Rare Flower Pluck Penalty| ప్రకృతి ఎంతో అందంగా ఉందని చెప్పడానికి మొదటి ఉదాహరణ పువ్వు. అలాంటి పువ్వులలో ఎన్నో అద్భుత రకాలున్నాయి. వాటిలో ఒకటి నీలకురింజి పువ్వు. నీలగిరి కొండలు అరుదైన నీలకురింజి పూలతో అందంగా మారుతున్నాయి. ఈ ప్రత్యేకమైన పూలను చూడటానికి పర్యాటకులు, ఫొటోగ్రాఫర్లు, ప్రకృతి ప్రేమికులు పెద్ద సంఖ్యలో వస్తున్నారు. కొండ ప్రాంతాల్లో నీలిరంగు పూలు విరబూయడం చూస్తే ఆ దృశ్యాలు ఎంతో అద్భుతంగా కనిపిస్తాయి. అయితే ఈ పూలను కోయడం మాత్రం నిషేధం. నిబంధనలు ఉల్లంఘిస్తే భారీ జరిమానాతో పాటు చట్టపరమైన చర్యలు ఎదుర్కోవాల్సి రావచ్చు.
నీలకురింజి పూలు తమ ప్రత్యేకమైన నీలిరంగుతో ఎంతో ప్రసిద్ధి చెందాయి. ఈ పూలు ఒకేసారి విరబూస్తే కొండ ప్రాంతాలు నీలిరంగు తివాచీలా కనిపిస్తాయి. ఈ అరుదైన ప్రకృతి దృశ్యాన్ని చూసేందుకు చాలా మంది పర్యాటకులు ఆసక్తి చూపుతున్నారు. సోషల్ మీడియాలో పూలకు సంబంధించిన వీడియోలు, ఫొటోలు కూడా వైరల్ అవుతున్నాయి.
సాధారణంగా ఈ మొక్క సుమారు 12 సంవత్సరాలకు ఒకసారి పూలు పూస్తుందని చెబుతారు. అందుకే ఈ పుష్పించే కాలాన్ని ప్రకృతి ప్రేమికులు ఎంతో ప్రత్యేకంగా భావిస్తారు.
అటవీ శాఖ అధికారులు నీలకురింజి పూలను కోయవద్దని పర్యాటకులను హెచ్చరిస్తున్నారు. పూలను కోయడం లేదా మొక్కలను దెబ్బతీయడం చట్టపరమైన సమస్యలకు దారితీయవచ్చు. నిబంధనలు ఉల్లంఘించిన వారికి రూ.25 వేల వరకు జరిమానా విధించే అవకాశం ఉంది. అలాగే మూడు సంవత్సరాల వరకు జైలు శిక్ష కూడా ఎదురయ్యే అవకాశం ఉంది.
అందువల్ల పర్యాటకులు పూలను తాకకుండా, కోయకుండా వాటి అందాన్ని ఆస్వాదించాలి. పూలతో ఫొటోలు తీసుకోవాలనుకుంటే అనుమతించిన ప్రాంతాల నుంచే ఫొటోలు తీసుకోవాలి.
అటవీ ప్రాంతాల్లోకి వెళ్లే ముందు అధికారులు ఇచ్చే సూచనలను తప్పకుండా పాటించాలి. మంచి ఫొటోలు వస్తాయని భావించి నిషేధిత ప్రాంతాల్లోకి ప్రవేశించకూడదు. కొన్ని పుష్పించే ప్రాంతాలు రక్షిత అటవీ ప్రాంతాలకు దగ్గరగా ఉంటాయి. అక్కడ అడవి ఏనుగుల సంచారం కూడా ఉండే అవకాశం ఉంది. అనుమతి లేకుండా అడవుల్లోకి వెళ్లడం పర్యాటకుల ప్రాణాలకు ప్రమాదకరంగా మారవచ్చు. అందుకే నిర్ణయించిన మార్గాలు, వీక్షణ ప్రాంతాల్లోనే పర్యాటకులు ఉండాలి.
పెరుగుతున్న పర్యాటకుల రద్దీతో అటవీ ప్రాంతాల్లోని వన్యప్రాణులను ఇబ్బందికలుగుతోంది. ఎక్కువ మంది అడవుల్లోకి వెళ్లడం వల్ల మనుషులు, ఏనుగుల మధ్య ఎదురుపడే ప్రమాదం పెరుగుతుంది. పర్యాటకులు వన్యప్రాణులకు ఎప్పుడూ సురక్షితమైన దూరం పాటించాలి. వాటిని దగ్గరగా వెళ్లి చూడడం, వెంబడించడం లేదా ఇబ్బంది పెట్టడం చేయకూడదు.
Also Read: కష్టాల్లో ఎప్పుడూ తోడుగా ఉంటారు.. ఈ తేదీల్లో పుట్టినవారు కుటుంబానికి అండగా నిలబడతారు
నీలకురింజి పూలను చూడటానికి వచ్చే ప్రతి ఒక్కరూ బాధ్యతగా వ్యవహరించాలి. పూలను కోయకుండా, మొక్కలను తొక్కకుండా ప్రకృతి అందాలను ఆస్వాదించాలి. అటవీ శాఖ, పోలీస్ అధికారులు ఇచ్చే సూచనలను తప్పకుండా పాటించాలి. చెత్తను పడేయకుండా పరిసరాలను పరిశుభ్రంగా ఉంచాలి.
నీలకురింజి పుష్పించడం అరుదైన ప్రకృతి అద్భుతం. దీన్ని కాపాడితే భవిష్యత్ తరాలు కూడా ఈ అద్భుతమైన దృశ్యాన్ని ఆస్వాదించగలవు.
Share
2026లోనూ రైల్వే లైన్ లేని దక్షిణ భారత జిల్లాలు ఇవే.. కారణం తెలిస్తే షాక్!
రాకేష్ ఇంటి గుట్టు రట్టు చేసిన ప్రదీప్.. ఇలా తయారయ్యారేంటి భయ్యా!
