మాజీ ప్రధాని మన్మోహన్ సింగ్ విగ్రహాన్ని ఆవిష్కరించిన సీఎం రేవంత్!

Manmohan Singh: హైదరాబాద్ ఫైనాన్షియల్ డిస్ట్రిక్ట్ లోని విప్రో సర్కిల్‌లో మాజీ ప్రధాని మన్మోహన్ సింగ్ విగ్రహాన్ని ముఖ్యమంత్రి రేవంత్ రెడ్డి ఆవిష్కరించారు. ఈ కార్యక్రమాని సుప్రీం కోర్టు మాజీ ప్రధాన న్యాయమూర్తి జస్టిస్ ఎన్వీ రమణ, మంత్రులు శ్రీధర్ బాబు, అడ్లూరి లక్ష్మణ్ కుమార్, ఎంపీలు వేం నరేందర్ రెడ్డి, అనిల్ కుమార్ యాదవ్, ఎమ్మెల్యేలు, ఎమ్మెల్సీలు, ఉన్నతాధికారులు పాల్టోన్నారు. మన్మోహన్ సింగ్ జయంతి సందర్భంగా ఆయన విగ్రహానికి సీఎం రేవంత్, మంత్రులు, ఎంపీలు, ఎమ్మెల్యేలు, ఎమ్మెల్సీలు అందరూ కలిసి పుష్పాంజలి ఘటించారు. భారతదేశ గొప్ప రాజనీతిజ్ఞుడు, ప్రముఖ ఆర్థికవేత్త, మాజీ ప్రధానమంత్రి డాక్టర్ మన్మోహన్ సింగ్ గారికి భారతరత్న పురస్కారం అందించి గౌరవించాలని ముఖ్యమంత్రి రేవంత్ రెడ్డి కేంద్ర ప్రభుత్వాన్ని విజ్ఞప్తి చేశారు. సరళీకృత ఆర్థిక విధానాలతో పాటు, స్వరాష్ట్ర ఆకాంక్షను నెరవేర్చి తెలంగాణ ఆత్మగౌరవాన్ని నిలబెట్టిన డాక్టర్ మన్మోహన్ సింగ్ గారికి భారతరత్న పురస్కారంతో పాటు దేశ రాజధాని ఢిల్లీ నగరంలో వారి జ్ఞాపకార్థం సముచితమైన విజ్ఞాన కేంద్రాన్ని ఏర్పాటు చేయాలని కోరారు.

ఉపాధి హామీ పథకం

ఈ సందర్భంగా ఏర్పాటు చేసిన కార్యక్రమంలో ముఖ్యమంత్రి మాట్లాడుతూ, దేశానికి డాక్టర్ మన్మోహన్ సింగ్ అందించిన విశేషమైన సేవలను గుర్తుచేశారు. విద్యా హక్కు చట్టం, సమాచార హక్కు చట్టం, గ్రామీణ ఉపాధి హామీ పథకం, ఆహార భద్రత హక్కు చట్టం, ఆదివాసీ హక్కుల కోసం చట్టం, భూ సేకరణ – పునరావాస చట్టం వంటి డాక్టర్ మన్మోహన్ సింగ్ కాలంలో తెచ్చిన విప్లవాత్మకమైన చట్టాల గురించి ముఖ్యమంత్రి ప్రస్తావించారు. దేశం ఆర్థికంగా పూర్తిగా చితికిపోయిన పరిస్థితుల్లో ఆర్థిక సరళీకృత విధానాలు అమలు చేసిన డాక్టర్ మన్మోహన్ సింగ్ గారి జీవితం, త్యాగనిరతి, జేన్‌-జీ, అల్ఫా, బీటా తరాలకు దేశభక్తి స్ఫూర్తిని ఇవ్వాలన్న ఉద్దేశంతో వారి విగ్రహాన్ని ఆవిష్కరించాం. దేశం గర్వించదగిన జాతిరత్నాన్ని ప్రతి ఒక్కరూ గుర్తుంచుకునే విధంగా ఒక సందేశం ఇవ్వాలన్న సంకల్పంతో ఆయన విగ్రహాన్ని ఏర్పాటు చేయాలని తెలంగాణ ప్రభుత్వం నిర్ణయం తీసుకుంది.

విదేశీ మారక నిల్వలు..

