రాజస్థాన్ అంటే అందరికీ ముందుగా గుర్తుకు వచ్చేవి భారీ కోటలు, రాజభవనాలు, విశాలమైన ఎడారులు. అయితే ఈ రాష్ట్రంలో అందమైన ప్రకృతి జలపాతాలు కూడా ఉన్నాయని చాలా మందికి తెలియదు. ముఖ్యంగా వర్షాకాలంలో ఈ జలపాతాల చుట్టూ ఉన్న కొండలు పచ్చదనంతో కళకళలాడుతాయి. ఎత్తైన రాళ్లపై నుంచి ఉరకలెత్తుతూ జాలువారే నీరు అద్భుతమైన దృశ్యాన్ని సృష్టిస్తుంది. ప్రకృతి ప్రేమికులు, ట్రెక్కింగ్ అభిమానులు ఈ ప్రాంతాలను ఎంతో ఇష్టపడతారు. నగరాల హడావుడికి దూరంగా ప్రశాంతమైన వాతావరణాన్ని ఆస్వాదించాలనుకునే వారికి ఇవి మంచి ఆప్షన్.
చిత్తోర్గఢ్ సమీపంలోని మీనాల్ జలపాతం రాజస్థాన్లో అత్యంత ఫేమస్ జలపాతాల్లో ఒకటి. ఇందులో భారీగా ప్రవహించే నీళ్ల కారణంగా దీన్ని “మినీ నయాగరా” అని కూడా పిలుస్తారు. ఈ జలపాతం చారిత్రక మీనాల్ దేవాలయ సముదాయానికి సమీపంలో ఉంది. వర్షాకాలంలో కొండలపై నుంచి వేగంగా కిందికి దూసుకువచ్చే నీటి ప్రవాహం పర్యాటకులను ఆకట్టుకుంటుంది. ప్రకృతి అందాలతో పాటు ఆలయాన్ని కూడా సందర్శించే అవకాశం ఉంటుంది.
కోటా సమీపంలోని గైపర్నాథ్ జలపాతం కొండల మధ్య దాగి ఉంటుంది. ఈ జలపాతాన్ని చేరుకోవాలంటే చిన్న ట్రెక్కింగ్ చేయాల్సి ఉంటుంది. సమీపంలోని పురాతన శివాలయం ఈ ప్రాంతానికి ఆధ్యాత్మిక ప్రశాంతతను అందిస్తుంది. బుండీ జిల్లాలోని భీమలత్ జలపాతం సుమారు 150 అడుగుల ఎత్తు నుంచి కిందకు జాలువారుతుంది. మహాభారతంలోని భీముడితో ఈ జలపాతానికి సంబంధం ఉందని స్థానిక కథనాలు చెబుతాయి. అయితే ఇది పూర్తిగా సహజంగా ఏర్పడిన జలపాతమని శాస్త్రవేత్తలు పేర్కొంటున్నారు.
రావత్భాటా ప్రాంతంలో ప్రకృతి ప్రేమికులను ఆకట్టుకునే రెండు అందమైన జలపాతాలు ఉన్నాయి. రాణా ప్రతాప్ సాగర్ ఆనకట్ట సమీపంలోని చూలియా జలపాతం ప్రత్యేకమైన రాతి నిర్మాణం, ఏడాది పొడవునా ప్రవహించే నీటి కోసం ప్రసిద్ధి చెందింది.
పడాజర్ మహాదేవ్ జలపాతం దట్టమైన అడవుల మధ్య ప్రశాంతంగా ఉంటుంది. ఈ జలపాతం రామేశ్వర్ మహాదేవ్ గుహ ఆలయం సమీపంలో ప్రవహిస్తుంది. ప్రశాంత వాతావరణంలో కొంత సమయం గడపాలనుకునే వారికి ఇది అద్భుతమైన ప్రదేశం.
రాజస్థాన్లోని ఏకైక హిల్ స్టేషన్ మౌంట్ అబూలో ధ్రూడియా జలపాతం ఉంది. దట్టమైన అడవుల మధ్య ఉన్న ఈ జలపాతాన్ని చేరుకోవడానికి ట్రెక్కింగ్ చేయాలి. మార్గమంతా పచ్చని ప్రకృతి పర్యాటకులను ఆకట్టుకుంటుంది. అల్వార్ జిల్లాలోని సిలిసెఢ్ సరస్సు సమీపంలో గర్భాజీ జలపాతం ఉంది. అరావళి కొండల మధ్య దాగి ఉన్న ఈ ప్రాంతం ప్రశాంతతకు ప్రసిద్ధి చెందింది. ఎత్తైన రాళ్లపై నుంచి జాలువారే నీటి అందాలు ప్రతి సందర్శకుడిని మంత్రముగ్ధులను చేస్తాయి.
వర్షాకాలంలో ఈ జలపాతాలు అత్యంత అందంగా కనిపించినప్పటికీ జాగ్రత్తలు తప్పనిసరిగా పాటించాలి. వర్షాల కారణంగా రాళ్లు చాలా జారుడుగా మారుతాయి. మంచి పట్టున్న షూస్ ధరించడం మంచిది. వేగంగా ప్రవహించే నీటికి దగ్గరగా వెళ్లకూడదు. లోతైన సహజ కుంటల్లో ఈత కొట్టే ప్రయత్నం చేయకూడదు. ప్రయాణానికి ముందు వాతావరణ పరిస్థితులను తెలుసుకోవాలి. స్థానిక అధికారుల సూచనలను తప్పకుండా పాటించాలి. కుటుంబ సభ్యులు లేదా అనుభవం ఉన్న గైడ్తో ప్రయాణించడం మరింత సురక్షితం.
Also Read: వర్షాకాలంలో ఈ హిల్ స్టేషన్లకు అసలు వెళ్లకూడదు.. ప్రాణాలకు ప్రమాదం
రాజస్థాన్ కేవలం కోటలు, రాజభవనాలు, ఎడారులకే పరిమితం కాదు. ఈ ఏడు అద్భుతమైన జలపాతాలు రాష్ట్రంలోని మరో అందమైన ప్రకృతి రూపాన్ని పరిచయం చేస్తాయి. వర్షాకాలంలో ఈ ప్రాంతాల అందాలు రెట్టింపు అవుతాయి. సరైన ప్రణాళికతో, అవసరమైన జాగ్రత్తలు పాటిస్తూ ఈ ప్రకృతి అద్భుతాలను సందర్శిస్తే జీవితాంతం గుర్తుండిపోయే అనుభవాన్ని సొంతం చేసుకోవచ్చు.
Share
కోట్ల విలువైన మత్తు... ఒక్క క్షణంలో బూడిద! సైబరాబాద్ పోలీసుల బిగ్ ఆపరేషన్
Gas Cylinder Booking Rules: గ్యాస్ సిలిండర్ల ధరలు ఓకే.. మరి నిబంధనల మాటేంటి, ఇంకా ముప్పు పొంచి వుందా?
