ప్రపంచంలోనే అత్యంత బరువైన గుమ్మడికాయ.. వందలు కాదు వేయి కేజీలకు పైనే

World’s heaviest pumpkin| ప్రపంచంలోనే అత్యంత బరువైన గుమ్మడికాయ ఎంత బరువు ఉంటుందో ఎప్పుడైనా ఊహించారా? సాధారణంగా మనం చూసే గుమ్మడికాయల కంటే వందల రెట్లు పెద్దదైన ఓ గుమ్మడికాయ ఇప్పుడు ప్రపంచవ్యాప్తంగా అందరి దృష్టిని ఆకర్షిస్తోంది. యునైటెడ్ కింగ్‌డమ్‌కు చెందిన ఓ రైతు ఏకంగా వేయికి పైగా కిలోల బరువున్న గుమ్మడికాయను పండించి ప్రపంచ రికార్డు సృష్టించాడు. ఈ భారీ గుమ్మడికాయ.. తెల్ల ఖడ్గమృగం కంటే కూడా ఎక్కువ బరువు ఉండటం విశేషం.

ప్రపంచ రికార్డు సృష్టించిన ఇయాన్ ప్యాటన్

యునైటెడ్ కింగ్‌డమ్‌లోని హాంప్‌షైర్‌కు చెందిన ఇయాన్ ప్యాటన్ మొక్కల నర్సరీకి ఓనర్. ఆయనకు భారీ గుమ్మడికాయలను పండించడంలో ఎంతో అనుభవం ఉంది. తాజాగా ఆయన పండించిన గుమ్మడికాయ ప్రపంచంలోనే అత్యంత బరువైనదిగా గుర్తింపు పొందింది. గ్రేట్ పంప్‌కిన్ కామన్వెల్త్ (GPC) అక్టోబర్ 3న ఈ గుమ్మడికాయ బరువును ధృవీకరించింది. గిన్నిస్ వరల్డ్ రికార్డ్స్ ప్రకారం.. ఈ గుమ్మడికాయ బరువు 1,295.8 కిలోలు. తన గత రికార్డు గుమ్మడికాయ కంటే ఇది దాదాపు 20 కిలోలు ఎక్కువ బరువు ఉంది.

గుమ్మడికాయకు బఘీరా అనే పేరు

ఇయాన్ తన కుమారుడి సూచనతో ఈ భారీ గుమ్మడికాయకు బఘీరా అని పేరు పెట్టారు. రుడ్‌యార్డ్ కిప్లింగ్ రచించిన ప్రసిద్ధ నవల ‘ది జంగిల్ బుక్’లోని బఘీరా పాత్ర నుంచి ఈ పేరు తీసుకున్నారు. ఇంతకుముందు ఇయాన్ పండించిన గుమ్మడికాయకు మగుల్ అని పేరు పెట్టారు. ఆ గుమ్మడికాయ బరువు రికార్డును కోల్పోయినా, దాని చుట్టుకొలత విషయంలో ఇప్పటికీ ప్రత్యేక గుర్తింపు ఉంది.

పాత గుమ్మడికాయ చుట్టుకొలతలో రికార్డు

మగుల్ గుమ్మడికాయ చుట్టుకొలత 649.8 సెంటీమీటర్లు. ప్రస్తుతం ప్రపంచ రికార్డు సృష్టించిన బఘీరా చుట్టుకొలత 596.9 సెంటీమీటర్లు మాత్రమే. అయినప్పటికీ, ఎక్కువ బరువు కారణంగా బఘీరా.. కొత్త ప్రపంచ రికార్డు సృష్టించింది.

Also Read: పురుషులు ఎప్పటికీ బయటికి చెప్పరు.. రిలేషన్‌షిప్‌లో ఈ 9 విషయాలు కోరుకుంటారు

భారీ గుమ్మడికాయ పెంచడానికి ప్రత్యేక శ్రద్ధ అవసరం

బఘీరాను పెంచడానికి ఇయాన్ ప్రతిరోజూ ఎంతో కష్టపడ్డారు. రెండు నెలలపాటు రోజుకు ఆరు గంటల వరకు గుమ్మడికాయ తోటలో ఒంటరిగా పనిచేశారు. మొక్కలను గ్రీన్‌హౌస్‌లో పెంచడం వల్ల ఎక్కువ సమయం లభిస్తుందని ఆయన సూచించారు.

వేసవిలో గ్రీన్‌హౌస్ ఉష్ణోగ్రత 40 డిగ్రీల సెల్సియస్‌కు చేరినప్పటికీ, మొక్కల సంరక్షణ కొనసాగించారు. రోజుకు 130 గ్యాలన్ల నీటిని, అంటే సుమారు 590 లీటర్ల నీటిని మొక్కలకు అందించారు.

Also Read: ఒక్కో సెలైన్ బాటిల్‌కు రూ.15000 చెల్లిస్తున్న యువత.. డాండియా డాన్స్ పిచ్చి.. ఆరోగ్యకరమేనా?

ఇయాన్ లక్ష్యం ఇప్పుడు 3,000 పౌండ్ల గుమ్మడికాయ

ప్రపంచ రికార్డు సాధించినప్పటికీ ఇయాన్ ప్రయత్నాలను ఆపాలనుకోవడం లేదు. తదుపరి పోటీల్లో 3,000 పౌండ్ల బరువున్న గుమ్మడికాయను పండించాలని లక్ష్యంగా పెట్టుకున్నారు. ఇది సుమారు 1,361 కిలోలకు సమానం.

ప్రస్తుతం బఘీరా గుమ్మడికాయను హాంప్‌షైర్‌లోని సౌతాంప్టన్ సమీపంలో ఉన్న సన్నీఫీల్డ్స్ ఫామ్‌లో ప్రదర్శనకు ఉంచారు. అక్టోబర్ నెలాఖరు వరకు సందర్శకులు ఈ భారీ గుమ్మడికాయను చూడవచ్చు.