ఆర్థిక సలహాదారుగా, రిజర్వ్‌ బ్యాంకు గవర్నర్‌గా, ఆర్థిక మంత్రిగా, ప్రధానమంత్రిగా ఎన్నో బాధ్యతలు నిర్వహించిన డాక్టర్ మన్మోహన్ సింగ్, దేశంలో విదేశీ మారక నిల్వలు పూర్తిగా హరించుకుపోయి, ఆర్థికంగా పూర్తిగా చితికిపోయిన ముఖచిత్రం నుంచి ఆనాటి ప్రధానమంత్రి పీవీ నరసింహారావు నాయకత్వంలో డాక్టర్ మన్మోహన్ సింగ్ తన అనుభవాలను రంగరించి ఆర్థిక సరళీకృత విధానాలను ప్రవేశపెట్టారు. పీవీ నరసింహారావు ప్రధానమంత్రిగా ఉన్నప్పుడు డాక్టర్ మన్మోహన్ సింగ్ ప్రవేశపెట్టిన లిబరలైజేషన్, ప్రైవేటైజేషన్, గ్లోబలైజేషన్ విధానాలను గొప్ప ఫలితాలనిచ్చాయి. హైదరాబాద్ నగరంలోని మైక్రోసాఫ్ట్, గూగుల్, ఐఎస్‌బీ, అమెరికన్ కాన్సులేట్ వంటి దిగ్గజ సంస్థలు, దాదాపు 40 శాతానికి పైగా రాష్ట్ర ఆర్థిక వ్యవస్థకు బలాన్ని చేకూర్చుతున్న సంస్థలున్న ఫైనాన్షియల్ డిస్ట్రిక్ట్‌లో డాక్టర్ మన్మోహన్ సింగ్ గారి విగ్రహాన్ని, పార్క్‌ను ఏర్పాటు చేయడం సముచితమని భావించామన్నారు.

Also Read: తెలుగు రాష్ట్రాల్లో నాట్స్ సేవలు.. దివ్యాంగులకు అండగా భారీ సాయం

60 ఏళ్ల సుదీర్ఘ పోరాటం..

తెలంగాణ చరిత్రను రెండు భాగాలుగా చూడొచ్చు. నిజాం పాలన నుంచి హైదరాబాద్ రాష్ట్రానికి విముక్తి కలిగించడం. సమైక్య రాష్ట్రం నుంచి ప్రత్యేక తెలంగాణను ఏర్పాటు చేయడం. ఆనాటి ప్రధానమంత్రి జవహర్ లాల్ నెహ్రూ, సర్దార్ వల్లభ్ భాయి పటేల్ గారి నేతృత్వంలో పోలీస్ యాక్షన్ ద్వారా ప్రజలకు స్వేచ్ఛను, స్వాతంత్య్రాన్ని అందించారు. ఈ విషయంలో ఎప్పుడు చర్చించినా నెహ్రూ, పటేల్ గార్లను ప్రజలు స్మరించుకుంటారు. ఆ తర్వాత దశలో తెలంగాణ ప్రజలు శాశ్వతంగా కృతజ్ఞతలు తెలిపే ఘట్టం. శ్రీమతి సోనియాగాంధీ, డాక్టర్ మన్మోహన్ సింగ్ నేతృత్వంలో 60 ఏళ్ల సుదీర్ఘ పోరాటం, ఎంతో మంది త్యాగాల ఫలితంగా తెలంగాణ స్వప్నాన్ని శాశ్వతం చేసుకున్నాం.

భారతరత్న పురస్కారం..

తెలంగాణ ఏర్పాటు చేస్తూ బిల్లుపై డాక్టర్ మన్మోహన్ సింగ్ పెట్టిన సంతకాన్ని ఈ పార్క్‌లో నిక్షిప్తం చేశాం. ఇక్కడికి వచ్చే ప్రతి ఒక్కరికీ ఆయన స్వదస్తూరి సంతకం కనిపించేలా ముద్రించడం జరిగింది. ఆ గొప్పమేధావి మన్మోహన్ సింగ్ విగ్రహ ఆవిష్కరణ కార్యక్రమం వ్యక్తిగతంగా తనకు గౌరవం తెచ్చేదిగా భావిస్తున్నా. ఈ ప్రతిష్టాత్మకమైన కార్యక్రమానికి డాక్టర్ మన్మోహన్ సింగ్ తో వ్యక్తిగత పరిచయాలు, వారి ఆలోచనల పట్ల సంపూర్ణ అవగాహన ఆర్థికవేత్త మోహన్ గురుస్వామి ఈ విగ్రహావిష్కరణ కార్యక్రమానికి ప్రత్యేకంగా ఆహ్వానించి మాట్లాడించాం.దేశ శ్రేయస్సు కోసం ఎన్నో చట్టాలను అమలు చేసిన మౌనముని. గొప్ప రాజనీతిజ్ఞుడు, భారతదేశ ముద్దుబిడ్డ. వారికి భారతరత్న పురస్కారం ఇవ్వడానికి ప్రభుత్వానికి ఎందుకు అభ్యంతరం? దేశం గర్వించదగిన జాతిరత్నాన్ని రాజకీయపరమైన అంశాల నేపథ్యంలో గుర్తించకపోవడం విషాదకరం. కొన్ని సందర్భాలు, అంశాల్లో రాజకీయాల గురించిన ఆలోచన చేయడం ఎంతమాత్రం తగదని అన్నారు.

Also read: డీసీఎం ఢీకొని ఆరు పాడి గేదెలు మృతి.. దిక్కుతోచని స్థితిలో అన్నదాత!