GHMC: వరదకు చెక్ పెట్టేందుకు రోబోట్లను రంగంలోకి దింపిన జీహెచ్ఎంసీ.. ఇవి ఎలా పనిచేస్తాయంటే?

GHMC: గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ) వర్షాకాలంలో డ్రైనేజీ సమస్యలను తగ్గించేందుకు అత్యాధునిక రోబోటిక్ యంత్రాలను పరీక్షిస్తోంది. ఈ టెక్నాలజీ హైదరాబాద్ నగరంలోని స్టార్మ్‌వాటర్ డ్రైనేజీ వ్యవస్థలను సమర్థవంతంగా శుభ్రం చేయడం, మునిగిపోయే ప్రాంతాలను తగ్గించడం లక్ష్యంగా పెట్టుకుంది. ఈ రోబోటిక్ మిషన్లు అధిక ఒత్తిడితో మురుగు నీటిని పిచికారీ చేసే జెట్టింగ్-కమ్-సక్షన్ సాంకేతికతను ఉపయోగించి పని చేస్తాయి. ఈ మిషన్లు డ్రైనేజీలోని అడ్డంకులను తొలగించడంతో పాటు, రోబోటిక్ కెమెరాల ద్వారా డ్రైనేజీ వ్యవస్థలోని లోపాలను సులభంగా గుర్తిస్తాయి. ఈ సాంకేతికత హైదరాబాద్ నగరంలోని 140 నుంచి 145 కీలకమైన నీటి ముంపు ప్రాంతాలను గుర్తించడంలో తోడ్పడుతోంది.

ఈ రోబోటిక్ యంత్రాలు ప్రధానంగా ఖైరతాబాద్ జోన్‌లో, జూబ్లీ హిల్స్, మెహదీపట్నం, గోషామహల్, ఖైరతాబాద్, కార్వాన్ వంటి ప్రాంతాల్లో ప్రయోగాత్మకంగా పనిచేస్తున్నాయి. ఈ యంత్రాలు అధిక ఒత్తిడితో నీటిని ఉపయోగించి డ్రైనేజీలోని చెత్త, బురద, ఇతర ఘన పదార్థాలను తొలగిస్తాయి. అలాగే.. కెమెరాలతో అమర్చిన రోబోట్లు డ్రైనేజీ వ్యవస్థలోని అడ్డంకులను గుర్తించి, వాటి పరిస్థితిని అంచనా వేస్తాయి. ఈ ప్రక్రియ వర్షాకాలంలో వరద నీరు రోడ్లపై నిలిచిపోకుండా సాఫీగా ప్రవహించేలా చేస్తుంది.

ALSO READ: SGPGIMS Notification: భారీగా ఫ్యాకల్టీ ఉద్యోగాలు.. భారీ శాలరీ, దరఖాస్తుకు ఇంకా 4 రోజులే సమయం

GHMC గతంలోనూ స్టార్మ్‌వాటర్ డ్రైనేజీ వ్యవస్థను బలోపేతం చేయడానికి అనేక చర్యలు తీసుకుంది. 2022-23లో 968 డ్రైనేజీ పనులను రూ. 533.79 కోట్లతో చేపట్టగా, 2023-24లో 478 పనులకు రూ.320.83 కోట్లు ఖర్చు చేసింది. అలాగే, డీసిల్టింగ్ కార్యక్రమాల ద్వారా లక్షల క్యూబిక్ మీటర్ల బురదను కూడా తొలగించింది. ఈ కొత్త రోబోటిక్ సాంకేతికతతో GHMC మరింత సమర్థవంతంగా నీటి ముంపు సమస్యలను పరిష్కరించాలని లక్ష్యంగా పెట్టుకుంది.

ALSO READ: PGCIL Recruitment: పవర్ గ్రిడ్‌లో భారీగా ఉద్యోగాలు.. జీతమైతే లక్షకు పైనే, లాస్ట్ డేట్ ఎప్పుడంటే?

ఈ మిషన్లు మానవ జోక్యం లేకుండా డ్రైనేజీలను శుభ్రం చేయడమే కాకుండా.. సమస్యాత్మక ప్రాంతాలను గుర్తించడంలోనూ తోడ్పడనున్నాయి. ఈ చర్యలు నగరంలో వర్షాకాలంలో సంభవించే ట్రాఫిక్ ఇబ్బందులను, నీటి ముంపు సమస్యలను గణనీయంగా తగ్గిస్తాయని GHMC అధికారులు భావిస్తున్నారు. ఈ సాంకేతికత హైదరాబాద్ నగరాన్ని స్మార్ట్ సిటీగా మార్చడంలో కీలక పాత్ర పోషిస్తుందని నమ్ముతున్నారు.