Korean Romantic Drama: భార్యను కాపాడలేకపోయిన బాధతో ప్రాణాలకు తెగించి రెస్క్యూ ఆపరేషన్లు చేసే ఫైర్ఫైటర్… మరోవైపు ఓ మెడికల్ తప్పిదంతో తన లైసెన్స్‌ నే కోల్పోయే పరిస్థితిలో ఉన్న డాక్టర్. తన కేసు నుంచి బయటపడేందుకు ఆ ఫైర్ఫైటర్ నే సాక్షిగా మార్చుకోవాలని డాక్టర్ ప్లాన్ చేస్తే ? అతడికి దగ్గరవుతున్న కొద్దీ నటనగా మొదలైన బంధం నిజమైన ప్రేమగా మారితే ? ప్రమాదాల మధ్య పుట్టిన ఈ ప్రేమకథే కొరియన్ రొమాంటిక్ డ్రామా ‘లవ్ 911’ (Love 911). మరి ఈ సిరీస్ ను తెలుగులో చూడొచ్చా ? అంటే…
కాంగ్-ఇల్ ఓ రెస్క్యూ ఫైర్ఫైటర్. ప్రమాదం ఎక్కడ జరిగినా ముందుగా అక్కడికి చేరుకుని ప్రాణాలను కాపాడే ప్రయత్నం చేస్తుంటాడు. కానీ ఇతరుల ప్రాణాలు కాపాడే అతడి జీవితంలో మాత్రం ఓ విషాదం మిగిలే ఉంటుంది. తన భార్యను కాపాడలేకపోయిన జ్ఞాపకం అతడిని వెంటాడుతూనే ఉంటుంది. ఆ బాధ నుంచి బయటపడ లేకపోయినా.. రెస్క్యూ ఆపరేషన్లలో మాత్రం ఏమాత్రం వెనక్కి తగ్గడు.
మరోవైపు మి-సూ ఎమర్జెన్సీ మెడికల్ డాక్టర్. ఓ పేషెంట్ విషయంలో చేసిన మిస్టేక్ కారణంగా ఆమెపై కేసు నమోదవుతుంది. ఆ కేసు కారణంగా తన మెడికల్ లైసెన్స్‌ కు కూడా ప్రమాదం ఏర్పడుతుంది. కేసులో తనకు అనుకూలంగా పరిస్థితిని మార్చుకోవడానికి మి-సూకు కాంగ్-ఇల్ అవసరం అవుతాడు. పేషెంట్ కుటుంబానికి సంబంధించిన ఓ గొడవలో కాంగ్-ఇల్ పై దాడి జరగడంతో… ఆ సంఘటనను కేసులో ఉపయోగించుకోవాలని ఆమె భావిస్తుంది.
కానీ కాంగ్-ఇల్ ఆమె మాటలను పట్టించుకోడు. దీంతో అతడికి మరింత దగ్గరవ్వాలని మి-సూ ఓ నిర్ణయం తీసుకుంటుంది. అతను పని చేసే రెస్క్యూ టీమ్‌లో పారామెడిక్‌గా చేరుతుంది. మొదట కాంగ్-ఇల్‌ను తన కేసు కోసం ఒప్పించడమే ఆమె లక్ష్యం. అయితే కలిసి ప్రమాదకరమైన పరిస్థితులను ఎదుర్కొంటున్న కొద్దీ… అతడి గతం, అతడి బాధ, అతడి వ్యక్తిత్వం మి-సూకు అర్థమవుతాయి. అలా తన స్వార్థంతో మొదలైన ప్రయత్నం క్రమంగా నిజమైన అనుబంధంగా మారుతుంది.
ఇద్దరూ కలిసి ప్రాణాలను కాపాడే సమయంలో ఒకరిపై ఒకరికి ప్రేమ పెరుగుతుంది. కానీ మి-సూ మొదట తన దగ్గరకు వచ్చిన అసలు కారణం కాంగ్-ఇల్‌కు తెలిసినప్పుడు పరిస్థితి ఒక్కసారిగా మారిపోతుంది. తాను నిజాయితీగా ప్రేమించిన వ్యక్తి తనను ఓ కేసు కోసం ఉపయోగించుకుందని తెలుసుకుని అతడు బాధపడతాడు. ఇద్దరి మధ్య దూరం ఏర్పడుతుంది. అదే సమయంలో మి-సూ జీవితంలో మరో ఆరోగ్య సమస్య కూడా ఎదురవుతుంది.
ఇంతలో ఓ కూలిపోయిన భవనం శిథిలాల్లో కాంగ్-ఇల్ చిక్కుకుపోతాడు. అతడు ప్రాణాలతో బయటపడతాడో లేదో తెలియని పరిస్థితిలో మి-సూ అతడి కోసం పరుగెత్తుతుంది. మొదట ఓ కేసు నుంచి బయటపడేందుకు మొదలైన పరిచయం… చివరకు ఒకరి ప్రాణం కోసం మరొకరు పోరాడే స్థాయికి ఎలా చేరింది ? కాంగ్-ఇల్ తన గతాన్ని, మి-సూ చేసిన తప్పును పక్కనపెట్టి ఆమెను మళ్లీ అంగీకరిస్తాడా ? ప్రమాదం మధ్య వాళ్ల ప్రేమకు ఎలాంటి ముగింపు వస్తుంది ? అనేదే ‘లవ్ 911’లో చూడాల్సిన ఎమోషనల్ స్టోరీ.
గో సూ (Go Soo), హాన్ హ్యో-జూ (Han Hyo-joo), డాన్ లీ (Don Lee), కిమ్ సియోంగ్-ఓ (Kim Sung-oh) తదితరులు నటించిన ఈ కొరియన్ రొమాంటిక్ డ్రామాకు జియాంగ్ గి-హున్ (Jeong Gi-hun) దర్శకత్వం వహించారు. 2012 డిసెంబర్ 19న విడుదలైన ఈ సినిమా రెండు గంటల నిడివితో ఉంటుంది. ప్రస్తుతం ఇండియాలో ‘లవ్ 911’ అమెజాన్ ప్రైమ్ వీడియో (Amazon Prime Video)లో అందుబాటులో ఉంది. కొరియన్‌తో పాటు హిందీ, తమిళం, తెలుగు ఆడియోలు కూడా ఉన్నాయి. అంటే ఈ సినిమాను తెలుగులో కూడా చూడొచ్చు.
Read Also: ప్రియుడిని రిజెక్ట్ చేసిన పాపానికి ఇంత రచ్చనా ? మృణాల్ ఠాకూర్ క్రైమ్ థ్రిల్లర్ స్ట్రీమింగ్ షురూ
Share
రూ.1,500లోపు బెస్ట్ ఇయర్‌బడ్స్..బడ్జెట్ ధరలో పవర్‌ఫుల్ సౌండ్
ప్లాన్ ప్రకారమే పైలట్ స్మిత్ మచ్చర్‌పై దాడి.. దర్యాప్తులో షాకింగ్ విషయాలు!
