మద్యం, గంజాయి మత్తులో కొందరు యువకులు బరితెగించి ప్రవర్తించిన ఘటన జగిత్యాల జిల్లాలో కలకలం రేపింది. ధర్మారం మండల కేంద్రం సమీపంలోని ఒక పెట్రోల్ బంక్ వద్ద మంగళవారం రాత్రి ఈ అమానుష ఘటన చోటుచేసుకుంది. విహారయాత్రకు వెళ్తున్న వరంగల్కు చెందిన ఒక విద్యాసంస్థ విద్యార్థులపై పోకిరీలు విరుచుకుపడ్డారు.
మత్తులో హల్చల్..
స్థానిక సమాచారం ప్రకారం.. మత్తు పదార్థాల ప్రభావంతో ఉన్న కొందరు యువకులు అంతకుముందే రోడ్డుపై వెళ్తున్న పలువురితో గొడవకు దిగారు. అనంతరం సమీపంలోని పెట్రోల్ బంకుకు చేరుకున్న వీరు, అక్కడ డీజిల్ కోసం ఆగిన వరంగల్ విద్యాసంస్థకు చెందిన టూరిస్ట్ బస్సును లక్ష్యంగా చేసుకున్నారు. బస్సు డ్రైవర్తో అసభ్య పదజాలంతో వాగ్వాదానికి దిగి, బస్సులోని విద్యార్థుల పట్ల విచ్చలవిడిగా ప్రవర్తించారు. విద్యార్థినుల ముందే వీరంగం చేస్తూ భయాందోళనకు గురిచేశారు.
తిరగబడ్డ విద్యార్థులు..
పోకిరీల ఆగడాలు మితిమీరడంతో.. భయాన్నే వదిలి విద్యార్థులందరూ ఒక్కసారిగా తిరగబడ్డారు. తమ రక్షణ కోసం సమిష్టిగా పోకిరీలను అడ్డుకోవడంతో వారు అక్కడి నుంచి పరారయ్యే ప్రయత్నం చేశారు. ఈ ఘర్షణ దృశ్యాలన్నీ పెట్రోల్ బంకులోని సీసీటీవీ కెమెరాల్లో స్పష్టంగా రికార్డయ్యాయి. మత్తులో ఉన్న యువకులు విచక్షణ కోల్పోయి బస్సుపై రాళ్లతో దాడి చేసేందుకు కూడా ప్రయత్నించినట్లు తెలుస్తోంది.
పోలీసులకు ఫిర్యాదు..
ఈ ఘటనపై సమాచారం అందుకున్న పోలీసులు వెంటనే రంగంలోకి దిగారు. పెట్రోల్ బంక్ యజమానితో పాటు విద్యాసంస్థ ప్రతినిధులు కూడా బుధవారం పోలీసులకు అధికారికంగా ఫిర్యాదు చేశారు. సీసీటీవీ ఫుటేజీ ఆధారంగా నిందితులను గుర్తించే పనిలో పోలీసులు నిమగ్నమయ్యారు. బహిరంగ ప్రదేశాల్లో మద్యం, గంజాయి మత్తులో యువత ఇలాంటి దాడులకు పాల్పడటంపై స్థానికులు తీవ్ర ఆగ్రహం వ్యక్తం చేస్తున్నారు. బాధ్యులపై కఠిన చర్యలు తీసుకోవాలని విద్యార్థుల తల్లిదండ్రులు డిమాండ్ చేస్తున్నారు.
Share
Harish Rao : హరీశ్కు కీలక పదవి.. కేటీఆర్ అరెస్టు భయం వల్లేనా?
Naveen polishetty: ఆ హీరో పెళ్లి జరిగిన మరుసటిరోజే నా పెళ్లి: నవీన్ పోలిశెట్టి
