Emotional Telugu Short Film: ఒకే బస్సులో ప్రయాణం చేస్తున్నంత మాత్రాన అందరూ ఒకే మనస్తత్వంతో ఉంటారా? ఒకరికొకరు పరిచయం లేని వ్యక్తులు రోజుల తరబడి కలిసి ప్రయాణిస్తే ఎలాంటి పరిస్థితులు ఎదురవుతాయి? దారిలో జరిగే చిన్న చిన్న గొడవలు చివరికి స్నేహంగా మారతాయా? అసలు ఒక ప్రయాణం మనుషుల ఆలోచనా విధానాన్ని మార్చగలదా? ఇలాంటి ఆసక్తికరమైన ప్రశ్నలకు వినోదం, భావోద్వేగం కలిపి సమాధానం చెప్పే సినిమా ‘కాశీ మజిలీ’ (Kasi Majili). రేణు దేశాయ్ సుదీర్ఘ విరామం తర్వాత నటనలోకి తిరిగి రావడంతో పాటు కథను అందించిన ఈ చిత్రం, ప్రయాణం అనే సాధారణ అంశం చుట్టూ మనుషుల మధ్య బంధాలను చూపించే ప్రయత్నం చేస్తుంది.
ఒకే బస్సులో ఒకరికొకరు పరిచయం లేని, వేర్వేరు నేపథ్యాలు, స్వభావాలు ఉన్న వ్యక్తులు కలిసి ఆధ్యాత్మిక క్షేత్రమైన కాశీకి బయలుదేరడంతో ఈ కథ ప్రారంభమవుతుంది. సుదీర్ఘమైన ఈ ప్రయాణంలో దారిలోని ఎన్నో మజిలీల వద్ద వారు ఆగాల్సి వస్తుంది. ఈ విశ్రాంతి ప్రదేశాలే కథలో కీలకంగా మారి, పాత్రల మధ్య పరిచయాన్ని పెంచుతాయి. మొదట్లో చిన్న చిన్న విషయాలకే గొడవలు పడుతూ స్వార్థంగా కనిపించే వ్యక్తులు, ప్రయాణం సాగేకొద్దీ ఒకరి బాధలను మరొకరు అర్థం చేసుకుంటూ పరస్పరం అండగా నిలవడం మొదలుపెడతారు. ఇందులో రేణు దేశాయ్ పాత్ర కూడా ఇలానే మొదలవుతుంది. ఆమెకు ఒక వ్యక్తి పరిచయం అవ్వడంతో అసలు కథ మొదలవుతుంది.
ఈ ప్రయాణంలో ఎదురయ్యే రకరకాల సంఘటనలు వినోదాన్ని పంచడంతో పాటు వారి ఆలోచనా విధానంలో తీవ్రమైన మార్పును తీసుకొస్తాయి. ఆధునిక కాలంలో మనుషుల మధ్య తగ్గిపోతున్న ఆప్యాయతలను గుర్తుచేస్తూ, పరాయి వ్యక్తుల మధ్య స్నేహం, అనుబంధాలు ఎలా చిగురించాయనేది ఈ కథలో భావోద్వేగంగా సాగుతుంది. చివరికి కాశీ యాత్ర పూర్తయ్యే సమయానికి వాళ్ళు తమ పాత ఆలోచనలను వదిలేసి, మనుషులను అర్థం చేసుకునే కొత్త వ్యక్తులుగా ఎలా మారారనేదే ‘కాశీ మజిలీ’ ప్రధాన ఇతివృత్తం.
ఈటీవీ విన్ ‘కథా సుధ’ సిరీస్లో భాగంగా వచ్చిన ‘కాశీ మజిలీ’ లఘు చిత్రంలో నటి రేణు దేశాయ్ ‘కృప’ అనే ప్రధాన పాత్రలో నటించడమే కాకుండా, శంకర్ ఇందుచూడన్ ‘కన్నన్’ అనే ముఖ్య పాత్రలో నటించారు. డి. యమునా కిశోర్ దర్శకత్వం వహించిన ఈ చిత్రానికి రేణు దేశాయ్ స్వయంగా కథ, స్క్రీన్ప్లే, సంభాషణలు అందించగా, డాక్టర్ జోస్యభట్ల సంగీతాన్ని, రాణా సినిమాటోగ్రఫీని, మీర్ S. ఎడిటింగ్ను అందించారు.‘కాశీ మజిలీ’ 2026 సెప్టెంబర్ 11న నేరుగా ఈటీవీ విన్ (ETV Win)లో స్ట్రీమింగ్ అవుతోంది. పెద్ద యాక్షన్, భారీ ట్విస్టుల కంటే ప్రయాణంలో మనుషుల మధ్య ఏర్పడే బంధాలు, హాస్యం, భావోద్వేగాలు నచ్చేవారికి ఈ సినిమా మంచి టైమ్పాస్గా నిలుస్తుంది.
Share
తెలంగాణ రాజకీయంలో బిగ్ ట్విస్ట్.. అసెంబ్లీకి BRS దూరం కారణం అదేనా..?
కొట్టుకునే వరకు వెళ్లిన షాలిని, వర్షిణి!
