Special MMTS Trains for Hyderabad Ganesh Immersion: హైదరాబాద్ లో గణేశ్ నిమజ్జనోత్సవం సందర్భంగా ప్రయాణికుల రద్దీని దృష్టిలో పెట్టుకుని దక్షిణ మధ్య రైల్వే కీలక నిర్ణయం తీసుకుంది. నిమజ్జన వేడుకలు రాత్రివేళ కూడా కొనసాగనున్న నేపథ్యంలో ప్రయాణికులకు ఇబ్బందులు లేకుండా ప్రత్యేక ఎంఎంటీఎస్ రైళ్లను అందుబాటులోకి తీసుకురానుంది. సెప్టెంబర్ 25-26, 26-27 తేదీల్లో ఈ ప్రత్యేక సర్వీసులు నడవనున్నాయి.
సాధారణంగా రాత్రి సమయంలో ఎంఎంటీఎస్ సర్వీసులు పరిమితంగా ఉండటంతో నిమజ్జనం కోసం నగరంలోని వివిధ ప్రాంతాలకు వెళ్లే ప్రజలకు రవాణా సమస్యలు ఎదురయ్యే అవకాశం ఉంది. దీనిని దృష్టిలో ఉంచుకుని రాత్రి 11 గంటల నుంచి ఉదయం 5 గంటల వరకు ప్రత్యేక రైళ్లను నడపాలని రైల్వే నిర్ణయించింది. ఈ సర్వీసులతో నిమజ్జన కార్యక్రమాలు పూర్తయ్యాక ఇళ్లకు తిరిగి వెళ్లే భక్తులకు కూడా ప్రజా రవాణా అందుబాటులో ఉండనుంది. ముఖ్యంగా హైదరాబాద్, సికింద్రాబాద్ ప్రాంతాల మధ్య ప్రయాణించే వారికి ఈ ప్రత్యేక రైళ్లు ఉపయోగపడనున్నాయి.
సికింద్రాబాద్ నుంచి హైదరాబాద్కు రాత్రి 11.50 గంటలకు ప్రత్యేక ఎంఎంటీఎస్ రైలు బయలుదేరుతుంది. అనంతరం హైదరాబాద్ నుంచి లింగంపల్లికి 12.30 గంటలకు మరో సర్వీసు ఉంటుంది. లింగంపల్లి నుంచి హైదరాబాద్కు తెల్లవారుజామున 1.50 గంటలకు రైలు బయలుదేరుతుంది. ఆ తర్వాత హైదరాబాద్ నుంచి సికింద్రాబాద్కు ఉదయం 3.30 గంటలకు ప్రత్యేక సర్వీసు నడుస్తుంది.
మరో మార్గంలో హైదరాబాద్ నుంచి లింగంపల్లికి రాత్రి 11.10 గంటలకు రైలు బయలుదేరుతుంది. లింగంపల్లి నుంచి ఫలక్నుమాకు 12.10 గంటలకు ప్రత్యేక సర్వీసు ఉంటుంది. అనంతరం ఫలక్ నుమా నుంచి సికింద్రాబాద్కు తెల్లవారుజామున 2.20 గంటలకు రైలు బయలుదేరుతుంది. సికింద్రాబాద్ నుంచి హైదరాబాద్కు ఉదయం 4 గంటలకు మరో సర్వీసు అందుబాటులో ఉంటుంది.
ప్రత్యేక ఎంఎంటీఎస్ రైళ్లను కేవలం ప్రధాన స్టేషన్లకే పరిమితం చేయలేదు. ఆయా మార్గాల్లో ఉన్న సాధారణ ఎంఎంటీఎస్ స్టేషన్లన్నింటిలో ఈ రైళ్లు ఆగనున్నాయి. దీంతో నిమజ్జన వేడుకలకు వెళ్లే వారు, తిరిగి ఇళ్లకు వచ్చే వారు తమకు అనుకూలమైన స్టేషన్ లో రైలు ఎక్కేలా, దిగే అవకాశం ఉంటుంది. హైదరాబాద్, సికింద్రాబాద్ జంట నగరాల్లో గణేశ్ నిమజ్జనం రోజుల్లో భారీగా ట్రాఫిక్ పెరగడం కామన్. రహదారులపై వాహనాల రద్దీతో పాటు పలు ప్రాంతాల్లో ట్రాఫిక్ ఆంక్షలు కూడా ఉండే అవకాశం ఉంటుంది. ఈ నేపథ్యంలో రాత్రివేళ ప్రత్యేక ఎంఎంటీఎస్ సర్వీసులు అందుబాటులోకి రావడం ప్రయాణికులకు కొంత వెసులుబాటు కల్పించనుంది.
నిమజ్జనోత్సవాల సమయంలో పెద్ద సంఖ్యలో ప్రజలు నగరంలోని వివిధ ప్రాంతాల నుంచి హుస్సేన్సాగర్, ఇతర నిమజ్జన ప్రాంతాల వైపు తరలివెళ్తారు. కార్యక్రమం పూర్తయ్యే సమయానికి ఒకేసారి రవాణా అవసరం ఏర్పడుతుంది. అలాంటి సమయంలో రైలు సర్వీసులు అందుబాటులో ఉండటం వల్ల రోడ్డు రవాణాపై ఒత్తిడి తగ్గే అవకాశం ఉంది. సెప్టెంబర్ 25-26, 26-27 రాత్రుల్లో ప్రయాణం చేయనున్న వారు ప్రత్యేక ఎంఎంటీఎస్ సర్వీసుల సమయాలను ముందుగానే గమనించి తమ ప్రయాణాన్ని ప్లాన్ చేసుకోవడం మంచిది. నిమజ్జన వేడుకల సందర్భంగా ప్రయాణికుల సౌకర్యం కోసం రైల్వే తీసుకున్న ఈ ప్రత్యేక ఏర్పాట్లు నగర ప్రయాణికులకు ఉపయోగపడనున్నాయి.
Read Also: డ్రైవర్ అవసరం లేదు.. గంటకు 90 కి.మీ వేగం.. కొత్త మెట్రో రైళ్లు వచ్చేస్తున్నాయ్!
Share
KTR, హరీష్రావు పేర్లు ఫామ్హౌస్ రావు 1, 2గా మార్చుకోవాలి: బల్మూరు వెంకట్
టీచర్లపై దాడి చేసిన ఏ ఒక్కర్నీ వదిలిపెట్టం.. వైసీపీకి మంత్రి లోకేష్ మాస్ వార్నింగ్
