుటుంబానికి అప్పగించాల్సిన సమయంలో జరిగిన పొరపాటు కారణంగా అసలు యాంటీక్రైస్ట్ ఎక్కడున్నాడో ఎవరికీ తెలియని పరిస్థితి ఏర్పడుతుంది.
ఆ యాంటీక్రైస్ట్‌నే వెతకడానికి అజిరాఫేల్, క్రౌలీ కలిసి రంగంలోకి దిగుతారు. వారి అన్వేషణ చివరకు ఆడమ్ యంగ్ అనే 11 ఏళ్ల బాలుడి దగ్గరకు చేరుతుంది. సాధారణంగా పెరుగుతున్నట్టుగా కనిపించే ఆడమ్ లో మాత్రం తనకు తెలియకుండానే ప్రపంచాన్ని మార్చగల శక్తులు మేల్కొంటుంటాయి. అతడికి తన అసలు గుర్తింపు, తన చుట్టూ జరుగుతున్న పరిణామాల గురించి ఏమీ తెలియదు.
మరోవైపు ఆడమ్ చుట్టూ ఉన్న స్నేహితులు, అనాథెమా డివైస్, న్యూటన్ పల్సిఫర్ వంటి పాత్రలు కూడా ఈ గందరగోళంలోకి వస్తాయి. అజిరాఫేల్, క్రౌలీ తమ తమ వర్గాల ఆదేశాలను పక్కనపెట్టి ప్రపంచాన్ని కాపాడేందుకు ప్రయత్నిస్తుంటే.. స్వర్గం, నరకం మాత్రం అపోకలిప్స్‌ను ఆపే ఆలోచనలో ఉండవు. దీంతో ఇద్దరి స్నేహం మరింత ప్రమాదకరమైన స్థాయికి చేరుతుంది.
అసలు ఆడమ్ నే యాంటీక్రైస్ట్ అని ఎలా గుర్తిస్తారు ? అతడిలోని శక్తులు పూర్తిగా మేల్కొంటే ప్రపంచానికి ఏం జరుగుతుంది ? స్వర్గం, నరకం సైన్యాలు భూమిపైకి వచ్చినప్పుడు అజిరాఫేల్, క్రౌలీ ఆపగలరా ? తమ సొంత వర్గాలకు వ్యతిరేకంగా వెళ్లిన ఈ ఏంజెల్, డెమన్ చివరకు ప్రపంచాన్ని రక్షించగలరా ? లేక దైవ ప్రణాళిక ప్రకారం అపోకలిప్స్ జరిగిపోతుందా ? అనేదే ‘గుడ్ ఓమెన్స్’లోని ఫాంటసీ కామెడీలో చూడాల్సిన కథ.
మైఖేల్ షీన్ (Michael Sheen), డేవిడ్ టెన్నాంట్ (David Tennant), జోన్ హామ్ (Jon Hamm), అడ్రియా అర్జోనా (Adria Arjona) తదితరులు నటించిన ఈ ఫాంటసీ కామెడీ సిరీస్ ‘గుడ్ ఓమెన్స్’. డగ్లస్ మెకిన్నన్ (Douglas Mackinnon) దర్శకత్వం వహించారు. మొదటి సీజన్ 2019లో విడుదలై ఆరు ఎపిసోడ్లుగా వచ్చింది. ప్రస్తుతం ప్రైమ్ వీడియో (Amazon Prime video)లో మూడు సీజన్లు ఉన్నాయి. సీజన్ 1, సీజన్ 2లకు తెలుగు ఆడియోతో పాటు తెలుగు సబ్‌టైటిల్స్ కూడా అందుబాటులో ఉన్నాయి. అయితే సీజన్ 3 మాత్రం తెలుగు ఆడియో లేదా తెలుగు సబ్‌టైటిల్స్ కనిపించడం లేదు.
Read Also: ప్రపంచంలోనే అత్యంత ప్రమాదకరమైన పర్వతారోహణ… గుండె జారిపోయే అడ్వెంచర్
Share
వైభ‌వ్ కు కాదు, నీకు జోల పాట పాడే టైం దగ్గర ప‌డింది..సైమ్ సెల‌బ్రేష‌న్స్ పై క‌మ్రాన్ సీరియ‌స్
సుకుమార్ అపార్ట్‌మెంట్ కిందే నాలుగేళ్లు.. శ్రీకాంత్ ఓదెల పడ్డ కష్టం ఇదే!
